تۇركىستان وبلىسىندا ءۇي ورتەنىپ، سالدارىنان 12 ادام قازا تاپتى. كورشىلەرى قايعىلى وقيعا تۋرالى ايتتى، - دەپ حابارلايدى aqshamnews.kz ءتىلشىسى otyrar.kz-كە سىلتەمە جاساپ.
جەتىسايدا بولعان الاپات ورتتەن قازا تاپقانداردىڭ بارلىعى - ءبىر اۋلەتتىڭ مۇشەلەرى.
"ولار ءۇش اعايىندى. اۋلەت مۇشەلەرى كورشى اۋىلداعى اعاسىنىڭ ۇلىنىڭ سۇندەت تويىنان كەلە جاتىپ، العاباس اۋىلىنداعى تۋىستارىنىڭ ۇيىنە تۇنەگەن. ءتۇن ورتاسىندا 360 شارشى مەترلىك ەكى قاباتتى كوتتەدج وتقا ورانىپ، 12 ادام كوز جۇمدى. ءورت سالدارىنان ءۇي يەسى مەن ونىڭ وتباسى مۇشەلەرى قازا تاپتى"، - دەپ جازىلعان باسىلىم مالىمەتىندە.
كورشىلەرى وقيعا قالاي بولعانىن ايتتى.
"تاڭعى ساعات 5:05-تە كوردىم. كەلىنشەگى "اپا، جاردەمدەسىڭىزدەرشى" دەپ ايقايلاپ تۇر ەكەن. سىرتقا شىعا الماي تۇردى. كورشىلەرگە جۇگىردىم. وت قىپ-قىزىل بولىپ جانىپ جاتىر ەكەن. بىرەۋى وياندى، بىرەۋى ويانبادى. بالامدى وياتتىم، بىرەۋىن الىپ شىقتى. ەگىزدىڭ بىرەۋىن كوردىم، شاشى كۇيىپ كەتكەن"، - دەيدى قانايىم ءجۇنىسوۆا.
وقيعانىڭ ءمان-جايى
تۇركىستان وبلىسى توتەنشە جاعدايلار دەپارتامەنتىنىڭ مالىمەتىنشە، 18 قاراشادا تاڭەرتەڭ جەتىساي اۋدانىنا قاراستى العاباس اۋىلىنداعى ەكى قاباتتى جەكە تۇرعىن ۇيدەن ءورت شىققانى تۋرالى حابار تۇسكەن.
وقيعا ورنىنا جەتكەن ورتسوندىرۋشىلەر كەلگەن ساتتە ءۇي تولىقتاي ورتكە ورانعانى انىقتالعان. ءورتتى ءسوندىرۋ جانە بارلاۋ كەزىندە ۇيدەن ەس-تۇسسىز جاتقان ءۇش ادام ەۆاكۋاسيالانىپ، جەدەل جاردەم بريگاداسىنا تاپسىرىلدى.
"ءۇيدىڭ ىشىنەن 12 ادامنىڭ ءمايىتى تابىلدى، ولاردىڭ توعىزى – بالا"، – دەلىنگەن تجد حابارلاماسىندا.
كورشىلەردىڭ ايتۋىنشا، وقيعا بولعان ۇيدە قوناقتار بولعان، سەبەبى الدىڭعى كۇنى ءۇي يەلەرىندە ءىس-شارا وتكەن. ءورت 360 شارشى مەتر اۋماقتا تولىق ءسوندىرىلدى.
ءقازىر وقيعا ورنىندا بارلىق جەدەل قىزمەت جۇمىس ىستەپ جاتىر. ءورتتىڭ شىعۋ سەبەبى انىقتالىپ جاتىر، تەرگەۋ باستالدى.
ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ، قايعىلى وقيعانى جان-جاقتى تەكسەرۋدى تاپسىردى.