الماتى قالاسىن كوركەيتۋگە باعىتتالعان «حالىق قاتىساتىن بيۋدجەت – 2025» جوباسىنا ءوتىنىم قابىلداۋ كەزەڭى اياقتالدى. قالانىڭ دامۋى – اكىمدىك باستامالارىمەن قاتار، حالىقتىڭ بەلسەندىلىگى مەن ۇسىنىسىنا دا تىكەلەي بايلانىستى. بۇل ءسوز بۇگىندە قۇر ۇران ەمەس، ناقتى ىسكە اينالدى. الماتىدا سوڭعى جىلدارى جۇزەگە اسىپ جاتقان «حالىق قاتىساتىن بيۋدجەت» جوباسى – سونىڭ دالەلى.
قالا اۋداندارىنان تۇسكەن ۇسىنىس سانى – 4 632. بۇل كورسەتكىش – شاھار تۇرعىندارى تۋعان قالاسىنىڭ كەلبەتىن جاقسارتۋعا بەي-جاي قارامايتىنىنىڭ ايعاعى دەسەك تە بولادى. 9 قىركۇيەكتە باستالعان ءوتىنىم قابىلداۋ كەزەڭىندە الماتىلىقتار اۋلالاردى اباتتاندىرۋ، جارىقتاندىرۋ، كوگالداندىرۋ، بالالار جانە سپورت الاڭدارىن سالۋ سەكىلدى ناقتى جوبالار ۇسىنعان.
جوباعا كەلىپ تۇسكەن بارلىق باستامالار ەندى ساراپشىلار كەڭەسىنىڭ قاراۋىنا بەرىلەدى. ولار ۇسىنىستاردى تەحنيكالىق تۇرعىدا ورىندالۋ مۇمكىندىگىنە، تيىمدىلىگى مەن ماڭىزدىلىعىنا قاراي باعالايدى. ودان كەيىن ىرىكتەلگەن جوبالار ونلاين داۋىس بەرۋگە شىعارىلادى. ەڭ كوپ داۋىس جيناعان باستامالار جەڭىمپاز اتانىپ، 2026 جىلى ىسكە اسىرىلا باستايدى.
بۇل جوبانىڭ باستى ماقساتى – قالا تۇرعىندارىنىڭ ءوز اۋدانىنىڭ دامۋىنا تىكەلەي قاتىسۋىنا مۇمكىندىك بەرۋ. تۇرعىندار ۇسىنىس بىلدىرەدى، جوبا دايىندالادى، ونلاين داۋىس بەرۋ ارقىلى تاڭداۋلى جوبا انىقتالادى. قالالىق اكىمدىك ولاردى جۇزەگە اسىرۋعا ناقتى قارجى بولەدى. ناتيجەسىندە ناقتى سۇرانىسقا ساي، قاجەتتى نىساندار مەن اباتتاندىرۋ جۇمىستارى اتقارىلادى.
قازىرگى تاڭدا قالادا اۋلالاردى كوگالداندىرۋ، قوعامدىق كەڭىستىكتەردى اباتتاندىرۋ، ارىق جۇيەلەرىن جوندەۋ، بالالار جانە سپورت الاڭدارىن ورناتۋ سىندى كوپتەگەن جوبالار وسى باستاما ارقىلى ىسكە اسىپ جاتىر.
· بوس الاڭ – ەندى بالالاردىڭ مەكەنى
بيىل مەدەۋ اۋدانىندا بوس جاتقان جەرگە جاڭادان بالالار الاڭقايى جانە سپورت الاڭى ورناتىلدى. بۇل – تۇرعىنداردىڭ تىكەلەي ءوتىنىشى بويىنشا جۇزەگە اسقان جوبا. بالالارعا ارنالعان ءقاۋىپسىز ويىن ەلەمەنتتەرى مەن ەرەسەكتەرگە ارنالعان جاتتىعۋ ترەناجەرلەرىنىڭ ورناتىلۋى – قوعامدىق كەڭىستىكتىڭ ءتيىمدى پايدالانىلۋىنىڭ ۇلگىسى.
