جاڭا وقۋ جىلى قارساڭىندا الماتى قالاسىنىڭ پوليسيا قىزمەتكەرلەرى جولاۋشىلار تاسىمالىنىڭ، سونىڭ ىشىندە مەكتەپ اۆتوبۋستارىنىڭ جاي-كۇيىن جانە ءبىلىم بەرۋ مەكەمەلەرىنىڭ ماڭىنداعى كوشە-جول ينفراقۇرىلىمىن كەشەندى تۇردە تەكسەردى.
بالالاردىڭ جولداعى قاۋىپسىزدىگىنە ەرەكشە كوڭىل ءبولىندى. وسىلايشا، 200 مەكتەپ اۆتوبۋسىن پايدالانۋعا بەرەتىن اۆتوكاسىپورىن تەكسەرىلدى. بۇل اۆتوبۋستار قالاداعى 57 مەكتەپكە وقۋشىلاردى تاسىمالدايدى، دەپ حابارلايدى aqshamnews.kz.
بارلىق كولىكتەر 2023–2024 جىلدارى ساتىپ الىنعان جانە زاماناۋي قاۋىپسىزدىك جۇيەلەرىمەن جابدىقتالعان: 6 بەينەباقىلاۋ كامەراسى (سالوندا جانە سىرتتا)، قاۋىپسىزدىك بەلدىكتەرى، ءورت ءسوندىرۋ جۇيەلەرى، قوزعالىسى شەكتەۋلى جولاۋشىلارعا ارنالعان پاندۋستار ورناتىلعان. اۆتوپاركتە جۇرگىزۋشىلەر مىندەتتى تۇردە رەيس الدىنداعى مەديسينالىق تەكسەرۋدەن وتەتىن مەديسينالىق كابينەت جۇمىس ىستەيدى.
وقۋ جىلىنا دايىندىق اياسىندا پوليسيا قىزمەتكەرلەرى الماتى قالاسىنىڭ موبيلدىلىك باسقارماسى جانە اكىمدىكپەن بىرلەسىپ كەلەسى جۇمىستاردى اتقاردى: 216 مەكتەپتىڭ ماڭىنداعى كوشە-جول جەلىسى تەكسەرىلدى؛ انىقتالعان كەمشىلىكتەردى جويۋ بويىنشا 275 نۇسقاما بەرىلدى؛ 300 جول بەلگىسى اۋىستىرىلدى جانە جاڭادان ورناتىلدى، تاعى 358 بەلگى جاڭارتىلدى؛ 8 مىڭ شارشى مەتردەن استام جول تاڭباسى سىزىلدى؛ 207 رەتتەلمەيتىن جاياۋ جۇرگىنشىلەر وتكەلى جارىقديودتى شامدارمەن جارىقتاندىرىلدى؛ 101 ءبىلىم بەرۋ مەكەمەسىنىڭ ماڭىنا تەمىر قورشاۋلار ورناتىلدى.
سونىمەن قاتار 30 جاڭا باعدارشام جانە 80 رەتتەلەتىن جاياۋ جۇرگىنشىلەر وتكەلىن سالۋعا جوبالىق-سمەتالىق قۇجاتتاما دايىندالدى. ولاردىڭ ءبىر بولىگى مەكتەپتەردىڭ جانىندا ورنالاسقان.
— بالالاردىڭ جولداعى قاۋىپسىزدىگى – پوليسيانىڭ باستى باسىمدىعى. ءبىز جولاۋشىلار تاسىمالىنا باقىلاۋدى كۇشەيتىپ، جول بەلگىلەرى مەن تاڭبالارىن جاڭارتىپ، زاماناۋي تەحنولوگيالاردى ەنگىزىپ جاتىرمىز. اتا-انالار مەن ۇستازدار دا بالالارعا جولدا ءجۇرۋ ەرەجەلەرىن ەسكە سالىپ وتىرعانى ماڭىزدى. تەك بىرلەسكەن كۇش-جىگەرىمىز ارقىلى عانا ءبىز، بالالاردىڭ جاراقات الۋىن ازايتىپ، مەكتەپكە دەيىنگى ءقاۋىپسىز جولدى قامتاماسىز ەتە الامىز، – دەدى الماتى قالالىق پد اكىمشىلىك پوليسيا باسقارماسىنىڭ باستىعى اسحات كۇلبايەۆ.
سونداي-اق الماتىدا جول-كولىك وقيعالارىنان بولاتىن ءولىم-جىتىمدى ازايتۋعا باعىتتالعان “Vision Zero” تۇجىرىمداماسى بەلسەندى تۇردە جۇزەگە اسىرىلۋدا. بۇل شەڭبەردە جىلدامدىقتى شەكتەۋ، “قاۋىپسىزدىك ارالشىقتارى”، جاساندى جول بۇدىرلارى سىندى كەشەندى شارالار قاراستىرىلعان. بۇگىندە مەكتەپتەردىڭ ماڭىندا 20-دان استام جاساندى جول بۇدىرى مەن 10 “قاۋىپسىزدىك ءمۇيىسى” ورناتىلدى.