قۇرما جەمىسىن كەز كەلگەن ساۋدا نۇكتەسىنەن تاباسىز. دەگەنمەن، بۇل جەمىستىڭ ءقادىرى ورازا ايى كەزىندە ارتىپ، دۇكەندەردىڭ دە، داستارحان مەن اۋىزاشاردىڭ دا سانىنە اينالىپ شىعا كەلەدى دەسەك، قاتەلەسپەسپىز.
يسلام الەمىندە قۇرمانىڭ ورنى ەرەكشە. ول – قۇران اياتتارىندا كوپ كەزدەسەتىن جەمىس ءتۇرى. سوندىقتان ورازادا مۇسىلماندار اۋىزدى قۇرمامەن اشۋدى سۇننەت دەپ سانايدى. عالىمدار بۇل جەمىستىڭ قۇرامىن زەرتتەگەن كەزدە، كوپتەگەن پايدالى زاتتاردى انىقتاعان.
قۇرامىندا كالييدىڭ جوعارى بولۋى سەبەپتى قازىرگى دارىگەرلەردىڭ ءوزى قۇرمانى جۇرەك قان-تامىر اۋرۋلارىنا پايدالانۋعا كەڭەس بەرەدى. جۇرەك اۋرۋلارى مەن تالماسىنىڭ الدىن الادى. جۇيكە جۇيەسىنە دە اسەر ەتىپ، تىنىشتاندىراتىن قاسيەتكە يە. سونداي-اق، قۇرمانىڭ قۇرامى ماگنييگە وتە باي ەكەن. ال ماگنيي ادام اعزاسىندا اسا قاتەرلى وبىر دەرتىنىڭ پايدا بولۋىنا توسقاۋىل قويادى.
قۇرما – تەرىنىڭ قۇرعاۋى، ەرىننىڭ ءتىلىنىپ كەتۋى، شاشتىڭ ءتۇسۋى، تىرناقتىڭ سىنۋى سەكىلدى جاعدايلاردا دا وتە پايدالى دەسەدى. ونىڭ قۇرامىندا وتە كوپ مولشەردە قانت بار ەكەن، ياعني 60–65 پايىزداي. بۇل بارلىق جەمىسپەن سالىستىرعانداعى ەڭ ۇلكەن كورسەتكىش. سوندىقتان ءتاتتى كامپيتتەردىڭ ورنىنا قۇرمانى جەسەڭىز ءتىپتى جاقسى. ايتپاقشى، يزرايلدە قۇرما مەن الماعا قاتار زەرتتەۋ جۇرگىزىلگەندە، الماعا قاراعاندا قۇرمادا دارۋمەندەردىڭ كوپتىگى دالەلدەنگەن.
قۇرما سونىمەن قاتار، باۋىردى توكسيندەردەن تازارتادى ەكەن. اش قارىنعا جەسە، ىشەكتەگى، باۋىرداعى قۇرتتاردى ولتىرۋگە قاۋقارلى. قۇرمانى، اسىرەسە، ەكولوگياسى ناشار اۋدانداردا تۇراتىن ادامدارعا جەۋگە كەڭەس بەرىلەدى.
ەندەشە، قۇرمادان قۇر قالمايىق. تۇتقان ورازاڭىز قابىل بولسىن!
ازىرلەگەن نۇر جامال.