باقىتجان ساعىنتايەۆ: بالالاردىڭ جان-جاقتى دامۋى ءۇشىن شىعارماشىلىق جانە سپورتتىق باعىتتار بويىنشا مەملەكەتتىك تاپسىرىس ورنالاستىرىلعان

«الماتى مەكتەپتەرى پوستكوۆيدتىك  كەزەڭدە: ءبىلىم ساپاسى، بالالاردىڭ دەنساۋلىعى جانە وتباسىنىڭ ءرولى» اتتى ونلاين-فورۋم بارىسىندا مەگاپوليس اكىمى باقىتجان ساعىنتايەۆ قوسىمشا ءبىلىم بەرۋ ۇيىمدارى بالالاردى ءداستۇرلى فورماتتا وقىتۋدى 15 قىركۇيەكتەن باستايتىنىن ايتتى.

بالالاردى قوسىمشا بىلىممەن قامتۋدى ۇلعايتۋ ءۇشىن قولدانىستاعى مەكتەپتەن تىس ۇيىمدار مودەرنيزاسيالانۋدا، دەپ حابارلايدى Almaty-akshamy.kz

 مىسالى، وتكەن جىل №5 بالالار مۋزىكالىق مەكتەبىنىڭ ەسكى نىسانى ءسۇرىلىپ، ونىڭ ورنىنا جاڭا زاماناۋي عيمارات سالىندى. بيىل تاعى 3 وقۋشىلار ءۇيىن جاڭارتۋ جۇمىستارى باستالدى، ءقازىر جوبالىق سمەتالىق قۇجاتتاردى دايىنداۋ كەزەڭى ءجۇرىپ جاتىر.

بيىلدان باستاپ الاتاۋ مەن ناۋرىزباي اۋداندارىندا 2 زاماناۋي كوپ سالالى يننوۆاسيالىق شىعارماشىلىق ورتالىقتاردىڭ  قۇرىلىسى باستالادى، قولدانىستاعى وقۋشىلار سارايى مودەرنيزاسيالانۋدا.

«سونىمەن قاتار، ءبىز وسى سالاداعى جەكە سەكتورمەن ىنتىماقتاستىقتى كۇشەيتۋ تۋرالى شەشىم قابىلدادىق جانە مەكتەپتەن تىس جەكە ۇيىمداردا مەملەكەتتىك ءبىلىم بەرۋ تاپسىرىستارىن ورنالاستىرۋ ءۇشىن جەرگىلىكتى بيۋدجەتتەن قارجى  بولدىك»، - دەدى باقىتجان ساعىنتايەۆ.

وسى مەملەكەتتىك تاپسىرىس اياسىندا 5 مىڭ ورىن بولىنەدى، ونىڭ ىشىندە مۋزىكالىق باعىتقا 600 ورىن جانە 4 مىڭنان استام ورىن تۋريستىك-ولكەتانۋ، ەكولوگيالىق-بيولوگيالىق، عىلىمي-تەحنيكالىق، كوركەمدىك جانە باسقا دا باعىتتار بويىنشا.

بۇل رەتتە قوسىمشا ءبىلىم بەرۋ تەك ءبىلىم بەرۋ جەلىسى ارقىلى عانا ەمەس، بۇل ىسكە مادەنيەت جانە سپورت باسقارمالارى دا بەلسەندى تۇردە قاتىسۋدا.

وسىعان وراي، ءبىلىم بەرۋ تاپسىرىسىمەن قاتار 8750 ورىنعا مەملەكەتتىك شىعارماشىلىق جانە سپورتتىق تاپسىرىستاردى ورنالاستىرۋعا جەرگىلىكتى بيۋدجەتتەن دە قارجى ءبولىندى.

 جايلى جاعداي جاساۋ جانە بالالاردى سپورتقا تارتۋ ءۇشىن جەرگىلىكتى بيۋدجەت ەسەبىنەن دە، جەكە ينۆەستيسيا تارتۋمەن دە مەكتەپتەردىڭ سپورت الاڭدارى مودەرنيزاسيالانۋدا.

بۇگىنگى تاڭدا ءمجا اياسىندا 2 سپورت الاڭىن قايتا جاڭارتۋ اياقتالدى جانە 8 الاڭدا جۇمىس جالعاسۋدا. جەرگىلىكتى بيۋدجەت ەسەبىنەن تاعى 33 سپورت الاڭى جاڭارۋدا، وسى ماقساتتارعا 1 ملردقا جۋىق تەڭگە ءبولىندى. قابىلدانعان شارالار   مەكتەپتەن تىس اقىسىز بىلىممەن  بالالاردى كەڭىنەن قامتۋعا مۇمكىندىك بەرەدى.