بۇل تۋرالى ق ر ەنەرگەتيكا ءمينيسترى بولات اقشولاقوۆ ورتالىق كوممۋنيكاسيالار قىزمەتى الاڭىندا وتكەن بريفينگتكە ايتتى، دەپ حابارلايدى Almaty-akshamy.kz.
ەنەرگەتيكا ءمينيسترى اتاپ وتكەندەي، وتكەن جىلى ديزەل وتىنىن شىعارۋ بويىنشا رەكوردتى كورسەتكىش – 5،2 ملن تونناعا جەتسەك تە، قازىرگى جاعدايدا ەلىمىزدىڭ ءبىرقاتار وڭىرلەرىندە ديزەل تاپشىلىعى بار. 350 مىڭ توننا كولەمىندەگى دەفيسيتتى (قىسقى دت قوسپاعاندا) قىمبات باعاداعى يمپورتتىق وتىنمەن جابۋعا ءماجبۇر بولدىق.
وسى ورايدا، ەكونوميكاعا ماڭىزدى ونەركاسىپ سەكتورى بولىپ سانالاتىن تاۋ-كەن مەتتاللۋرگيا كەشەنى جانە تەمىر جول سالالارىنىڭ تۇتىنۋ كولەمى سول قالپىندا قالدى، ياعني وسكەن جوق.
«قازاقستاندا ديزەل وتىنى تاپشىلىعىنىڭ باستى سەبەبى - باعاداعى ديسپروپورسيا. وتاندىق وتىن باعاسى كورشى ەلدەرمەن سالىستىرعاندا ايتارلىقتاي ارزان. قازاقستان – الەمدەگى جانارمايى ارزان ون ەلدىڭ قاتارىندا. مىسالى، رەسەيدە ديزەل باعاسى ورتاشا ەسەپپەن ليترىنە 345 تەڭگە، بىزدەگى نارىق باعاسىنان 45%-عا قىمبات. قىرعىزستانداعى باعا 64%-عا جوعارى، ياعني ليترىنە 390 تەڭگە، وزبەكستانداعى باعا بىزبەن سالىستىرعاندا ەكى ەسەگە قىمبات - ليترىنە 480 تەڭگە، باعامىزداعى ايىرماشىلىق - 101 پايىز»، - دەدى مينيستر.
قازاقستاندىق ديزەل وتىنىن ءتۇرلى جولداردى پايدالانىپ، شەتەلگە ساتۋدان تۇسەتىن پايدا 50%-دان 120 %-عا دەيىن جەتەدى ەكەن، جالپى پايدا جىلىنا شامامەن 140 ملن اقش دوللارىن قۇرايدى.