الماتى قالاسىنىڭ اكىمى باقىتجان ساعىنتايەۆ جاپپاي تارتىپسىزدىكتەر كەزىندە زارداپ شەككەندەردىڭ ءحالىن سۇراپ، ورتالىق كلينيكالىق اۋرۋحاناعا باردى، دەپ حابارلايدى Almaty-akshamy.kz
اكىمدىكتىڭ باسپا ءسوز قىزمەتىنىڭ مالىمەتىنشە، باقىتجان ساعىنتايەۆ تارتىپسىزدىك كەزىندە زارداپ شەككەن ساقشىلار مەن ساربازدارعا قالانى تەرروريستىك شابۋىلدان قورعاۋ جولىندا اتقارعان ەڭبەگى ءۇشىن العىس بىلدىرگەن.
«قالا باسشىسى قالالىق جەدەل شتاب قۇرامىندا قىزمەتتىك مىندەتىن ورىنداۋ كەزىندە جاراقات العان اكىمدىكتىڭ مەملەكەتتىك قىزمەتشىلەرىنە العىس ءبىلدىردى.
زارداپ شەككەندەردىڭ ءاتى-جونى قاۋىپسىزدىك ماقساتىندا ايتىلمايدى»، - دەلىنگەن باسپا ءسوز قىزمەتىنىڭ مالىمەتىندە.
بۇعان دەيىن بۇگىن الماتىدا 49 ساۋدا ماركەتى، 44 جانارماي قۇيۋ ستانسياسى جۇمىس ىستەي باستاعانىن حابارلاعانبىز.