الەۋمەتتىك جەلىدە تاتامي ۇستىندە "بالقاديشا" ءانىن ورىنداعان ءجاسوسپىرىمنىڭ ۆيدەوسى ميلليوننان استام قارالىم جيناپ، كوپتى ءتانتى ەتتى. Aqshamnews.kz ءتىلشىسى جۇرتتى سۇيسىنتكەن بالانىڭ اكەسىمەن سۇحباتتاستى.
"سپورتپەن قاتار، ونەر بايقاۋلارىنان قۇر قول كەلمەيدى"
كوپشىلىكتى داۋسىمەن ءتانتى ەتكەن ۆيدەوداعى بالانىڭ ەسىمى – بەكبولات يسا ءىلياس ۇلى. اتىراۋ قالاسى، المالى اۋىلىنىڭ تۋماسى. يسانىڭ اتا-اناسى دومبىراشىلار ەكەن. ونەرلى وتباسىنان شىققان 14 جاستاعى جەتكىنشەك 2019 جىلدان بەرى دزيۋدو سپورتىن جانىنا سەرىك ەتكەن.
«مەن دە، جۇبايىم دا سپورتتان الىس جاندارمىز. كەرىسىنشە ونەر ادامدارىمىز. ۇلىم يسانىڭ بويىنداعى ونەر بىزدەن دارىعان بولۋى كەرەك. 8 جاسىندا ءوزىنىڭ قالاۋىمەن دزيۋدو سپورتىنا بەرگەن بولاتىنمىن. سودان بەرى بىرنەشە جارىستارعا شىعىپ، جۇلدەلى ورىندار الىپ كەلەدى. ال مەكتەپتە مۋزىكا ءپانىنىڭ ءمۇعالىمى ءان بايقاۋلارىنا دا قاتىستىرىپ تۇرادى. ونەر بايقاۋلارىنان دا قۇر قول كەلگەن ەمەس» دەيدى يسانىڭ اكەسى ءىلياس مىرزا.
"جىلى لەبىز بىلدىرگەندەرگە كوپ راقمەت!
ءىلياس مىرزا ۇلىنىڭ ونەرىنە تامسانىپ جاتقان كوپشىلىككە العىسىن ءبىلدىردى.
«قازاقتا «جىگىتكە جەتى ونەر دە از» دەگەن ءسوز بار عوي. سول سەكىلدى ۇلىمىز قاي سالادان بولماسىن ۇلكەن جەتىستىكتەرگە جەتىپ جاتسا اتا-اناسى رەتىندە ءبىز ءاردايىم ءسوزسىز قۋانىشتى بولامىز. جەلىدە يسانىڭ ءان ايتقان ۆيدەوسىنا اق تىلەكتەرىن ارناپ جاتقان جاندارعا ۇلكەن العىسىمدى ايتامىن. ۇلىم بولاشاقتا كىم بولعىسى كەلەتىنىن ءوزى تاڭدايدى. بالانىڭ تاڭداۋىنا قارسى كەلمەۋ كەرەك. ءبىز ونى ءارقاشان قولداۋعا ءازىرمىز» دەدى ءىلياس مىرزا.
