اكىمدىكتەر تۇرعىن ءۇي سەكتورىن، جاتاقحانالار مەن حوستەلدەردى ارالاپ، رەيد جۇرگىزەدى، دەپ حابارلايدى aqshamnews.kz
پرەمەر-مينيستر ولجاس بەكتەنوۆ تۇركىستان وبلىسىنىڭ جەتىساي اۋدانى العاباس اۋىلىندا ون ەكى ادام اجال قۇشقان ورتتەن كەيىن مينيسترلەر مەن اكىمدەرگە بىرنەشە تاپسىرما بەردى.
«ارىپتەستەر، كەشە تۇركىستان وبلىسىنىڭ العاباس اۋىلىندا قايعىلى جاعداي ورىن العانىن بىلەسىزدەر. ۇكىمەتتىڭ اتىنان قازا تاپقانداردىڭ تۋعان-تۋىستارى مەن جاقىندارىنا قايعىرىپ كوڭىل ايتامىن. مەملەكەت باسشىسىنىڭ تاپسىرماسىمەن ءورتتىڭ سەبەپتەرىن انىقتاۋ ءۇشىن ۇكىمەتتىك كوميسسيا قۇرىلىپ، جۇمىس ىستەپ جاتىر. زارداپ شەككەندەرگە جانە قازا تاپقانداردىڭ وتباسىلارىنا بارلىق قاجەتتى كومەك، ونىڭ ىشىندە ماتەريالدىق جانە مەديسينالىق كومەك كورسەتىلەدى»، - دەدى بەكتەنوۆ ۇكىمەت وتىرىسىندا.
پرەمەر-مينيستر جىلۋ بەرۋ ماۋسىمى باستالعالى بەرى تۇرعىن ءۇي سەكتورىندا ءورت وقيعالارى ءوسىپ بارا جاتقانىنا نازار اۋداردى.
«ءبىز بۇل ماسەلەنى قازان ايىندا ۇكىمەت وتىرىسىندا قارادىق. الايدا جاعدايدىڭ جاقسارعانىن ازىرگە كورىپ وتىرعان جوقپىز. سوندىقتان الدىن الۋ جانە ءتۇسىندىرۋ جۇمىستارىن كۇشەيتۋ قاجەت. توتەنشە جاعدايلار مينيسترلىگىنە ءورتتى بولدىرماۋ، ادامداردىڭ ءومىرىن ساقتاۋ ماسەلەلەرى بويىنشا ورتالىق جانە جەرگىلىكتى مەملەكەتتىك ورگانداردىڭ جۇمىسىن ءتيىستى دەڭگەيدە ۇيلەستىرۋدى قامتاماسىز ەتۋدى تاپسىرامىن. ءوڭىر اكىمدىكتەرىمەن جانە ىشكى ىستەر مينيسترلىگىمەن بىرلەسىپ، تۇرعىن ءۇي سەكتورىن، اسىرەسە جاتاقحانالار مەن حوستەلدەردى، حالىقتىڭ الەۋمەتتىك وسال توپتارىنىڭ ۇيلەرىن ارالاپ، رەيدتەر جۇرگىزۋ قاجەت. مادەنيەت مينيسترلىگى مەن اكىمدىكتەر بارلىق ماسس-مەديا مەن الەۋمەتتىك جەلىلەردە ءتۇسىندىرۋ جۇمىستارىن جانداندىرسىن. ءوڭىر اكىمدىكتەرى گاز جابدىقتارىن ءقاۋىپسىز پايدالانۋعا باعىتتالعان الدىن الۋ شارالارىن جۇرگىزۋ بويىنشا گاز-تەحنيكالىق ينسپەكسيانىڭ جۇمىسىن كۇشەيتسىن»، - دەپ تاپسىردى ۇكىمەت باسشىسى.