ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ ەلىمىزدە بەنزين مەن ديزەل وتىنى باعاسىنىڭ ءوسۋى ازىق-تۇلىك قۇنىنا اسەر ەتۋى ماسەلەسىنە قاتىستى سۇراققا جاۋاپ بەردى، دەپ حابارلايدى Almaty-akshamy.kz.
ايتا كەتەيىك، قازاقستاندا بەنزين مەن ديزەل وتىنىنىڭ باعاسى وسەدى. وسى ورايدا ءتيىستى بۇيرىقتىڭ جوباسى بۇگىن جاريالانادى.
«جانارماي باعاسىنىڭ ينفلياسياعا ىقپالى ماسەلەسىنە توقتالساق، ءبىز باعانى ەكى ەسە كوتەرىپ جاتقان جوقپىز. ءبىز بەنزيندى (اي-92 جانە اي-93) 11 پايىزعا، ديزەلدى 20 پايىزعا كوتەرىپ جاتىرمىز. مەنىڭ ويىمشا، جانار-جاعارماي باعاسىنىڭ ءوسۋى تاۋار قۇنىنا قوساتىن ۇلەسى شىن مانىندە اسىرا كورسەتىلىپ وتىر. سەبەبى 2021 جىلعى جانە 2022 جىلعى ستاتيستيكانى قاراساق، جانارماي باعاسى وزگەرگەن جوق. ءبىراق وسى ۋاقىت ارالىعىندا تاۋار باعاسىنا باسقا فاكتورلار اسەر ەتتى»، - دەدى ب. اقشولاقوۆ ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ونىڭ پايىمىنشا، تاۋار باعاسىنا قاتىستى ەلەۋلى ءوسىم بولمايدى.
«اتاپ ايتقاندا، بۇل باعىتتا ءتيىستى قاداعالاۋ كەرەك. ارينە، قانداي دا ءبىر ءوسىم بولادى. ءبىراق مۇنىڭ ءبارى جوسپارلانعان ينفلياسيا شەگىندە بولادى دەپ ويلايمىن»، - دەدى ءمينيستردىڭ مىندەتىن اتقارۋشى.
ءمينيستردىڭ سوزىنە قاراعاندا، تاكسي قىزمەتى قىمباتتاۋى مۇمكىن.