كۇن وتكەندە كورسەتىلەتىن العاشقى كومەك قانداي؟ بۇل تۋرالى الماتى بولىمشەلىك كولىكتەگى سانيتراريالىق-ەپيدەميولوگيالىق باقىلاۋ باسقارماسىنىڭ باس مامانى ايتىپ بەردى، - دەپ حابارلايدى Aqshamnews.kz.
كۇن تيۋ — ادامنىڭ ۇزاق ۋاقىت كۇننىڭ استىندا جۇرۋىنەن بولاتىن دەنساۋلىققا زيان جاعداي. بۇل كەزدە كۇننىڭ ىستىعى اعزاعا قاتتى اسەر ەتەدى. ناتيجەسىندە ادام ءوزىن ءالسىز سەزىنەدى، ۇيقىسى كەلە بەرەدى، باسى اۋىرادى، جۇرەگى اينىپ، باسى اينالادى. دەنە قىزۋى كوتەرىلەدى، جۇرەك دۇرىس جۇمىس ىستەمەي، قان قىسىمى نە جوعارىلاپ، نە تومەندەپ كەتۋى مۇمكىن. اۋىر جاعدايلاردا ميعا قان قۇيىلۋى دا مۇمكىن. بۇل كەزدە جۇيكە جۇيەسى (ياعني ادامنىڭ ويلاۋ، قوزعالۋ، سەزىنۋ قابىلەتى) زاقىمدالىپ، وتە ءقاۋىپتى سالدارعا اكەلۋى مۇمكىن.
ونىڭ قانداي ءقاۋپى بار؟
كۇن تيۋ - كۇننىڭ ىستىعىنان اعزاداعى قان تامىرلارى كەڭەيىپ، قان اينالىمى مەن تەرلەۋ پروسەسى بۇزىلعان كەزدە پايدا بولاتىن اۋىر جاعداي. بۇل كەزدە اعزاعا وتتەگى جەتكىلىكسىز بولادى.
ەڭ الدىمەن، جۇيكە جۇيەسى مەن جۇرەك زارداپ شەگەدى. ادامنىڭ جۇرەگى توقتاپ قالۋى، ەسىنەن تانۋى (كوماعا ءتۇسۋى)، ءتىپتى قايتىس بولۋى دا مۇمكىن. سوندىقتان كۇن سوعۋىن دەر كەزىندە بايقاپ، ادامعا شۇعىل كومەك كورسەتۋ وتە ماڭىزدى.
كۇن ءتيۋدىڭ نەگىزگى سەبەپتەرى – كۇن ساۋلەسى، باس كيىمسىز ءجۇرۋ، جامىلعىسىز ءجۇرۋ، سونداي-اق جالاڭاش دەنەسىن كۇيدىرۋ.
كۇن وتكەندە العاشقى كومەك قالاي كورسەتىلۋى كەرەك؟
بەلگىلەرى بولعان جاعدايدا جەدەل جاردەم شاقىرىڭىز.
جەدەل جاردەم كەلگەنگە دەيىن سىزگە:
1. ناۋقاستى كولەڭكەلى جەرگە اپارىپ، جاتقىزۋ كەرەك. جۇرەگى اينىپ، قۇسقىسى كەلسە، ونىڭ باسىن ءبىر جاققا بۇرۋ كەرەك. ادام ءوز قۇسىعىنا تۇنشىعىپ قالماۋى كەرەك.
2. كەۋدە قۋىسى مەن مويىندى قىساتىن كيىمدەردەن بوساتىڭىز، بەلدىكتى شەشىڭىز
3. سۋ بەرىڭىز.
5. بەت پەن دەنەنى شۇبەرەكپەن سالقىن سۋمەن سۋلاڭىز، بالانىڭ ۇستىنە تەمپەراتۋراسى 22-24 ° س بولاتىن سۋ قۇيۋعا بولادى.
6. جابىرلەنۋشىنىڭ اقىل-ويىنان تانعان كەزدە اممياكتى پايدالانىڭىز.
الدىن الۋ شارالارى
كۇن ىستىق كەزدە دالادا كوپ جۇرسەڭىز، باسىڭىزدى مىندەتتى تۇردە كۇننەن قورعاڭىز - اشىق ءتۇستى قالپاق، پاناما نەمەسە جەڭىل شارف كيىڭىز. سونداي-اق اشىق، جەڭىل ماتادان تىگىلگەن كيىم كيگەن دۇرىس.
تاڭعى 10-نان كەشكى 16.00-گە دەيىن كۇن ەڭ قاتتى شاعىلىساتىن ۋاقىت، سول كەزدە دالاعا شىقپاعان ءجون. ەگەر سول ۋاقىتتا دالادا بولۋعا نەمەسە جۇمىس ىستەۋگە تۋرا كەلسە، كولەڭكەدە ءجيى دەمالىپ، دەنەنى سۋىتىپ وتىرۋ قاجەت.
سۋدى كوپ ءىشىڭىز، ساعات سايىن كەمىندە ءبىر ستاقان ىشكەن دۇرىس.