الماتىنىڭ بەلسەندىلەرى بالالار مەن ايەلدەردىڭ قۇقىقتارىن قورعاۋدا
2022 جىلعى 25 قاراشا مەن 10 جەلتوقسان ارالىعىندا جىل سايىنعى حالىقارالىق «ايەلدەرگە قاتىستى زورلىق-زومبىلىقسىز 16 كۇن» اكسياسى اياسىندا «زورلىق-زومبىلىققا جول جوق!» رەسپۋبليكالىق اكسياسى وتۋدە.
بۇل تۋرالى وكق بريفينگىندە الماتى قالاسى اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ باس ينسپەكتورى-حاتشىسى گۇلنار ءامىروۆا ايتتى، دەپ حابارلايدى Almaty-akshamy.kz.
گەندەرلىك زورلىق-زومبىلىققا قارسى ناۋقان 1991 جىلى باستالعان جانە ونى قازاقستاندىق ايەلدەر قولدايدى.
«زورلىق-زومبىلىقسىز 16 كۇن» اكسياسى 7 مىڭنان استام ۇيىمنىڭ قاتىسۋىمەن 190-نان استام ەلدە جۇزەگە اسىرىلادى. بۇل ناۋقان 25 قاراشادا ايەلدەرگە قاتىستى زورلىق-زومبىلىقتى جويۋدىڭ حالىقارالىق كۇنى باستالدى جانە 10 جەلتوقساندا - ادام قۇقىقتارى كۇنى اياقتالادى»، - دەدى گ.ءامىروۆا.
ناۋقاندى قولعا العان كەزدە ەكى ماقسات قويىلدى: گەندەرلىك زورلىق-زومبىلىق تۋرالى حاباردار بولۋدى ارتتىرۋ جانە قوعامنىڭ نازارىن وسى ماسەلەگە اۋدارۋ.
گۇلنار ءامىروۆا مەملەكەت باسشىسى قاسىم-جومارت توقايەۆتىڭ قىركۇيەكتەگى جولداۋىندا تۇرمىستىق زورلىق-زومبىلىقتى ەلەمەۋگە بولمايتىنىن اتاپ وتكەن ءسوزىن ەسكە الدى.
«پرەزيدەنتىمىز: «وتباسىن بۇزعاندار جازالانباسا، ولار بۇدان دا اۋىر كۇيزەلىسكە تۇسەدى. ال زارداپ شەككەندەر مۇلدەم قورعانسىز. مۇنداي ارەكەتتەر ءۇشىن جازانى كۇشەيتەتىن كەز كەلدى دەپ ويلايمىن. زارداپ شەككەندەر بىرەۋدىڭ سوزىنەن نەمەسە قىسىمىنان قورىقپاۋى كەرەك»، - دەپ كەلتىردى سپيكەر.
گۇلنار ءامىروۆا وتباسىندا مەيىرىمگە تولى قارىم-قاتىناستى ادەتكە اينالدىرۋ كەرەكتىگىن اتاپ ءوتتى. بالالار تۋىلعاننان باستاپ وتباسىندا ءوزارا تۇسىنىستىكتى كورىپ وسۋلەرى كەرەك.
الماتى قالاسى قوعامدىق كەڭەسىنىڭ مۇشەسى، الماتى قالاسى اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ مۇشەسى، ىشكى ىستەر ورگاندارىنىڭ ارداگەرى ايگۇل شوپشەكبايەۆا تۇرمىستىق زورلىق-زومبىلىق قۇرباندارىنا دەگەن كوزقاراستى وزگەرتەتىن كەز كەلدى دەپ ەسەپتەيدى.
«ءبىزدىڭ قوعامدا زورلىق-زومبىلىق قالىپتى جاعداي بولىپ سانالادى جانە ءالى كۇنگە دەيىن تىڭداماعانى ءۇشىن بالالاردى ۇرىپ-سوعۋ ارقىلى جازالاۋ كەرەك دەگەن پىكىر بار. بيىك مىنبەلەردەن ايەل تىنىش، ءارى باعىنىشتى بولۋى كەرەك دەيدى. بالالى ايەلدەر قورعانسىز كەلەدى، سوندىقتان پرەزيدەنتىمىز بۇل ماسەلەگە ۇلكەن كوڭىل ءبولىپ وتىر»، – دەيدى ا.شوپشەكبايەۆا.
سپيكەر قالادا زارداپ شەككەندەرگە، ونىڭ ىشىندە پسيحولوگيالىق كومەك كورسەتىلەتىن باس پانالايتىن ورىنداردىڭ بار ەكەنىن ايتتى. تۇرمىستىق زورلىق-زومبىلىقتىڭ كۋاسى بولعان بالالار بار. ول تۇرمىستا زورلىق-زومبىلىق كورگەن ايەلدەرگە ولارعا كۇش كورسەتكەندەردىڭ جاۋاپكەرشىلىككە تارتىلۋى ءۇشىن دەر كەزىندە پوليسياعا حابارلاسۋدى سۇرادى.