مەملەكەت باسشىسى قاسىم-جومارت توقايەۆ قازاقستان حالقى اسسامبلەياسىنىڭ XXXIV سەسسياسىنداعى «بىرەگەي بىرلىكتىڭ باياندى جولى» اتتى سوزىندە ءار ازاماتتىڭ كوكەيىندە تۇرۋى ءتيىس – ەل تۇتاستىعى، تاتۋلىق پەن ىنتىماق، بەرەكە مەن بىرلىك سياقتى – قوعام دامۋىنىڭ تۇعىرى بولىپ تابىلاتىن تاعدىرشەشتى ماسەلەگە قايىرىلا ءمان بەرگەن. قازىرگى الماعايىپ زاماندا ەلدىڭ ىشكى تىنىشتىعى مەن جۇدىرىقتاي جۇمىلعان رۋحاني تۇتاستىقتىڭ قۇنى كۇن سايىن قىمباتتاپ بارادى. سوندىقتان دا مەملەكەت باسشىسى وسىنى ءار قازاقستاندىقتىڭ بەرىك ەستە ۇستاپ، اينىمايتىن ءومىر سالتىنا اينالدىرۋى قاجەت ەكەندىگىن وقتىن-وقتىن قايتالاۋدان جالىققان ەمەس.
كەڭەس وكىمەتى بىزگە قازاقستان قوعامىن قۇرايتىن قاۋىمنىڭ ارتەكتىلىگىن مۇراعا قالدىردى. ولار تەگى عانا ەمەس، ءتىلى جاعىنان دا ەكى الۋان ەل بولدى. مىنە، وسىنداي ارتەكتى ورتانى ءبىر مەملەكەتتىك مۇددەگە ۇيىستىرىپ، ءبىرتۇتاس ۇلتتىق ماقساتقا باعىتتاپ سارا جولعا سالۋ ءارقاشاندا زور كۇش-جىگەردى، ساياسي سارا جولدى قاجەت ەتەتىنى بەلگىلى. پرەزيدەنتتىڭ بۇل ماسەلەنى ۇنەمى نازارىندا ۇستايتىنى دا سوندىقتان. بۇل ورايدا، مەملەكەتتىك ساياساتتىڭ التىن وزەگىن قۇرايتىن قازاق حالقىنىڭ سابىرلى، ساليقالى، سارابدال دانالىعى ەل تاۋەلسىزدىگىنىڭ التىن تۇعىرى بولىپ كەلە جاتقاندىعىن اتاپ ايتپاسقا بولمايدى. پرەزيدەنت وسى تاۋەلسىزدىك جىلدارى جەتكەن جەتىستىكتەردى، سونىڭ ىشىندە تىلدىك تەڭسىزدىكتە بولعان ولقىلىقتاردىڭ تولعان ورنىن پايىزدىق كورسەتكىشتەرمەن ورنەكتەدى. ءبىراق بۇعان توقمەيىلسۋگە ءالى ەرتە. ەڭ الدىمەن، وتىز جىلدان استام توزىمدىلىكپەن جۇرگىزىلىپ كەلە جاتقان تاۋقىمەتتى شارۋانىڭ بەرەكەسىن دە كوزدىڭ قاراشىعىنداي ساقتاي ءبىلۋىمىز قاجەت. وعان ءتونىپ تۇرعان ىشكى دە، سىرتقى دا قاۋىپ-قاتەر جوق ەمەس. ونداي جاعدايلاردىڭ قۇقىقتىق تۇرعىدان قاتاڭ جازالانىپ، ادىلەتتى تۇردە ايىپتالاتىنىن ەسكەرتەدى.
سونداي-اق، قاسىم-جومارت كەمەل ۇلى مەملەكەتتىك ءتىل ماسەلەسىمەن قوسا جاستار تاربيەسىنە دە ەرەكشە نازار اۋداردى. ونىڭ پىكىرىنشە، بولاشاق ۇرپاق تەك ءبىلىمدى عانا ەمەس، رۋحاني-مادەني تۇرعىدان دا بىلىكتى، ەلجاندى ازامات بولىپ قالىپتاسۋى ءتيىس. مەملەكەتتىك ءتىلدىڭ بىرىكتىرۋشى ءرولىن ارتتىرۋ – بارلىق ەتنوس وكىلدەرىنىڭ ورتاق مىندەتى ەكەنىن دە اتاپ كورسەتتى.
پرەزيدەنت ەلدەگى اقپاراتتىق قاۋىپسىزدىكتى ساقتاۋ، ارانداتۋشىلىق پەن جالعان اقپاراتتارعا قارسى تۇرۋدىڭ ماڭىزىن دا ايتتى. بۇل – قوعامدىق سانانى ۋىتتى اسەردەن ساقتاۋ ارقىلى بىرلىككە باستايتىن جول.
ءسوز بارىسىندا پرەزيدەنت قازىرگى زاماننىڭ جاڭا سىن-تەگەۋرىندەرىنە بەيىمدەلۋ قاجەتتىگىنە نازار اۋداردى. اسىرەسە، ەتنوسارالىق قارىم-قاتىناستاردا اشىقتىق پەن ادىلەتتىلىك قاعيدالارىن، ازاماتتاردىڭ قۇقىقتارى مەن بوستاندىقتارىن ساقتاۋ ماڭىزدى ەكەنى، ەتنوستاردىڭ الەۋمەتتىك ومىرگە تەڭ قاتىسۋى مەن ولاردىڭ مادەني ەرەكشەلىكتەرىن ساقتاۋ ارقىلى عانا ەلدە تۇراقتىلىق پەن سەنىمدى ورتا قالىپتاستىرۋعا بولاتىنىن باسا ايتتى. قازاقستان قوعامىنىڭ ءتاتۋ-تاتتى ءومىر ءسۇرۋى – تەك تاريحي ەرەكشەلىك ەمەس، سونىمەن بىرگە مەملەكەت جۇرگىزىپ وتىرعان سىندارلى ساياساتتىڭ دا ناتيجەسى. وسى ورايدا، مەملەكەت باسشىسى اسسامبلەيانى ەلدەگى تۇراقتىلىق پەن تاتۋلىقتى ساقتاۋ جولىنداعى جۇمىسىن جاڭعىرتۋ قاجەتتىگىن العا تارتتى.
بۇل تولعامدى ءسوزدى ەل بولاشاعىنا باعىتتالعان ناقتى وي-پىكىرلەر مەن تەرەڭ ساراپتامالارعا نەگىزدەلگەن تۇجىرىمدامالىق كوزقاراس دەپ قابىلداۋعا بولادى.