باقىتجان ساعىنتايەۆ الماتىنىڭ تىنىس-تىرشىلىگىن تولىق قالپىنا كەلتىرۋ ماسەلەلەرى جونىندە جۇمىس كەڭەسىن وتكىزدى، دەپ حابارلايدى Almaty-akshamy.kz
الماتى قالاسىنىڭ اكىمى باقىتجان ساعىنتايەۆ مەگاپوليسكە تەرروريستىك شابۋىلدان كەيىن قالانىڭ تىنىس-تىرشىلىگىن قالپىنا كەلتىرۋ ماسەلەلەرى جونىندە جۇمىس كەڭەسىن وتكىزدى.
كەڭەسكە قالا اكىمىنىڭ ورىنباسارلارى، اۋدان اكىمدەرى، نەگىزگى باسقارمالاردىڭ باسشىلارى قاتىستى. باسشىلاردىڭ جۇرگىزىلىپ جاتقان جۇمىستارعا جانە تەرريستەر مەن بانديتتىك توپتاردان تازارتىلعان شاعىناۋدارعا كەلگەن شىعىنعا قاتىستى ەسەپتەرى تىڭدالدى.
اكىم ورىنباسارى س.قۇسايىنوۆقا بانديتتەردىڭ ىس-ارەكەتى سالدارىنان زارداپ شەككەن اۋماقتاردى تازالاۋدى باستاۋ، قاۋىپسىزدىك تالاپتارى مەن توتەنشە جاعداي رەجيمى تالاپتارىن ساقتاۋ تاپسىرىلدى.
اكىم ورىنباسارى م.ازەربايەۆ جالپىقالالىق ەنەرگيا، سۋ، جىلۋ جانە گازبەن قامتاماسىز ەتۋ جۇيەسىنىڭ جاي-كۇيى جايىندا باياندادى. لاڭكەستىك شابۋىل باستالعان ساتتەن بەرى قالادا جالپى العاندا تىنىس-تىرشىلىكتى قامتاماسىز ەتەتىن جۇيەلەردە ىركىلىس بولماعاندىعى اتالىپ ءوتىلدى. تۋىنداعان ماسەلەلەر جەدەل شەشىلىپ، تۇراقتى باقىلاۋدا بولدى.
اكىم ورىنباسارى م.قيقىموۆقا قالالىقتاردى ازىق-تۇلىكپەن قامتاماسىز ەتۋگە قاتىستى احۋالدى جانە قالانىڭ ازىق-تۇلىك قاۋىپسىزدىگىن تۇراقتاندىرۋ، سونىمەن قاتار ازىق-تۇلىك جەتكىزۋدىڭ لوگيستيكالىق جۇيەلەرىن قامتاماسىز ەتۋ جۇكتەلدى.
سونداي-اق اكىم ب.ساعىنتايەۆ، اسىرەسە، ۇيلەردىڭ جانىنداعى دۇكەندەردى ازىق-تۇلىكپەن قامتاماسىز ەتۋ، قالالىق ءدارىحانالاردىڭ ۇزدىكسىز جۇمىسىن ۇيىمداستىرۋ ماسەلەلەرىن ەرەكشە باقىلاۋدا ۇستاۋدى تاپسىردى.
كەشەدەن بەرى قالا اكىمى ب.ساعىنتايەۆتىڭ تاپسىرماسىمەن «Magnum» جەلىسىنىڭ 2 سۋپەرماركەتى اشىلعانى بەلگىلى. تاياۋ ۋاقىتتا ءىرى ساۋدا جەلىلەرىنىڭ ءبىرقاتار دۇكەندەرى مەن كوتەرمە ساۋدا ورىندارى اشىلاتىن بولادى.
بۇدان بولەك، كەڭەستە دەنساۋلىق ساقتاۋ جانە قالالىق ۇتقىرلىق باسقارماسى باسشىلارىنىڭ ەسەبى تىڭدالدى. ولار اعىمداعى جاعداي جانە ونى تۇراقتاندىرۋ بويىنشا قابىلدانىپ جاتقان شارالار تۋرالى باياندادى.
الماتىدا تەرروريستىك شابۋىلدىڭ ناتيجەسىنەن كەلگەن شىعىندى الدىن الا باعالاۋ باستالدى.
ەستەرىڭىزگە سالا كەتەيىك، وسى جىلدىڭ 5 قاڭتارىندا الماتى قالاسىندا تەرروريستىك شابۋىل جاسالدى. سونىڭ ناتيجەسىندە سودىرلار اكىمشىلىك عيماراتتى باسىپ الىپ، دۇكەندەردى، شاعىن بيزنەس سۋبەكتىلەرىن قيراتتى جانە تونادى.
قالا تۇرعىندارىنىڭ جەكە مۇلىكتەرىنە دە ايتارلىقتاي شىعىن كەلتىرىلدى. سول كۇنى مەملەكەت باسشىسى قاسىم-جومارت توقايەۆ لاڭكەستەرگە قارسى وپەراسيانىڭ باستالعانىن جاريالادى.