تۇزەۋ مەكەمەلەرىندەگى رەجيم جانە كۇزەت ءبولىمى باقىلاۋشىسىنىڭ ءار جۇمىس كۇنى قاربالاسپەن باستالادى. كۇن سايىن تەكسەرۋ پۋنكتىنەن 150 كەيدە 200 ادامنىڭ اكەلگەن سالەمدەمەلەرىن تەكسەرىپ وتكىزۋدىڭ وزىندىك قيىندىعى كوپ.
باقىلاۋشىنىڭ ەڭ باستى قارۋى – قىراعىلىق. نان مەن شۇجىقتى بىرنەشە جەردەن كەسىپ، جەمىس-جيدەكتەردى ورتاسىنان قاق ءبولىپ، قوراپتاعى ءشايدى باسقا ىدىسقا اۋدارىپ سالىپ، قالتاشاداعى ءشايدىڭ اربىرەۋىن اشىپ قاراپ جاتقان باقىلاۋشىنىڭ جۇمىسىنا تەك سىرتتان قاراپ تۇرۋ ءۇشىن دە شىدام كەرەك-اق. تۇتقىنداعى ادامدارعا اكەلگەن كەرەكتى زاتتاردىڭ، ازىق-تۇلىك، كيىم-كەشەكتىڭ قالتا-قۋىس، استارىنا دەيىن تەكسەرۋ كەزىندە باقىلاۋشىلار كەلۋشىلەردىڭ نەبىر ايلا-شارعىسىنا كۋا بولادى.
مىسالى، 1500-گە جۋىق تۇتقىن ۇستالاتىن الماتى قالاسىنداعى تەرگەۋ يزولياتورىندا جىل باسىنان بەرى ءتۇرلى تىيىم سالىنعان زاتتار انىقتالدى. ونىڭ ىشىندە جەتكىزۋ كەزىندە 4 ليتر سپيرتتىك ىشىمدىكتەر، 21 ۇيالى تەلەفون مەن 50 گرامم ەسىرتكى تەكتەس زاتتار بار. اسىرەسە، كوپ كەزدەسەتىنى – ۇيالى تەلەفوندار مەن sim-كارتالار. ءقازىر ۇيالى تەلەفونداردىڭ نەبىر شاعىن تۇرلەرى شىعىپ جاتىر. ادامنان ايلا ارتىلعان با، ونى تۇتقىندارعا جەتكىزۋ ءۇشىن تاماقتىڭ اراسىنا دا، اياق كيىمنىڭ ۇلتانىنا دا جاسىراتىندار بار. تىيىم سالىنعان زاتتاردى وتكىزۋ زاڭمەن جازالاناتىنى تۋرالى اۋىزشا ەسكەرتۋلەرگە دە، تەكسەرۋ ورنىنداعى ارنايى ستەندتە تۇرعانىنا دا قاراماستان تۇتقىنداردىڭ تۋىستارى مەن تانىستارى وسىنداي ايلا-شارعىعا بارادى.
سونداي-اق كۇندەلىكتى تەرگەۋ يزولياتورىنا ادۆوكاتتار مەن قوعامدىق قورعاۋشىلار دا كىرەدى. ولاردى فرونت-وفيستەن وتەر كەزدە تەكسەرەدى. وكىنىشكە وراي ادۆوكاتتار مەن قوعامدىق قورعاۋشىلاردان دا تىيىم سالىنعان زاتتار تابىلادى. مىسالى، جىل باسىنان بەرى ادۆوكات پەن قوعامدىق قورعاۋشىلاردان 450 000 استام اقشا مەن 2 ۇيالى تەلەفون الىپ كىرۋ كەزىندە تاركىلەندى. تىزە بەرسە مۇنداي فاكتىلەر كوپ، ال ءار فاكتىنىڭ ار جاعىندا باقىلاۋشىلاردىڭ قىراعى ەڭبەگى بار.
مىنە، باقىلاۋشىنىڭ تىنىمسىز ساعاتتار مەن مينۋتتاردان تۇراتىن ءبىر كۇنى وسىنداي قاربالاس ءارى جاۋاپتى جۇمىسقا تولى كۇن.
– باقىلاۋشىنىڭ جۇمىسى تۇستەن كەيىن تاعى دا قىزا تۇسەدى. قابىلداپ العان زاتتاردى ەندى سول ءتىزىم بويىنشا ءار كامەراداعى تۇتقىنعا تاپسىرۋ دا باقىلاۋشىنىڭ مىندەتىندە. ەگەر تەرگەۋ يزولياتورىندا مىڭنان اسا ادام جاتىر دەسەك، سونىڭ ىشىنەن وزىنە كەرەك ادامدى تاۋىپ الۋ دا جاۋاپتى جۇمىس. ارنايى كارتوچكا ارقىلى كامەرانى تاۋىپ كەلگەن سوڭ، تەرگەۋدەگى كۇدىكتىگە تاپسىرعان ادامنىڭ ءتىزىمى بويىنشا ساناپ تۇرىپ وتكىزىپ بەرەدى.
سالەمدەمەلەردى قابىلداۋدىڭ وسىنداي سۇزگىدەن وتكىزۋ جۇمىستارىن تۇسىنبەيتىن كەيبىر ادامدار «كەزەكتە ۇزاق تۇرامىز، بارلىق زاتتى نەسىنە تەكسەرەدى» دەپ رەنجىپ تە جاتادى. ال ول – ءبىزدىڭ جۇمىسىمىز. زاڭ مەن ءتارتىپ بارشاعا ورتاق، – دەيدى الماتى قالاسى بويىنشا قاج دەپارتامەنتىنىڭ رەجيم جانە قاداعالاۋ توبىنىڭ اسا ماڭىزدى ىستەر جونىندەگى اعا جەدەل ۋاكىلى
ادىلەت پودپولكوۆنيگى نۇرلان ابدۋللين.