تەك وتكەن جىلدىڭ وزىندە جۇكتى ايەلدەر اراسىندا كوروناۆيرۋس ءولىمى ءۇش ەسە وسكەن.
قازاقستاندىق اكۋشەر-گينەكولوگ، رەپرودۋكتولوگ، عالىم، وقىتۋشى، قوعام قايراتكەرى، مەديسينا عىلىمدارىنىڭ دوكتورى، پروفەسسور، ق ر ۇعا اكادەميگى، رمات اكادەميگى، قازاقستان رەپرودۋكتيۆتى مەديسينا قاۋىمداستىعىنىڭ پرەزيدەنتى ۆياچەسلاۆ نوتانوۆيچ لوكشين جۇكتى ايەلدەردە كوروناۆيرۋس قالاي جۇرەتىنى جانە، ەگەر ايەل جۇكتىلىككە دەيىن ەگىلمەسە، نە ىستەۋ كەرەكتىگى تۋرالى سۇراقتارعا جاۋاپ بەردى، دەپ حابارلايدى Almaty-akshamy.kz.
رەپرودۋكتولوگتىڭ ايتۋىنشا، وتكەن جىلى جۇكتى ايەلدەردىڭ كوپشىلىگى كوۆيدتىڭ سيمپتومسىز تۇرىمەن اۋىرعان، ءبىراق ءبىزدىڭ ەلگە «دەلتا» شتامىنىڭ كەلۋىمەن جاعداي وزگەردى: اۋرۋ ءقازىر سيمپتومسىز تۇردە تەز جۇرەدى. جەتىلمەي قالعان جۇكتىلىك، مەرزىمىنەن بۇرىن بوسانۋ، جاساندى تۇسىك تۇرىندە اسقىنۋلار بار. كەيدە اۋرۋ ايەلدىڭ ولىمىمەن اياقتالادى.
«ءبىز ايەلدەردەن ايىرىلىپ جاتىرمىز»، - دەپ اشىنا ايتتى ۆياچەسلاۆ لوكشين.
ول جۇكتى ايەلدەردە كوروناۆيرۋستى ەمدەۋدىڭ قيىندىقتارىن اتاپ ءوتتى، سەبەبى ولارعا ەمدەۋگە قاجەتتى بارلىق دارى-دارمەكتەردى بەرۋ ءاردايىم مۇمكىن ەمەس. سوندىقتان بارلىق ەلدەردىڭ دارىگەرلەرى كوروناۆيرۋسقا قارسى ۆاكسينا العانعاننان كەيىن عانا جۇكتىلىكتى جوسپارلاۋ كەرەك دەپ سانايدى.
ەگەر دە جۇكتىلىككە دەيىن ۆاكسينا الىپ ۇلگەرمەگەن بولسا، وندا ونى جۇكتىلىك كەزىندە جاساي الادى، ويتكەنى بارلىق ۆاكسينالاردى، سونىڭ ىشىندە «سپۋتنيك V» پرەپاراتتارىن وندىرۋشىلەر قارسى كورسەتىلىم قاتارىنان جۇكتىلىك كەزەڭىن الىپ تاستادى.
«اقش، كانادا جانە يزرايل سياقتى دامىعان ەلدەر بىرنەشە ايدان بەرى جۇكتى پاسيەنتتەردى كوۆيدكە قارسى ۆاكسيناسيالاۋدا. ءبىزدىڭ ەلگە Pfizer ۆاكسيناسىنىڭ جەتۋىن كۇتىپ وتىرمىز، ونىمەن جۇكتى ايەلدەردى جانە ءتىپتى بالالاردى ەگۋدى باستايمىز»، – دەيدى مامان.
وتكەن جىلدىڭ جازىندا كوۆيدتىڭ ءورشۋى ءبىزدىڭ دەنساۋلىق ساقتاۋ جۇيەمىزدى ەسەڭگىرەتتى، سوندىقتان كوپتەگەن ايەل اۋرۋحاناعا جاتقىزۋدا كەدەرگىلەرگە ۇشىرادى، ەمدەلۋگە كەشىگىپ كەلدى، كوروناۆيرۋس جۇقتىرۋدان قورقىپ، كونسۋلتاسيالارعا بارمادى. وسىدان كەيىن جۇكتى ايەلدەر اراسىنداعى ءولىم-جىتىم جانە جۇكتىلىكتىڭ ءارتۇرلى اسقىنۋلارى ارتتى. سۇحبات بارىسىندا دارىگەر ۆاكسينانى قولداعانى ءۇشىن وعان الەۋمەتتىك جەلىلەردە اشۋلى پىكىرلەر ءجيى جازىلاتىنىن ايتتى.
«ەگەر بۇل ادامدار «قىزىل» ايماققا بارسا، ولار: وسى قورقىنىشتى ينفەكسيادان ءوزىڭىزدى قورعاۋعا نەمەسە كەم دەگەندە اۋرۋدى جەڭىل تۇردە وتكىزۋگە مۇمكىندىك بولسا، ونى مىندەتتى تۇردە قولدانۋىڭىز كەرەك دەگەن ءبىر قاراپايىم نارسەنى تۇسىنەتىن ەدى»، - دەيدى اكۋشەر-گينەكولوگ.
ارينە، جۇكتى ايەل توعىز اي بويى ەشكىممەن سويلەسپەۋى مۇمكىن، ۇيدەن ەشقايدا شىقپاۋى مۇمكىن، تەك مۇنداي جاعدايدا ونىڭ ۇيىندەگى بارلىق ادامدار ۆاكسينالانۋى كەرەك. ءبىراق، لوكشيننىڭ پىكىرىنشە، بۇل ەكىتالاي.
«قازىرگى ايەلدەر الەۋمەتتىك بەلسەندى، كوپتەگەن اداممەن ارالاسۋعا داعدىلانعان. سوندىقتان ءوز قاۋىپسىزدىگى ءۇشىن ولارعا ۆاكسينا الۋ قاجەت»، – دەپ قورىتىندىلادى ساراپشى.