· التىنسارين كوشەسىندەگى جاڭا سكۆەر
«حالىق قاتىساتىن بيۋدجەت» جوباسىنىڭ اياسىندا ىسكە اسقان تاعى ءبىر ماڭىزدى نىسان – 8ء-نشى شاعىن اۋداندا، التىنسارين كوشەسىنىڭ بويىنداع بيىل كۇزدە اشىلعان جاڭا سكۆەر. مۇندا جەرگە كەسپە تاس توسەلىپ، 27 زاماناۋي كوشە شامى ورناتىلدى، 180-نەن استام اعاش ەگىلدى، دەمالىس ءۇشىن ۇزىن ورىندىقتار قويىلدى. بۇل سكۆەر قالا ىشىندەگى تىنىش ءارى كوركەم دەمالىس ورنىنا اينالدى.
· قالاعا جاناشىرلىق – ورتاق ءىس
الماتىدا جۇزەگە اسىپ جاتقان «حالىق قاتىساتىن بيۋدجەت» – جاي جوبا ەمەس، قالالىق باسقارۋداعى جاڭا سەرپىن. حالىقتىڭ داۋىس بەرۋى ارقىلى ناقتى ماسەلەلەر شەشىمىن تاۋىپ، قالا مادەنيەتى مەن ينفراقۇرىلىمى جاڭارىپ كەلەدى. مۇنداي باستامالار – تەك اكىمدىك ەمەس، ءار تۇرعىننىڭ جاۋاپكەرشىلىگى مەن بەلسەندىلىگى ارقىلى جۇزەگە اساتىن يگىلىكتى شارۋا.
«الماتى دامۋ ورتالىعى» ۇسىنعان مالىمەتكە سۇيەنسەك، وڭتۇستىك استانا اۋداندارى ىشىندە جەتىسۋ مەن ناۋرىزباي اۋداندارىنىڭ تۇرعىندارى ەرەكشە بەلسەندىلىك تانىتقان. تۇرعىنداردىڭ بەلسەندىلىگى مەن يدەيالارى قالانىڭ ءومىر سۇرۋگە جايلى ورتاعا اينالۋىنا تىكەلەي اسەر ەتەدى.
«حالىق قاتىساتىن بيۋدجەت» – بۇل بيلىك پەن حالىق اراسىنداعى اشىق ديالوگتىڭ ناقتى كورىنىسى. قالا – ءبارىمىزدىڭ ءۇيىمىز. ونى كوركەيتۋ تۇرعىنداردىڭ بىرلەسكەن ىس-ارەكەتى پەن شىنايى ىنتا-ىقىلاسىنان باستالادى.
· باستاما كوتەرۋ شارتتارى
جوبا ەڭ اۋەلى تۇرعىنداردىڭ سۇرانىسىن وتەۋدى كوزدەيدى. ءبىراق ءبىر ۇسىنىس 92،3 ملن تەڭگەدەن اسپاۋى ءتيىس. قالانىڭ اۋلالارىن، كوشەلەرىن جانە اۋداندارىن اباتتاندىرۋ بويىنشا ۇسىنىستاردى كامەلەتكە تولعان قالا تۇرعىندارىنىڭ بارلىعى بەرە الادى.
سۋرەت: روزا راقىم قىزى
بيىل ۇلگەرمەي قالساڭىز، الداعى جىلدارى دا باستامامەن شىعۋعا بولادى. وتىنىمگە جوبانىڭ اتاۋى مەن سيپاتتاماسىن، ورنالاسقان جەرىنىڭ مەكەنجايىن، بولجامدى فوتوسۋرەتتەردى، سىزبانى نەمەسە ەسكيزدى، ۇسىنىس سمەتاسىن قوسا تاپسىرۋ قاجەت.
بايقاۋعا قاتىسۋ شارتتارى مەن ونىڭ جۇزەگە اسۋ بارىسىن budget.open-almaty.kz سايتىنان تانىسا الاسىز.