جاستار اراسىندا الىمجەتتىك ءورشىپ تۇر
ءار اتا-انا بالاسىن جاقسى بولسىن دەپ تاربيەلەيدى. قازاق حالقى ەرتەدەن ۇلكەنگە قۇرمەت، كىشىگە ىزەت كورسەتەدى. الايدا، قازىرگى ۋاقىتتا جاستاردىڭ كىشىگە ىزەت ەمەس، الىمجەتتىك كورسەتۋى كوبەيىپ كەتتى. بۇل مەكتەپ وقۋشىلارى اراسىنداعى ءجيى كەزدەسەتىن قۇبىلىس. بالانىڭ پسيحولوگياسىنا ورتاسى نەمەسە الەۋمەتتىك جەلىلەر اسەر ەتەدى. وسى تاقىرىپتى تارقاتۋ ءۇشىن مەكتەپ پسيحولوگىمەن سۇحباتتاستىق.
اقتولقىن اشىرالييەۆا، №169 مەكتەپ-ليسەيىنىڭ پسيحولوگى:
اتا-انا بالاسىمەن ءجيى سويلەسۋى كەرەك
كەز كەلگەن اتا-انا بالاسىمەن اشىق جانە ءجيى سويلەسىپ وتىرۋى قاجەت. تەك مەكتەپتەگى ۇلگەرىمى جايلى عانا ەمەس، قاتارلاستارىمەن قارىم-قاتىناسى قانداي ەكەنىن ءبىلۋى ءتيىس. مەكتەپتەگى بۋللينگ ناتيجەسى جاعىمسىز سالدارعا اكەلۋى مۇمكىن. سونىمەن قاتار، قازىرگى تاڭدا كيبەربۋللينگ قۇرباندارى دا كوپتەپ كەزدەسەدى. بۇنداي جاعدايعا تاپ بولعان وقۋشىلار ءوز ورتاسىنان الشاقتاي باستايدى. سونداي-اق، قورقىنىشپەن ءومىر سۇرەدى.
بالا مىنەزىنە نازار اۋدارىڭىز
بۋللينگتىڭ قۇرباندارىنىڭ مىنەزىندە وزگەرىس بولادى. مىنەزى تۇيىقتالىپ، مەكتەپكە بارعىسى كەلمەيدى. ءوز ويىن اشىق ايتۋدان قورقاتىن بولادى. بۇنداي وقۋشىلاردى قايتا ورتاسىنا قوسۋ ءۇشىن كوپتەگەن جۇمىستار جاسالادى. سونىڭ ىشىندە جەكە جانە توپتىق جۇمىس. بالانىڭ اتا-اناسىمەن جانە سىنىپ جەتەكشىسىمەن تىعىز جۇمىستار جۇرگىزىلەدى. وسى ارقىلى بىرتە-بىرتە بالا مىنەزى قالپىنا كەلە باستايدى.
اگرەسسور مەن مىقتىمىن دەگەن پوزيسيانى ۇستانادى
بالا بويىنداعى اگرەسسيا ەموسيونالدىق تەپە-تەڭدىككە جەتۋ جولى. سونداي-اق، اگرەسسياعا بيولوگيالىق فاكتورلار (جۇيكە جۇيەسىنىڭ ەرەكشەلىكتەرى، تۇقىم قۋالاۋشىلىق) اسەر ەتەدى. وقۋشىلار ءوز ورتالارىندا بىر-بىرلەرىنە الىمجەتتىك تانىتقاندا بالالار اگرەسسيانىڭ جوعارعى شىڭىنا شىعادى. ولاردا مەن مىقتىمىن دەگەن پوزيسيا تۇرادى. مەكتەپ جاسىنداعى وقۋشىلاردا ماتەريالدىق جاعىنان الىمجەتتىك جاساۋ، ياعني اقشا تالاپ ەتۋ ءجيى كەزدەسەدى. وسى جاعدايدا كوپ بالالار اتا-انالارىنا ايتۋعا قورقادى.
تىعىرىقتان شىعۋ جولى
بۋللينگكە ۇشىراعان بالاعا جان-جاقتى قولداۋ كورسەتۋ كەرەك. بۇل جۇمىس ءبىر جاقتى عانا ەمەس، ءار تاراپتان بىرىگىپ جۇرگىزەلەتىن جۇمىس. اتا-انالار بالالارىمەن ءجيى سويلەسسە دەيمىز. ونداي جاعداي ورىن العان كەزدە بىردەن ارنايى ماماندارعا بارۋ قاجەت. بالا ءوزىن قاۋىپسىزدىكتە سەزىنۋى ءۇشىن بارلىعىمىز جاۋاپتىمىز. كەز كەلگەن ماسەلەنىڭ شەشىمى بار ەكەنىن ايتقىم كەلەدى.
سوڭعى ۋاقىتتا ەلىمىز بويىنشا جاسوسپىرىمدەرگە قاتىستى قىلمىس كوبەيىپ كەتتى. وسى ورايدا بالالارعا قاتىستى زاڭ بۇزۋشىلىقتاردىڭ الدىن الۋ ماڭىزدى ەكەنىن ەسكەرۋ قاجەت. بالا تاربيەسى ۇلى ءىس. ءبىر بالانى تاربيەلەۋ ارقىلى ءبىز ۇلتتى تاربيەلەيمىز. وتان – وتباسىدان باستالاتىنىن ەستەن شىعارماعان ءجون.