قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى سۋ رەسۋرستارىن ۇنەمدى پايدالانۋعا ارنالعان يننوۆاسيالىق جوبانى ىسكە قوستى. ولاردىڭ «اۆتوماتتاندىرىلعان سۋعارۋ جۇيەسى» ستارتاپى وقۋ ورداسىندا وتكەن سالتاناتتى شارا بارىسىندا رەسمي تۇردە تانىستىرىلدى، دەپ حابارلايدى aqshamnews.kz
بۇل جوبا – QyzPU بازاسىندا ەكى جىلدان بەرى وتكىزىلىپ كەلە جاتقان Demoday «Startup Tomiris» بايقاۋىنىڭ جەمىسى. 2024 جىلى اتالعان كونكۋرستا ءى ورىندى يەلەنگەن ستارتاپتىڭ اۆتورلارى – فيزيكا، ماتەماتيكا جانە سيفرلىق تەحنولوگيالار ينستيتۋتىنىڭ 3-كۋرس ستۋدەنتتەرى دينارا بۋلكۋنبەك پەن ءامينا يمانوۆا.
ينفورماتيكا كافەدراسىنىڭ اعا وقىتۋشىسى ءارى جوبانىڭ عىلىمي جەتەكشىسى جۇلدىز بازايەۆا بۇل جۇيەنىڭ باستى ماقساتى – تۇراقتى دامۋ قاعيداتتارى اياسىندا ەكولوگيالىق جانە تەحنولوگيالىق ءتيىمدى شەشىم ۇسىنۋ ەكەنىن اتاپ ءوتتى. ال جوبا اۆتورلارى جۇيەنىڭ تەحنيكالىق ەرەكشەلىكتەرىمەن تانىستىرىپ، ونىڭ جۇمىس ىستەۋ الگوريتمدەرىن جان-جاقتى ءتۇسىندىردى.
اۆتوماتتاندىرىلعان قۇرىلعى بىرنەشە نەگىزگى كومپونەنتتەن تۇرادى: اۋا تەمپەراتۋراسى مەن ىلعالدىلىعىن ولشەيتىن سەنسور، توپىراق ىلعالدىلىعىنىڭ داچيگى، سۋ سورعىسى مەن سولەنويدتى كلاپاندار. جۇيە اۋا رايى مەن توپىراق جاعدايىنا قاراي دەربەس جۇمىس ىستەيدى، ال باسقارۋ ارنايى ازىرلەنگەن ءموبيلدى قوسىمشا ارقىلى جۇزەگە اسىرىلادى. قوسىمشا Android جانە iOS پلاتفورمالارىندا قولجەتىمدى. وندا ءوشىرىپ-قوسۋ، قولمەن جانە اۆتوماتتى رەجيمدەر قاراستىرىلعان.
«جۇيە تولىقتاي اۆتوماتتاندىرىلعان. ەگەر توپىراق قۇرعاپ كەتسە، سەنسورلار ارقىلى بۇل تۋرالى سيگنال ءتۇسىپ، سۋعارۋ پروسەسى وزدىگىنەن باستالادى. مۇنداي جۇيە اسىرەسە ۋاقىتى شەكتەۋلى ادامدار ءۇشىن وتە ءتيىمدى»، – دەيدى جوبا اۆتورلارى.
سۋعارۋ جۇيەسىمەن قاتار گۇلزارلاردى كوركەيتۋ جانە كليماتتىق جاعدايلارعا بەيىمدەلگەن سۋارۋ ءتارتىبى دە ەنگىزىلدى. بۇل باستاما تابيعاتتى قورعاۋ شارالارىنا ۇلەس قوسىپ قانا قويماي، ەكولوگيالىق مادەنيەتتى دامىتۋعا دا ىقپال ەتتى.
جوبانىڭ تاعى ءبىر ماڭىزدى جەتىستىگى – وعان اۆتورلىق قۇقىق كۋالىگىنىڭ الىنۋى. بۇل ستارتاپتىڭ يننوۆاسيالىق الەۋەتىن راستايتىن ماڭىزدى قادام.
ۋنيۆەرسيتەتتىڭ باسقارما ءتوراعاسى – رەكتورى گۇلميرا قاناي جوبانىڭ بولاشاعىنا سەنىم ءبىلدىرىپ، ونىڭ مەملەكەتتىك دەڭگەيدە كەڭىنەن قولدانىلاتىنىنا ءۇمىت ارتتى. سونىمەن قاتار، ول مۇنداي باستامالار ستۋدەنتتەردىڭ پراكتيكالىق داعدىلارىن نىعايتىپ، ولاردى ناقتى پروبلەمالاردى شەشۋگە باعىتتايتىنىن اتاپ ءوتتى..
.