قازاقستاندىق جازۋشى بەيبىت سارىباي سيدنەي وليمپياداسىنىڭ چەمپيونى بەكزات ساتتارحانوۆ تۋرالى شىعارماسىن اياقتاعانىن مالىمدەدى، دەپ حابارلايدى اlmaty-akshamy.kz.
قالامگەر بۇل تۋىندىسىنا بوكسشىنىڭ رينگتەن تىس ءومىرىن ارقاۋ ەتكەن.
«ءبىراز ۋاقىتتان بەكزات ساتتارحانوۆتىڭ شارشى الاڭنان تىس ءومىرى تۋرالى جازىپ جۇرگەن شىعارمانىڭ نۇكتەسىن قويدىم. اياقتاعان بەتتە بەكزات سەيىلحان ۇلىنىڭ رۋحىنا ارناپ «فاتيحا» مەن «ىقىلاستى» وقىدىم. بايان حاسانوۆا دەگەن مىقتى رەداكتوردىڭ قولىنا تاپسىردىم. جاقسى جازدىم دەپ سەنىمدى ايتۋ قيىن عوي، جاقسى كورىپ جازدىم... شىعارما تۋرالى، جازىلۋى تۋراسىندا كەيىنىرەك كەڭىرەك ايتارمىز. بۇيىرسا كىتاپ بولىپ شىعادى»، - دەپ جازدى بەيبىت سارىباي الەۋمەتتىك جەلىدە.
ازىرگە شىعارمانىڭ ناقتى قاي ۋاقىتتا شىعاتىنى بەلگىسىز.
ەستە بولسا، 20 جاسىندا وليمپيادا چەمپيونى اتانعان بەكزات ساتتارحانوۆ تۋرالى بۇعان دەيىن «بەكزات» اتتى كوركەم فيلم دە تۇسىرىلگەن.
تۇركىستان قالاسىندا تۋعان سپورتشى بوكسپەن 5 جىل اينالىستى. وسى ۋاقىت ارالىعىندا ول جاستار اراسىندا ەل چەمپيوناتىندا توپ جارىپ، 1998 جىلى ارگەنتينادا وتكەن الەم چەمپيوناتىنىڭ كۇمىس جۇلدەسىنە يە بولدى. ال ەرەسەكتەر اراسىندا 1999 جىلى تاشكەنتتە ازيا بىرىنشىلىگىنىڭ فينالىنا شىعىپ، ەكىنشى ورىنعا تۇراقتادى. بۇل سىندا مارقۇم بوكسشى سيدنەي وليمپياداسىنىڭ جولداماسىن يەلەنگەن بولاتىن.
وكىنىشكە قاراي، سيدنەي وليمپياداسىندا توپ جارعان بوكسشى ارادا تۋرا ءۇش اي ۋاقىت وتكەندە جول اپاتىنان قازا تاپتى.