پوليسيا قىزمەتى جول قوزعالىسى ەرەجەلەرىن قاتاڭ ساقتاۋعا شاقىرادى. باعدارشامنىڭ قىزىل تۇسىنە توقتاۋ — بارىمىزگە ءمالىم قاراپايىم تالاپ. الايدا بۇل ەرەجەگە باعىنباي، جولدى كەسىپ وتەتىن كەيبىر جۇرگىزۋشىلەر ءوز ءومىرىن عانا ەمەس، اينالاسىنداعى ادامداردىڭ دا ءومىرىن قاتەرگە تىگەدى.
جۋىردا لەرمونتوۆ پەن بۇقار جىراۋ كوشەلەرىنىڭ قيىلىسىندا پاترۋلدىك قىزمەت جۇرگىزۋ كەزىندە Audi-80 اۆتوكولىگىنىڭ جۇرگىزۋشىسى باعدارشامنىڭ تىيىم سالىنعان سيگنالىنا قاراماستان جولدى كەسىپ وتكەنى انىقتالدى. پوليسيا اتالعان قۇقىقبۇزۋشىعا زاڭ اياسىندا ءتيىستى شارا قولداندى.
وكىنىشكە قاراي، مۇنداي جاعدايلار سيرەك ەمەس. كەيبىر جۇرگىزۋشىلەر جول قوزعالىسى ەرەجەلەرىنە سالعىرت قاراپ، ءوز ارەكەتىنىڭ سالدارىن ەسكەرە بەرمەيدى. 2025 جىلدىڭ وزىندە عانا 1265 جۇرگىزۋشى باعدارشامنىڭ قىزىل جارىعىنا توقتاماي، جاۋاپكەرشىلىككە تارتىلعان.
پوليسيانىڭ باستى ماقساتى — ازاماتتاردىڭ ءومىرى مەن دەنساۋلىعىن قورعاۋ، قوعامدىق قاۋىپسىزدىكتى قامتاماسىز ەتۋ جانە مۇلىكتى ساقتاۋ. وسىعان وراي ءتارتىپ ساقشىلارى بارلىق جۇرگىزۋشىلەرگە ۇندەۋ جولدايدى:
«جولدا قانشا اسىقساڭىز دا، ەرەجە مەن ءتارتىپتى ساقتاڭىز. ءبىر ساتتىك جاۋاپسىزدىق ورنى تولماس وكىنىشكە اكەلۋى مۇمكىن!»