بۇل اقشانى مەرزىمىنەن بۇرىن الۋعا تىيىم سالىنادى.
قازاقستاندىق بالالاردىڭ شوتىنا ۇلتتىق قوردىڭ اقشاسى كەلەسى جىلى اقپان ايىنان باستاپ تۇسە باستايدى، دەپ حابارلايدى Almaty-akshamy.kz
پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ "ۇلتتىق قور – بالالارعا" جوباسى اياسىندا كامەلەتكە تولعان بالانىڭ شوتىندا قانشا اقشا جينالاتىنىن ايتتى.
"ەگەر وسى جۇيەگە بالا دۇنيەگە كەلگەن كەزدەن باستاپ قاتىسسا، 18 جاسقا تولعاننان كەيىن 3 مىڭ دوللاردان 4 مىڭ دوللارعا دەيىن الادى"، - دەدى جاماۋبايەۆ.
ايتا كەتەرى، ءبىر اي بۇرىن پرەزيدەنت قاسىم-جومارت توقايەۆ ۇلتتىق قوردان بالالارعا ارنالعان قاراجاتتى ەسەپتەۋ، تولەۋ جانە پايدالانۋ ماسەلەلەرى تۋرالى زاڭعا قول قويدى.
"ۇلتتىق قور – بالالارعا" جوباسى 2024 جىلعى 1 قاڭتاردان باستاپ ىسكە قوسىلادى. ۇلتتىق قوردىڭ جىل سايىنعى ينۆەستيسيالىق كىرىسىنىڭ 50%ء-ى بالالار 18 جاسقا تولعانعا دەيىن ولاردىڭ ارنايى جيناقتاۋ شوتتارىنا اقپان ايىنان باستاپ اۋدارىلادى. بۇل اقشانى مەرزىمىنەن بۇرىن الۋعا تىيىم سالىنادى.
بالا كامەلەتكە تولعاننان كەيىن شوتتاعى اقشاسىن باسپانا ساتىپ الۋعا نەمەسە وقۋ اقىسىن تولەۋگە جۇمساي الادى. الايدا بالا ازاماتتىعىن وزگەرتكەن نەمەسە جوعالتقان جاعدايدا تولەم الۋ قۇقىعىنان ايىرىلادى. ۇلتتىق قوردان بەرىلەتىن قاراجاتقا سالىق سالىنبايدى.
ەسەپشوتتاعى اقشا دوللارمەن جيناقتالادى. ال تولەنەتىن كەزدە سول كۇنگى كۋرسپەن تەڭگەگە اۋدارىلادى.