ادىلەت دەپارتامەنتى 2025 جىلدىڭ ءبىرىنشى جارتىجىلدىعىندا جۇرگىزىلگەن باقىلاۋ مەن قاداعالاۋ جۇمىسىنىڭ قورىتىندىسىن شىعاردى.
نوتاريۋستار، ادۆوكاتتار، قۇقىقتىق كونسۋلتانتتار قىزمەتى مەن حالىققا كورسەتىلەتىن مەملەكەتتىك قىزمەتتىڭ ساپاسى باستى نازاردا بولدى. ستاتيستيكاعا قاراعاندا، تەكسەرۋ جاعى قاتايىپ، ازاماتتاردىڭ شاعىمدارى دا ۇزبەي قارالىپ، زاڭ بۇزۋشىلىقتىڭ جولىن كەسە باستاعان. وڭىرلىك كوممۋنيكاسيالار قىزمەتىندە ادىلەت دەپارتامەنتىنىڭ باسشىسى بالايىم كەسەبايەۆا وسىلاي دەدى.
الماتىدا ءقازىر 964 نوتاريۋس جۇمىس ىستەيدى. الايدا ولاردىڭ ءبارى بىردەي زاڭدى ساقتاي بەرمەيدى. وسى كەزەڭدە نوتاريۋستاردىڭ ارەكەتىنە قاتىستى 419 شاعىم تۇسكەن. ونىڭ 27ء-سى راستالىپتى. 4 نوتاريۋستىڭ ليسەنزياسى توقتاتىلىپ، تاعى 8 ادام تارتىپتىك جاۋاپكەرشىلىككە تارتىلعان. ليسەنزيادان ايىرۋ تۋرالى ءىس قوزعالىپ، نوتاريۋستاردىڭ ءوز ءوتىنىشى بويىنشا ليسەنزياسىن توقتاتقان. ءبىر نوتاريۋس سوت شەشىمىمەن ليسەنزياسىنان ايىرىلعان، ءبىراق بۇل شەشىم ءالى كۇشىنە ەنگەن جوق.
سونىمەن قاتار، نوتاريۋستاردىڭ 23-ىنە نوتاريالدىق قىزمەتتەردى ورىنداۋ كەزىندە زاڭ بۇزۋشىلىق جاساعانى ءۇشىن اكىمشىلىك ءىس قوزعالدى. بىلتىر مۇنداي ءىستىڭ سانى 18 بولعان.
الماتىدا ادۆوكاتتار سانى سول كۇيى 1100 ادام بولىپ قالدى. ولارعا بار بولعانى 11-اق شاعىم تۇسكەنىمەن، بىرەۋىنە تارتىپتىك جازا قولدانىلدى. جەكە سوت شەشىمى بويىنشا تاعى ءبىر ادۆوكات ايىپتالىپ، سوگىس الدى، ءبىر ءىس زاڭ بۇزباعانىنا بايلانىستى توقتاتىلدى. سوت شەشىمىمەن ءۇش ادۆوكات ليسەنزياسىنان ايىرىلىپ، تاعى ەكى ادۆوكات باسقا سەبەپپەن جۇمىسىن توقتاتتى.
قۇقىقتىق كونسۋلتانتتارعا قاتىستى 75 شاعىم ءتۇسىپ، ونىڭ 3ء-ى عانا راستالدى. ەسكەرتۋ، سوگىس بەرىلىپ، ءبىر كونسۋلتانت پالاتادان شىعارىلدى. جەكە سوت شەشىمى بويىنشا تاعى ءۇش كونسۋلتانت جاۋاپكەرشىلىككە تارتىلىپ، بىرەۋى ۇيىمنىڭ مۇشەلىگىنەن شىعارىلدى.
باقىلاۋ جۇمىستارى حالىققا قىزمەت كورسەتۋ ورتالىقتارىنىڭ قىزمەتىن دە قامتىدى. الماتىدا «ازاماتتارعا ارنالعان ۇكىمەت» مەملەكەتتىك كورپوراسياسىنىڭ فيليالدارىنا بىرنەشە جوسپارلى جانە جوسپاردان تىس تەكسەرۋ جۇرگىزدى. ونىڭ بىرەۋى جىلجىمايتىن مۇلىك تىركەۋ سالاسىنا قاتىستى بولىپ، 106 بۇزۋشىلىق انىقتالدى. ماتەريالدار تىركەۋ ورگانىنا جىبەرىلىپ، كەمشىلىكتەردى جويىپ، بولاشاقتا مۇنداي جاعدايدىڭ قايتالانباۋىن قامتاماسىز ەتۋ تالاپ ەتىلدى. ازاماتتىق جاعداي اكتىلەرىن تىركەۋ بويىنشا دا وسىنداي تەكسەرۋ جۇرگىزىلدى. بۇل سالادا بۇزۋشىلىق از، بار بولعانى بەسەۋ.
جالپى العاندا، باقىلاۋ ورگاندارى قۇقىقتىق قىزمەتتەردىڭ ساپاسى مەن تىركەۋ راسىمدەرىن باقىلاۋدى كۇشەيتىپ جاتىر. ءار زاڭ بۇزۋشىلىققا ەسكەرتۋ مەن سوگىستەن بەرۋدەن باستاپ ليسەنزيادان ايىرۋعا دەيىنگى شارا قولدانىلادى. بۇل زاڭگەرلەرگە عانا ەمەس، قۇقىق سالاسىندا جۇمىس ىستەيتىن بارلىق ماماندارعا ەسكەرتۋ. قاي-قايسىسى بولسىن ەرەجەنى ساقتاپ، زاڭ شەڭبەرىندە ساپالى قىزمەت كورسەتۋى ءتيىس.