باس سانيتار سوڭعى قاۋلىسىنداعى وقۋشىلاردى وقىتۋعا قاتىستى تارماقتى ءتۇسىندىردى.
سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى، الماتى قالاسىنىڭ باس سانيتار دارىگەرى جانداربەك بەكشين الماتىداعى وقۋشىلار اتا-انالارىنىڭ ءوتىنىشى بويىنشا ونلاين وقي الادى دەپ مالىمدەدى، دەپ حابارلايدى Almaty-akshamy.kz.
جانداربەك بەكشين ءوزىنىڭ Instagram-پاراقشاسىنداعى تىكەلەي ەفير بارىسىندا سوڭعى قاۋلىسىنداعى وقۋشىلاردى وقىتۋعا قاتىستى تارماقتى ءتۇسىندىردى. باس سانيتاردىڭ ايتۋىنشا، وقۋشىلاردىڭ نەگىزگى بولىگى سانيتارلىق شارالاردى ساقتاي وتىرىپ، ءداستۇرلى فورماتتا – مەكتەپكە بارىپ وقيتىن بولادى. بۇل رەتتە اتا-انالاردىڭ ءوتىنىشى بويىنشا قاشىقتان وقىتۋ تۋرالى تارماق كوزدەلگەن.
«تىنىس الۋ ورگاندارىندا سوزىلمالى اۋرۋلارى بار بالالار بار، ولار ءۇشىن ءبىز ونلاين وقىتۋدى قاراستىردىق. سونىمەن قاتار كەيبىر اتا-انالار ساۋ بالالارىنا دا ونلاين رەجيمىندە وقۋعا مۇمكىندىك بەرۋدى سۇرايدى. ءبىز ودان باس تارتا المايمىز جانە سوڭعى قاۋلىدا اتا -انالاردىڭ ءوتىنىشى بويىنشا ونلاين وقۋ مۇمكىندىگىن قاراستىردىق»، – دەدى جانداربەك بەكشين.
ەستەرىڭىزگە سالا كەتەيىك، الماتىنىڭ باس سانيتار دارىگەرىنىڭ سوڭعى قاۋلىسى 16 تامىزدا قابىلدانعان بولاتىن. جاڭا قاۋلى بويىنشا، نىساندارداعى كارانتين مەن دەمالىس كۇندەرى جۇمىس ىستەۋگە تىيىم سالۋ 31 تامىزعا دەيىن ۇزارتىلعان.