ق ر پرەمەر-مينيسترىنىڭ تاپسىرماسىنا سايكەس، الماتىدا بەيىندى باسقارمالار، ساۋدا دەپارتامەنتى مەن اۋدان اكىمدىكتەرىنىڭ وكىلدەرىنەن تۇراتىن ارناۋلى باقىلاۋ توپتارى قۇرىلدى.
باقىلاۋ جاعى ءىرى ساۋدا نىساندارىن، بازارلار مەن ۇيگە ىرگەلەس تۇرعان دۇكەندەردى قامتىعان. ءقازىر قالادا 51 بازار، 200-دەن استام سۋپەرماركەت پەن شامامەن 4،5 مىڭ وسىنداي شاعىن ساۋدا نۇكتەسى جۇمىس ىستەيدى. جىل باسىنان باستاپ الەۋمەتتىك ماڭىزى بار ازىق-تۇلىكتىڭ ءتىزىمى 19-دان 31 اتاۋعا دەيىن كەڭەيتىلدى.
بۇعان قوسىمشا كوكونىس پەن جەمىس (قىزاناق، قيار، الما)، ەتتىڭ تۇرلەرى، ءسۇت ونىمدەرى، شاي، سونداي-اق بالىقتىڭ بەس ءتۇرى ەنگىزىلدى. جاڭا ونىمدەردىڭ بارلىعى باقىلاۋعا الىنىپ، وسىعان بايلانىستى جەتكىزۋشىلەرمەن جانە ساۋدا جەلىلەرىمەن جۇيەلى جۇمىس جۇرگىزىلىپ جاتىر. 2026 جىلعى 5 قاڭتاردان باستاپ ققس مولشەرلەمەسى 12%-دان 16%-عا كوتەرىلگەنىمەن، الماتىدا ءامات باعاسىنىڭ كۇرت ءوسۋى تىركەلگەن جوق.
ساۋدا جەلىلەرى نەگىزىنەن تەز وتەتىن تاۋارلار جاعىن ۋاقىتىلى قايتا باعالاپ جاتىر، الەۋمەتتىك ماڭىزى بار ونىمدەردىڭ باعاسى ءبىرقالىپتى. قالا اكىمدىگىندە كوكتەمگى كەزەڭدە وڭتۇستىك وڭىرلەردەن، سونداي-اق كورشىلەس وزبەكستان، قىرعىزستان مەن تاجىكستاننان قوسىمشا ەرتە پىسەتىن كوكونىس اكەلۋدى دە جوسپارلاپ وتىرعاندارىن اتاپ ءوتتى.
بۇل باعا تەڭگەرىمىن ساقتاپ، نارىقتى جەتكىلىكتى مولشەردە ونىممەن قامتاماسىز ەتۋگە مۇمكىندىك بەرمەك. قالا بيلىگى الەۋمەتتىك ماڭىزى بار ازىق-تۇلىكتىڭ باعاسىن باقىلاپ وتىرعانىن، ولاردى تۇراقتاندىرۋ جۇمىسى جالعاسىن بەرەتىنىن مالىمدەيدى.