بۇگىن – ءبىرىنشى توقساننىڭ سوڭعى وقۋ كۇنى. ەرتەڭنەن باستاپ وقۋشىلار كۇزگى دەمالىسقا كىرىسەدى. كۇزگى دەمالىس - بالا ءۇشىن تىنىعىپ قانا قويماي، جاڭا اسەرلەرگە، پايدالى ىستەرگە، شابىت پەن شىعارماشىلىققا تولى ەرەكشە كەزەڭ. ەگەر دەمالىستى دۇرىس ۇيىمداستىرساڭىز، ول مەكتەپتەن ءۇزىلىس ەمەس، بالانىڭ دامۋىنا مۇمكىندىك بەرەتىن ۋاقىتقا اينالادى.
Aqshamnews.kz رەداكسياسى كۇزگى دەمالىستى ءماندى وتكىزۋگە ارنالعان 8 ءتيىمدى يدەيانى ۇسىنادى.
1. ءبىلىمدى تولىقتىرۋ
ءبىرىنشى توقسان قورىتىندىسى بويىنشا ناتيجە ءسىز كۇتكەندەي ءساتتى بولمادى ما؟ وندا دەمالىس كۇندەرىن بىلىمدەگى كەم-كەتىكتى جويۋعا ارناۋعا بولادى. رەپەتيتورمەن ساباق ءوتۋ، قىسقا كۋرسقا جازىلۋ نەمەسە بالامەن بىرگە وقۋلىقتاعى تاقىرىپتاردى قايتالاۋدىڭ ءبارى پايدالى بولماق. ەڭ باستىسى - دۇرىس موتيۆاسيا تابۋ. كەيدە ساباق ۇلگەرىمىنىڭ تومەندەۋ سەبەبى ءبىلىمنىڭ ەمەس، پسيحولوگيالىق كەدەرگىنىڭ سالدارىنان بولۋى مۇمكىن.بالا ماڭىزدى تاقىرىپتى وتكىزىپ العان، وزىنە سەنىمسىزدىك پايدا بولعان نەمەسە مۇعالىممەن تۇسىنىسپەۋشىلىك تۋىنداعان بولۋى ىقتيمال.
مۇنداي جاعدايدا اتا-انانىڭ قولداۋى، سابىرمەن ءتۇسىندىرۋى جانە قاجەت بولسا، بالالار پسيحولوگىنىڭ كومەگى ارتىق ەتپەيدى.
سۋرەت: profi.ru
2.دەنساۋلىقتى قولعا الۋ
كۇزدىڭ سۋىق، جەلدى كۇندەرى يممۋنيتەتتى السىرەتەدى. سوندىقتان دەمالىس – اعزانى كۇشەيتۋدىڭ تاپتىرماس ۋاقىتى. بالاڭىزبەن بىرگە دارۋمەن قابىلداۋ، سەرگىتەتىن ماسساجعا جازىلۋ، دارىگەرگە تەكسەرىلۋ، فيزيوتەراپيا كۋرسىن ءوتۋ، ستوماتولوگقا بارۋ - ءبارى ماڭىزدى. كۇن ءتارتىبىن رەتتەپ، تازا اۋادا سەرۋەندەڭىز. وسىلايشا بالا كىشكەنتايىنان ءوز دەنساۋلىعىنا جاۋاپكەرشىلىكپەن قاراۋعا ۇيرەنەدى.
سۋرەت: Cerecon.ru
3.كىتاپ وقۋ ادەتىن قالىپتاستىرۋ
قىزىقتى ەرتەگىلەر، فەنتەزي، دەتەكتيۆتەر مەن شىتىرمان وقيعالى شىعارمالار - بالا قيالىن دامىتاتىن ەڭ جاقسى قۇرال. كىتاپ وقۋ بالانىڭ ءوي-ورىسىن كەڭەيتەدى، ەستە ساقتاۋ قابىلەتىن ارتتىرادى، ءتىل بايلىعىن دامىتادى.
كىتاپتى بىرگە وقىپ، رولمەن ءبولىسىپ وقۋ نەمەسە وقىعان شىعارما جايلى پىكىر ءبولىسۋ دە قىزىق. ءۇي كىتاپحاناسىن رەتتەپ، جاڭا كىتاپتار ىزدەڭىز نەمەسە جاقىن ماڭداعى كىتاپ جارمەڭكەسىنە بارىڭىز. ماقسات - وقۋدى قىزىقتى تاجىريبەگە اينالدىرۋ.
