ساناۋلى ساعاتتاردان كەيىن قاسيەتتى ءقادىر ءتۇنى باستالادى.
قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى بارشا مۇسىلماندى ءقادىر تۇنىمەن قۇتتىقتادى، دەپ حابارلايدى Almaty-akshamy.kz
بيىل مىڭ ايدان دا قايىرلى ءقادىر ءتۇنى 17 ساۋىردەن 18 ساۋىرگە قاراعان تۇنگە ءتۇسىپ تۇر. ياعني بۇگىن كۇن باتقان ۋاقىتتان باستاپ ءقادىر ءتۇنى كىرەدى.
ءمۇفتياتتىڭ اقپاراتىنشا، قاسيەتتى ءتۇنى استانا مەن الماتىدا بارلىق مەشىت جۇمىس ىستەيدى.
اللا تاعالا قۇراندا: "ءبىز شىنىندا، قۇراندى ءقادىر تۇنىندە تۇسىردىك. ءقادىر ءتۇنىنىڭ نە ەكەنىن بىلەسىڭ بە؟ ءقادىر ءتۇنى (قاسيەت جانە ساۋاپ جاعىنان) مىڭ ايدان دا قايىرلى. سول تۇندە پەرىشتىلەر جانە جابىرەيىل اللانىڭ امىرىمەن (جەر بەتىنە اللا تاعدىر ەتكەن) بارلىق ىستەردى اتقارۋ ءۇشىن تۇسەدى. سول ءبىر ءتۇن، اعارىپ تاڭ اتقانعا دەيىن اماندىق-تىنىشتىق ءتۇنى بولادى" دەپ باياندايدى.
"راسىندا، رامازان ايىنىڭ قاسيەتتى بولۋىنىڭ ۇلى ەرەكشەلىكتەرىنىڭ ءبىرى – ءقادىر تۇنىندە تاعدىردىڭ جازىلۋى. ال ءقادىر ءتۇنىنىڭ قاسيەتتى بولۋىنىڭ ءمانى – ادامزات بالاسىن ەكى دۇنيە باقىتىنا جەتەلەۋشى قاسيەتتى كىتابىمىز قۇراننىڭ ءتۇسۋى. بۇعان تۇتاستاي وسى قاسيەتتى تۇنگە قاتىستى باياندالعان "ءقادىر" سۇرەسى دالەل بولادى"، - دەيدى باس ءمۇفتي قۇتتىقتاۋىندا.
ونىڭ ايتۋىنشا، ءقادىر ءتۇنى ناماز بەن قۇران وقۋدىڭ ساۋابى مول. سونىمەن قاتار اللادان كوبىرەك كەشىرىم سۇراپ، دۇعا جاساۋ كەرەك.
سونداي-اق قاسيەتتى ءتۇنى "اللا، راسىندا، سەن كەشىرىمدىسىڭ جانە كەشىرگەندى جاقسى كورەسىڭ. مەنى كەشىرە كورشى" دەپ دۇعا تىلەگەن ابزال. حاديستەردىڭ بىرىندە: "كىم دە كىم ءقادىر ءتۇنى يمانمەن جانە ساۋابىن ءۇمىت ەتىپ قۇلشىلىق ەتسە، ونىڭ الدىڭعى كۇنالارى كەشىرىلەدى" دەلىنگەن.
"اللا تاعالا بارشامىزدىڭ قاتە-كەمشىلىگىمىزدى كەشىرىپ، ءوز مەيىرىمىنە بولەگەي. راببىمىز ءقادىر كەشىندە شىنايى يمانمەن جاساعان دۇعالارىمىزدى، نامازدارىمىزدى، بەرگەن ساداقالارىمىزدى، وقىعان قۇرانىمىزدى قابىل ەتىپ، ساۋابىن ەسەلەپ جازعاي"، - دەپ تىلەدى ناۋرىزباي قاجى تاعان ۇلى.
ءقادىر كەشى كۇن باتىپ، اۋىز اشقان ساتتەن باستاپ تاڭ اتاتىن ۋاقىتقا دەيىن جالعاسادى.