اتاپ ايتقاندا، بيىل 25 شاقىرىم جولدى رەكونسترۋكسيالاۋ جانە سالۋ جوسپارلانسا، 42 شاقىرىم جولعا كۇردەلى جوندەۋ جۇرگىزۋ كوزدەلىپ وتىر.
الماتى وبلىسىنداعى جوندەۋ جۇمىستارى جالپى ۇزىندىعى 454 شاقىرىمدى قۇرايتىن جەرگىلىكتى ماڭىزى بار جولدارعا جۇرگىزىلمەك، دەپ حابارلايدى Almaty-akshamy.kz
بۇدان وزگە، وڭىردەگى 258 شاقىرىم جولعا ورتاشا جوندەۋ جۇمىستارى ىسكە اسىرىلماق. ال اعىمدىق جوندەۋ جۇمىستارى 130 شاقىرىمدا جۇرگىزىلەدى.
سونداي-اق الماتى قالاسىنىڭ شەكاراسىنان ۇلكەن الماتى اينالما اۆتوموبيل جولىنا دەيىن سايىن، رىسقۇلوۆ، اباي جانە سولتۇستىك جارتىلاي اينالىم كوشەلەرىنىڭ قۇرىلىسى باستالدى. جوبانى ىسكە اسىرۋعا ۇلتتىق قوردان 8 ملرد. تەڭگە قاراستىرىلعان. قازىرگى ۋاقىتتا تاس جولدىڭ ءوسىن قالپىنا كەلتىرۋ جانە بەكىتۋ، توپىراق-وسىمدىك قاباتىن الۋ جانە جەر توسەمىن تەگىستەۋ بويىنشا جۇمىستار جۇرگىزىلۋدە.
بۇگىندە ءوڭىردىڭ تۋريستىك الەۋەتىن دامىتۋعا ەرەكشە كوڭىل بولىنۋدە. اسىرەسە، تۋريستىك باعىتتارداعى جولدار ۇلكەن باسىمدىققا يە. وسى ورايدا قازىرگى تاڭدا بالقاش كولىنە باراتىن 102 شاقىرىم كىرمە جولدى رەكونسترۋكسيالاۋ بويىنشا قۇرىلىس-مونتاجداۋ جۇمىستارى جۇرگىزىلىپ جاتىر. سونىمەن قاتار شارىن شاتقالىنا اپاراتىن جولدا ورتاشا جانە كۇردەلى جوندەۋ جۇمىستارى جۇرگىزىلۋدە. جۇمىستار تولىقتاي 2023 جىلى اياقتالماق.
ءبىر بۇل عانا ەمەس. بۇگىندە ۇزىندىعى 34 شاقىرىمدى قۇرايتىن «كوكپەكتى-كەگەن-تۇپ-جالاڭاش-ساتى-قۇرمەتتى-كولساي كولىنە كىرەبەرىس» كولىك جولىن كۇردەلى جوندەۋ جۇمىسى ىسكە اسىرىلۋدا. قازىرگى ۋاقىتتا اتالعان ۋچاسكەدە بارلىق قاجەتتى رەسۋرستار قاراستىرىلعان جانە جول-قۇرىلىس تەحنيكاسى جۇمىلدىرىلعان.
سونداي-اق رەسپۋبليكالىق ماڭىزى بار جولدار دا رەكونسترۋكسيالانۋدا. ماسەلەن، «قۇرتى-قاپشاعاي» اۆتوجول ۋچاسكەسى جاڭارتىلىپ، جول توسەمدەرىنىڭ قاباتتارىن ورناتۋ بويىنشا جۇمىستار جۇرگىزىلۋدە. جۇمىستاردى تولىق اياقتاۋ 2023 جىلعا جوسپارلانعان.
سونىمەن قاتار ۇزىندىعى 96 شاقىرىمدى قۇرايتىن «ۇزىناعاش-وتار» ۋچاسكەسىن رەكونسترۋكسيالاۋ جۇمىستارى دا جالعاسۋدا. قازىرگى ۋاقىتتا ۇزىندىعى 48 شاقىرىم ۋچاسكە بويىنشا قوزعالىس ەكى باعىتتا اشىلدى جانە اباتتاندىرۋ جۇمىستارى جۇرگىزىلىپ جاتىر. جوبانى تولىق اياقتاۋ 2024 جىلعا جوسپارلانۋدا.