سۋرەت: Kazgazeta.kz
4.ساپارعا شىعۋ
كۇزگى دەمالىس ۋاقىتى ۇزاق ەمەس. سوندىقتان الىس ساپارعا شىعا قويۋ ەكىتالاي. ءبىراق قىسقا ەكسكۋرسيالار مەن سەرۋەندەردى كەز كەلگەن ساتتە ۇيىمداستىرۋعا بولادى.
مۋزەيلەر، كورمەلەر، تاريحي عيماراتتار، تابيعي ەسكەرتكىشتەر، قالانى ارالاۋ - وسىنىڭ ءبارى جاڭا اسەر سىيلايدى.
بالاڭىز ءوز قالاسىنىڭ تاريحىن تانىپ، جاڭا ورتادا ءوزىن ەركىن سەزىنۋدى ۇيرەنەدى. مۇنداي تاجىريبە دۇنيەتانىمدى كەڭەيتەدى، شابىت سىيلايدى.
سۋرەت: arnapress.kz
5.پايدالى ءىس جاساۋ
مىسالى، ءوزىڭىز تۇراتىن جەردە قىستايتىن قۇستارعا قامقورلىق كورسەتىڭىز. دەمالىستا وقۋشى بالاڭىزبەن بىرگە ۇساق جۇمىستارمەن اينالىسىپ، قۇستارعا ارنالعان جەم سالعىش جاساۋعا بولادى. قىستا بالا سول جەرگە جەم سالىپ، قۇستاردى باقىلاپ جۇرسە، ول تابيعاتقا سۇيىسپەنشىلىك پەن جاۋاپكەرشىلىك سەزىمىن قالىپتاستىرادى.
سۋرەت: donhoztorg.ru
6.جاڭا نارسە بايقاپ كورۋ
دەمالىس كەزىندە ءتۇرلى ۇيىرمەلەر مەن سەكسيالار تاجىريبە جۇزىندەگى سىناق ساباقتارىن وتكىزەدى. بۇل - جاڭا حوببي تابۋدىڭ تاماشا مۇمكىندىگى.
بالا كاراتەمەن اينالىسا ما؟ وندا بي ساباعىن بايقاپ كورسىن. نەمەسە سۋرەت سالۋ، قولدانبالى ونەر بويىنشا شەبەرلىك ساباعىنا قاتىسىپ، باعىن سىناپ كورۋگە بولادى.
ماقسات - ءوزىن باسقا قىرىنان تانۋ جانە جاڭا قابىلەتتەردى اشۋ.
سۋرەت: vpechatleniya.ru
7.كوڭىل كوتەرۋ
كۇزگى دەمالىس - ويىن مەن قىزىقتى ۋاقىت وتكىزۋ شاعى. سيرككە، تەاترعا، كينوعا بارۋ - كلاسسيكا. ال ەگەر ەرەكشە اسەر قالدىرعىڭىز كەلسە، كۆەستكە قاتىسىڭىز، لازەرتاگ نەمەسە باتۋت ورتالىعىنا بارىڭىز.
ەڭ باستىسى - بىرگە ۋاقىت وتكىزۋ جانە بالانىڭ قۋانىشىن ءبولىسۋ.
سۋرەت: novoetv.kz
8.جاي دەمالۋ جانە وتباسى جىلۋىن سەزىنۋ
كەيدە ەشتەڭە ىستەمەۋدىڭ ءوزى ەڭ جاقسى دەمالىس. بالاڭىزدى اتا-اجەسىنە جىبەرىڭىز نەمەسە دوستارىن ۇيگە شاقىرىڭىز.
ۇيدە بىرگە ءتاتتى توقاش ءپىسىرىپ، بىرگە شاي ءىشىپ، ەسكى البومداردى اقتارساڭىزدار بولادى. اڭگىمەلەسىپ، بىرگە كۇلىپ، ءتىپتى كەش ۇيىقتاۋعا ءبىر رەت بولسىن رۇقسات بەرىڭىز. مۇنداي ساتتەر ءومىر بويى ەستەن كەتپەسى انىق.
سۋرەت: vkusno-doma.com
الدىن الا جوسپارنالىپ، ويلاستىرىلعان دەمالىس بالانىڭ ەسىندە قالاتىنىن ءسوزسىز. سوندىقتان ونى پايدالى، قىزىقتى جانە كوڭىلدى ەتۋگە تىرىسۋ كەرەك. شىعارماشىلىقپەن ويلاپ، بەلسەندى ارەكەت ەتىڭىز - سوندا قىسقا دەمالىستىڭ ءوزى بالاعا قۋانىش، شابىت جانە جاڭا كۇش سىيلايدى.