82 كوللەدجدىڭ 68 مىڭنان استام ستۋدەنتتەرى ءداستۇرلى ءبىلىم بەرۋ فورماتىنا ورالادى.
«الماتى مەكتەپتەرى پوستكوۆيدتىك كەزەڭدە: ءبىلىم ساپاسى، بالالاردىڭ دەنساۋلىعى جانە وتباسىنىڭ ءرولى» اتتى ونلاين-فورۋم بارىسىندا مەگاپوليس اكىمى باقىتجان ساعىنتايەۆ تەحنيكالىق جانە كاسىپتىك ءبىلىم بەرۋ مەكەمەلەرىن دامىتۋ شارالارى تۋرالى ايتتى، دەپ حابارلايدى Almaty-akshamy.kz.
جاڭا وقۋ جىلىندا 82 كوللەدجدىڭ 68 مىڭنان استام ستۋدەنتتەرى ءداستۇرلى ءبىلىم بەرۋ فورماتىنا ورالادى. تجكب ۇيىمدارىندا مەكتەپتەردىكىنە ۇقساس سانيتارلىق-ەپيدەميولوگيالىق قاۋىپسىزدىكتى قامتاماسىز ەتۋدىڭ پروفيلاكتيكالىق شارالارى قابىلداندى، بارلىق كوللەدجدەر، ستۋدەنتتەر تۇراتىن جاتاقحانالار Ashyq جوباسىنا قوسىلعان.
بيىل «جاس مامان» جوباسى اياسىندا تجكب ۇيىمداردى زاماناۋي قۇرىلعىلارمەن ماتەريالدىق-تەحنيكالىق جابدىقتاۋ جالعاساتىن بولادى.
«ەگەر وتكەن وقۋ جىلىندا 8 كوللەدج زاماناۋي قوندىرعىلارمەن جابدىقتالعان بولسا، بيىل ءبىز تاعى 10 كوللەدجدى قامتاماسىز ەتەمىز. وتكەن جىلعى جۇمىس تاجىريبەسىنە سايكەس، جاڭا زەرتحانالار، شەبەرحانالار ۇيىمداستىرىلادى، ستۋدەنتتەر بۇلاردا پراكتيكادان ءوتىپ، العان بىلىمدەرىن ءىس جۇزىندە پايدالاناتىن بولادى»، - دەدى باقىتجان ساعىنتايەۆ.
قالا اكىمى ءبىلىم باسقارماسىنا مەكتەپتەردە كاسىپتىك باعدار بەرۋ جۇمىسىن جاقسارتۋدى، بۇل ماسەلەنى شەشۋگە جۇمىس بەرۋشى كاسىپورىنداردى كەڭىنەن تارتۋدى، كوللەدجدەردەگى قۇزىرەتتىلىك ورتالىقتارىنىڭ جۇمىستارىن جانداندىرۋدى تاپسىردى.