قازاقستاندا بالا تۋۋ كورسەتكىشى رەكوردتىق دەڭگەيدە تومەندەپ كەتكەن، دەپ حابارلايدى aqshamnews.kz
ۇلتتىق ستاتيستيكا بيۋروسىنىڭ مالىمەتىنشە، بيىل قاڭتار-ناۋرىز ايلارى ارالىعىندا قازاقستاندا بار بولعانى 77،3 مىڭ بالا ومىرگە كەلگەن. بۇل وتكەن جىلداعى وسى كەزەڭمەن سالىستىرعاندا 16%-عا از، ءارى 2014 جىلدىڭ ءى توقسانىنان بەرگى ەڭ تومەنگى كورسەتكىش.
تۋۋ كورسەتكىشىندە ماۋسىمدىق وزگەرىستەر بايقالادى: جىل سايىنعى ەڭ جوعارى كورسەتكىشتەر، ادەتتە، ءۇشىنشى توقساندا تىركەلەدى. اسىرەسە بۇل قۇبىلىس پاندەميا جىلدارى — 2020 جانە 2021 جىلدارى — ەرەكشە كوزگە تۇسكەن. ال ەڭ تومەنگى كورسەتكىشتەر، كەرىسىنشە، كوبىنە جىلدىڭ العاشقى ءۇش ايىنا ءتان. سوعان قاراماستان، سوڭعى 11 جىلدا ءتىرى تۋعان سابيلەر سانى ەشقاشان 90 مىڭنان تومەن تۇسپەگەن ەدى.
2024 جىلدىڭ قاڭتار-ناۋرىزىمەن سالىستىرعاندا تۋۋ كورسەتكىشىنىڭ تومەندەۋى ەلدىڭ بارلىق 20 وڭىرىندە بايقالعان. بۇل رەتتە 12 وڭىردە تومەندەۋ قارقىنى ورتاشا دەڭگەيدەن جوعارى بولدى. ەڭ ۇلكەن تومەندەۋ اقمولا وبلىسىندا (-22%) جانە جەتىسۋ وبلىسىندا (-20،1%) تىركەلدى. قالا مەن اۋىل اراسىنداعى ايىرماشىلىق تا كوزگە تۇسەدى: اۋىلدىق جەرلەردە كورسەتكىش -18،1%-عا ازايسا، قالالاردا بۇل كورسەتكىش -14،2%-دى قۇرادى.
حالىق سانىنا شاققانداعى جالپى تۋۋ كوەففيسيەنتى دە تومەندەدى: 2024 جىلدىڭ I توقسانىندا بۇل كورسەتكىش ءار 1000 ادامعا شاققاندا 18،33 بولسا، 2025 جىلى 15،39-عا دەيىن ازايدى. سونىمەن قاتار، تۋۋ كورسەتكىشىمەن قاتار ءولىم-جىتىم دە ازايىپ جاتىر. الايدا بۇل ءۇردىس باياۋ جۇرۋدە: قايتىس بولعاندار سانى 31 مىڭ ادامعا دەيىن ازايىپ، جىلدىق كورسەتكىش -7،2 پايىز بولدى.
ناتيجەسىندە، تابيعي ءوسىم — ياعني، تۋعاندار مەن قايتىس بولعاندار اراسىنداعى ايىرما — 2025 جىلدىڭ العاشقى توقسانىندا 46،3 مىڭ ادام بولىپ، 2024 جىلمەن سالىستىرعاندا 20،7%-عا ازايدى. بۇل دا 2014 جىلدان بەرگى ەڭ تومەنگى دەڭگەي.