تاۋەلسىز قوعامداستىقتى تارتۋ قاجەت
ازاماتتاردىڭ قۇقىعىنىڭ بۇزىلماۋىنا مۇددەلىمىن. «حابار» تەلەارناسىنا سۇحبات بەرگەن مەملەكەت باسشىسى قاسىم-جومارت توقايەۆ وسىلاي ايتتى، دەپ حابارلايدى Almaty-akshamy.kz.
«ازاماتتار الاڭداۋشىلىق تانىتۋدا، ونى تۇسىنۋگە بولادى. سوندىقتان مەن باس پروكۋراتۋراعا ءاربىر وقيعا بويىنشا تەرگەۋ جۇرگىزۋدى تاپسىردىم. سونىمەن قاتار بۇقارالىق اقپارات قۇرالدارىنان تانىمال قۇقىق قورعاۋشى ايمان وماروۆانىڭ باسشىلىعىمەن قوعامدىق كوميسسيا قۇرىلعانىن ءبىلدىم. مەن بۇل شەشىمگە قولداۋ بىلدىرەمىن. شىنىمەن دە بىزگە ءقازىر ورىن الىپ جاتقان، قايعىلى كۇندەرى ورىن العان جايتتاردى جان-جاقتى انىقتاۋ ءۇشىن تاۋەلسىز قوعامداستىقتى تارتۋ قاجەت»، دەدى مەملەكەت باسشىسى.
قازاقستان پرەزيدەنتى ادام قۇقىقتارى جونىندەگى ومبۋدسمەن ەلميرا ءازىموۆا، تانىمال قۇقىق قورعاۋشى جەمىس تۇرماعامبەتوۆالار تەرگەۋ ورىندارىنا بارىپ، ۇستالعاندارمەن كەزدەسۋ وتكىزىپ جاتقانىن، ولاردى ۇستاۋ جاعدايلارىمەن تانىسىپ، شاعىمدارىنا قۇلاق اساتىندىعىن باسا ايتتى.
«بۇل وتە پايدالى جۇمىس دەپ سانايمىن. مەملەكەت باسشىسى رەتىندە ازاماتتاردىڭ قۇقىقتارىنىڭ بۇزىلماۋىنا مۇددەلىمىن. ءاربىر جاعداي تەرگەلۋى ءتيىس»، - دەدى قاسىم-جومارت توقايەۆ.