بازالىق زەينەتاقى قالاي تاعايىندالادى؟

جىل باسىنان بەرى قازاقستاندىقتارعا 1،5 ترلن تەڭگەدەن استام سوماعا زەينەتاقى تولەندى، دەپ حابارلايدى almaty-akshamy.kz

2021 جىلدىڭ قاڭتار-شىلدە ايلارىندا رەسپۋبليكالىق بيۋدجەتتەن بازالىق زەينەتاقى تولەۋگە 478، 9 ملرد تەڭگەدەن استام قارجى، ىنتىماقتى زەينەتاقى تولەمدەرىنە 1 083 ملرد تەڭگە باعىتتالدى.

 2021 جىلدىڭ شىلدە ايىندا رەسپۋبليكالىق بيۋدجەتتەن زەينەتاقى تولەمدەرىنە 222،2 ملرد تەڭگە، ونىڭ ىشىندە بازالىق زەينەتاقى تولەۋگە 68،1 ملرد تەڭگە، ىنتىماقتى زەينەتاقى تولەۋگە 154،1ملرد تەڭگە ءبولىندى.

2021 جىلدىڭ 1 تامىزىنداعى جاعداي بويىنشا، زەينەتكەرلەر سانى 2 ملن 238 مىڭ ادامدى قۇرايدى. زەينەتاقى تولەمدەرىنىڭ ورتاشا مولشەرى (ونىڭ ىشىندە بازالىق زەينەتاقىنى قوسقاندا)، 2021 جىلدىڭ 1 تامىزىنداعى جاعداي بويىنشا، 99 921 تەڭگەنى قۇرادى.

ەسكە سالايىق، 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى ءار الۋشىعا ونىڭ زەينەتاقى جۇيەسىندەگى تاجىريبەسىن ەسكەرە وتىرىپ، جەكە تاعايىندالادى.

بۇل رەتتە زەينەتاقى جۇيەسىندەگى ەڭبەك وتىلىنە، 1998 جىلعى 1 قاڭتارداعى جاعداي بويىنشا، ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر قوسىلادى.

سونىمەن، ەگەر زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولسا، سونداي-اق ەگەر مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى، سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى، ەگەر ءسىز 20 جىل قاتىسساڭىز، بازالىق زەينەتاقى كۇنكورىس دەڭگەيى قۇنىنىڭ 74%-ىن، 30 جىلدا كۇنكورىس قۇنىنىڭ 94%-ىن قۇرايدى. 33 جانە ودان دا كوپ جىل جۇمىس ءوتىلى بولسا، كۇنكورىس دەڭگەيىنىڭ 100%-ى مولشەرىندە جوعارى بەلگىلەنەدى.

ەگەر ءبىر اي ىشىندە ءبىرىڭعاي جيناقتاۋشى زەينەتاقى قورىنا مزج بىرنەشە رەت جاسالسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى. وسىلايشا، مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا، زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.

ءوز كەزەگىندە، جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدە الىنعان ورتاشا ايلىق تابىسقا بايلانىستى بولادى.