اقپاراتتىق داۋىردە مەديانىڭ قارجىلىق تۇراقتىلىعى ەڭ وزەكتى ماسەلەلەردىڭ بىرىنە اينالدى. وزبەكستاندىق «حالىق ءسوزى» گازەتىنىڭ ساراپشىسى نۇرلان ۋسمانوۆتىڭ ايتۋىنشا، بۇگىنگى مەديانارىقتا ءبىر عانا تابىس كوزىنە سۇيەنۋ – تاۋەكەل، ال كءىرىستى ءارتاراپتاندىرۋ – بۇل مەديانىڭ ەكونوميكالىق قاۋىپسىزدىگى. سپيكەر بۇل تۋرالى الماتىدا وتكەن «تۇركى الەمىنىڭ مەديا كەڭىستىگى: جاڭا داۋىردەگى مىندەتتەر مەن مۇمكىندىكتەر» تاقىرىبىنا VI حالىقارالىق تۇركىتىلدەس جۋرناليستەر مەديا فورۋمىندا ايتتى.
سپيكەردىڭ سوزىنشە، سوڭعى 10 جىلدا مەديا سالاسى كۇرت وزگەرىپ، ءداستۇرلى تابىس مودەلدەرى جەتكىلىكسىز بولا باستاعان. وسىعان بايلانىستى جاڭاشا تاسىلدەر جازىلىم جۇيەسى، دوناتتار، جارناما جانە گرانتتىق جوبالار باسىلىمنىڭ تۇراقتى دامۋىنا ىقپال ەتەتىن نەگىزگى ءتورت باعىت رەتىندە اتالدى. سپيكەر وزبەكستان مەدياسى مىسالىندا جازىلىم مودەلىنىڭ ترانسفورماسياسىن اتاپ ءوتتى.
«حالق سۋزي» مەن «نارودنوە سلوۆو» گازەتتەرى جاڭا بيزنەس مودەلدەردى كەزەڭ-كەزەڭىمەن ەنگىزىپ كەلەدى. ءبىراق رەسمي باسىلىم بولعاندىقتان، جازىلىم ءالى دە قاعاز نۇسقا ارقىلى جۇزەگە اسىپ وتىر»، – دەدى نۇرلان ۋسمانوۆ.
بولاشاقتا سايت، ءموبيلدى قوسىمشا جانە Telegram-ارنا ارقىلى ونلاين جازىلىمدى ىسكە قوسۋ جوسپارلانىپ وتىر. بۇل شەشىم وقىرمان سانىن ارتتىرىپ قانا قويماي، رەداكسياعا تۇراقتى تابىس اكەلمەك. ساراپشىنىڭ ايتۋىنشا، مەديانىڭ تەك جارناماعا تاۋەلدى بولۋى ۇزاق مەرزىمدى ستراتەگيا ەمەس.
«وقىرمان قولداۋى مادەنيەتىن قالىپتاستىرۋ رەداكسيا مەن اۋديتوريا اراسىنداعى سەنىمدى كۇشەيتەدى. ءبىزدىڭ رەداكسيالار بيزنەس قۇرىلىمدارمەن جانە ۇەۇ-لارمەن بىرلەسكەن جوبالاردى جۇزەگە اسىرىپ ءجۇر. بۇل تەك تابىس اكەلىپ قويماي، جۋرناليستيكانىڭ قوعامدىق ءرولىن كۇشەيتەدى»، – دەدى ول.
كوپتەگەن مەديالار سايت پەن الەۋمەتتىك جەلىدە «گازەتكە ۇلەس قوس» سياقتى ارنايى بولىمدەر ورنالاستىرۋ ارقىلى وقىرماننان شاعىن، ءبىراق تۇراقتى قولداۋ الىپ وتىر. الايدا، ەكى وزبەكستاندىق رەداكسيادا مۇنداي تاجىريبە ءالى ەنگىزىلمەگەن.
وزبەكستاندا جارناما نارىعى قالىپتاسۋ ۇستىندە. سوعان قاراماستان، برەندتىك كونتەنت، الەۋمەتتىك سەرىكتەستىك جوبالارى جانە تاقىرىپتىق قوسىمشالار سياقتى جاڭا فورماتتارعا سۇرانىس ءوسىپ كەلەدى.
ايتا كەتەيىك، مەديا فورۋمعا قازاقستان، ورتالىق ازيا، تۇركيا، ەۋروپا ەلدەرىنەن ب ا ق باسشىلارى، جۋرناليستەر، دەپۋتاتتار، مەديا سالاسىنداعى ۇەۇ باسشىلارى، قوعام قايراتكەرلەرى، PR مەنەدجەرلەر، باسپا ءسوز حاتشىلارى، جۋرناليستيكا فاكۋلتەتىنىڭ مۇعالىمدەرى مەن ستۋدەنتتەرى ت.ب. قاتىستى.