كوشەنى قاردان تازارتۋعا 1410 جول جۇمىسشىسى جۇمىلدىرىلدى
الماتىدا 29 قاڭتار كۇنى ساعات 13.00-دە ءسىلبى قار جاۋا باستادى. كوكتايعاقتىڭ الدىن الۋ ماقساتىندا قار جاۋا سالىسىمەن جولدارعا، جول قيىلىستارىنا، كولىك ايرىقتارىنىڭ قۇلامالارىنا كوكتايعاققا قارسى ماتەريالدار سەبىلدى، دەپ حابارلايدى Almaty-akshamy.kz.
الماتى قالاسىنىڭ تۇرعىن ءۇي ساياساتى باسقارماسىنىڭ مالىمەتىنشە، ساعات 18.00-دەگى جاعداي بويىنشا 23 توننا كوكتايعاققا قارسى ماتەريالدار پايدالانىلدى.
تروتۋارلاردى، جاياۋ جۇرگىنشىلەر ايماقتارىن، قوعامدىق كولىك ايالدامالارىن جانە باسقا دا جالپى پايدالانۋ ورىندارىن تازالاۋعا ەرەكشە كوڭىل ءبولىندى.
619 بىرلىك ارنايى تەحنيكا، ونىڭ ىشىندە 203 قۇمشاشقىش جانە 1410 جول جۇمىسشىسى جۇمىلدىرىلدى.
اۋدان اكىمدىكتەرى مەن قالا اكىمدىگىندە قار تازالاۋ جۇمىستارىنىڭ ءوندىرىسىن باقىلاۋ بويىنشا تاۋلىك بويى كەزەكشىلىك ۇيىمداستىرىلدى.
قازگيدرومەتتىڭ بولجامى بويىنشا كەشكە قاراي قاردىڭ ءتۇسۋى توقتايدى. تاڭەرتەڭ تۇسكە دەيىن ازداعان جاۋىن-شاشىن كۇتىلەدى. اۋا تەمپەراتۋراسى تۇندە -4 گرادۋسقا دەيىن، 30 قاڭتاردا كۇندىز 0 شاماسىندا.
