1 اي بۇرىن جوعالعان ساۋراندىق كەلىنشەككە حالىقارالىق ىزدەۋ جاريالاندى، دەپ حابارلايدى Almaty-akshamy.kz قازاقپارات-قا سىلتەمە جاساپ.
تۇركىستان وبلىسى، ساۋران اۋداندىق پوليسيا بولىمىنە ارىزدانعان تۇرعىن 22 ناۋرىز كۇنى 13:30 شاماسىندا اۋرۋحاناعا كەتكەن قىزى نازىم الداشتىڭ قايتا ورالماعانىن كورسەتكەن. ۇيدەن شىققاندا ونىڭ ۇستىندە اشىق قىزعىش ءتۇستى كۇرتەشە، اق ءتۇستى سپورتتىق شالبار، اياعىندا قارا ءتۇستى اياق-كيىم بولعان. جاس كەلىنشەكتىڭ جەكە باسى مەن ءتۇر-تۇلعاسى بويىنشا مالىمەتتەر سۋرەتىمەن بىرگە بارلىق اۋماققا جولدانعان. تۇركىستاندىق پوليسەيلەر ونىڭ بارۋى مۇمكىن ايماقتاردى، ءاربىر ورىندى ءجىتى تەكسەرىپ، ىزدەۋ جۇمىستارىن كۇشەيتتى. سونداي-اق، ءتارتىپ ساقشىلارى كەلىپ تۇسكەن اقپاراتتار بويىنشا جاڭاقورعان اۋدانى، تاراز، شىمكەنت، الماتى قالالارىنا ىسساپارمەن شىعىپ، ىزدەستىرۋدە. سونداي-اق، حالىقارالىق ىزدەۋ جاريالاندى. بۇگىندە بۇل جۇمىستارعا ەرىكتىلەر دە تارتىلىپ وتىر. «نازىم باعداتقىزىن امان-ەسەن تاۋىپ، ونى وتباسىنا قايتارۋ ءۇشىن تانيتىن، نە بولماسا كورگەن-بىلگەن ادامدار بولسا تەز ارادا پوليسياعا حابارلاسۋلارىن سۇرايمىز. ارنايى بەلگىلەرى: بويى 165-168 سم، ورتا دەنەلى، مويىن تۇسىندا قالى بار. ىزدەۋ جاريالانعان كەلىنشەك تۋرالى قانداي دا ءبىر اقپارات بولسا، ساۋران اپب-نىڭ كەزەكشى بولىمىنە 8 725 33 5 86 50، 8 747 008 74 80 نەمەسە پوليسيانىڭ 102 نومىرىنە حابارلاسىڭىزدار»،- دەلىنگەن تۇركىستان وبلىسى پوليسيا دەپارتامەنتىنىڭ باسپا ءسوز قىزمەتى تاراتقان حابارلامادا.