بالاقايلاردىڭ العاشقى قادامى
عابيت مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترىندا شارل پەرونىڭ «سۇلۋ مەن قۇبىجىق» ميۋزيكلى ساحنالاندى. قويىلىمدا شوقان ءۋاليحانوۆ اتىنداعى ورتا مەكتەپتىڭ 3 «ۆ» سىنىبىنىڭ وقۋشىلارى ونەر كورسەتتى. ولاردىڭ اكتەرلىك شەبەرلىگىنە كورەرمەندەر دە ءتانتى بولدى. سپەكتاكل پرەمەراسىندا قازاقستاننىڭ حالىق ءارتىسى، تەاتر جانە كينورەجيسسەر، كينودراماتۋرگ تالعات تەمەنوۆ وتە جوعارى باعاسىن بەردى.
«مەكتەپ وقۋشىلارىنا بيدەن ساباق بەرەمىن. دەگەنمەن، ەكىنشى ماماندىعىم رەجيسسەرلىك. ءبىراق وسى ۋاقىتقا دەيىن ۇلكەن ساحنالاردا قويىلىم قويعان ەمەسپىن. وسى سىنىپتىڭ ونەرلى ەكەندىگىن بىلتىر بايقاعانمىن. 20 وقۋشىنىڭ ءارقايسىسى جەكە-دارا ونەرلى. وسىلايشا بالاقايلاردىڭ ونەرىن ۇشتاستىرا وتىرىپ، «سۇلۋ مەن قۇبىجىق» قويىلىمىن ساحنالادىق. سپەكتاكلگە دايىندالۋعا 4 اي ۋاقىتىمىز كەتتى. بۇل سپەكتاكل وقۋشىلارعا دا، ماعان دا ونەردەگى قادامىمىز بولدى. قاراپ وتىرساق، بالالارعا ارنالعان ءقازاقتىلدى قويىلىمداردىڭ سانى وتە از. وسى ولقىلىقتىڭ ورنىن تولتىرۋ ماقساتىندا الداعى ۋاقىتتاردا تاعى دا قويىلىمداردى ۇسىنباقپىز»، – دەيدى قويۋشى-رەجيسسەر ازات داۋتوۆ.
وزدەرى كىشكەنتاي بولسا دا ويلارى جۇرىك بالاقايلار اندەرىن مۇدىرمەي، بيلەرىن تاماشا ورىنداپ شىقتى. كورەرمەندەر وقۋشىلاردىڭ ونەرىنە تامسانىپ، ەرەكشە ءىلتيپاتىن ءبىلدىردى. ۇيىمداستىرۋشىلار بالالارعا قولداۋ بىلدىرگەن ع.مۇسىرەپوۆ تەاترىنا العىس ايتتى.
«بىلتىر «بۋراتينو» قويىلىمىن ساحنالاعان ەدى. مەن ولاردىڭ ونەرىن سول كەزدەن بايقاي باستادىم. وسىلايشا ازاتپەن بىرىگىپ سپەكتاكل قويۋدى ۇيىمداستىردىق. اتا-انالارىنىڭ دا قولداۋى بولدى. بالاقايلاردىڭ زەرەكتىلىگى سونشا، 1 ايدىڭ ىشىندە سوزدەردى جاتتاپ الدى. اكتەرلىك پەن ساباقتارىن دا قاتار الىپ ءجۇردى. بۇل قويىلىم ءان مەن ءبيدىڭ ۇشتاسقان كوللابوراسياسى دەسەم، ارتىق ايتپاعانىم. بالالاردىڭ ءتىلى انىق، ءوز رولدەرىن جاقسى الىپ شىقتى دەپ ايتا الامىن. بالالاردىڭ بارلىعى دا تالانتتى، ونەرلى. بارلىعى ءبىزدىڭ مەكتەپتەگى اكتەرلىك ساحنادا ءتالىم الادى. قويىلىمنىڭ اۋدارماسىن، ءسوزىن ءوزىمىز جازدىق. سپەكتاكلدەگى اندەردى بالالار ءوز داۋسىمەن شىرقادى. كيىمدەرىن اتا-انالار ءوز قالتالارىنان كوتەردى. ءبىزدىڭ مەكتەپتىڭ اتىنان شىققان ونەرلى سىنىپ دەپ ماقتانىپ ايتا الامىن»،– دەيدى ۇيىمداستىرۋشى، ۆوكال بويىنشا جەتەكشى ناسيحا گۋماروۆا.
كورەرمەن ءاربىر كەيىپكەردەن وزگەشە كۇش پەن تاڭقالارلىق قابىلەتتى بايقاي كەلە، ولاردىڭ ءبىر عانا ماقساتقا – جاقسىلىق پەن ادىلدىككە ۇندەيتىن ارمان-تىلەگىن سەزىنۋگە مۇمكىندىك الادى. ۇيىمداستىرۋشىلاردىڭ پىكىرىنشە، وقۋشىلاردىڭ ورىنداۋىنداعى سپەكتاكلدەر الداعى ۋاقىتتا ۇلكەن ساحنالاردا دا قويىلماق. وقيعا جەلىسى مەن كەيىپكەرلەر ىس-ارەكەتىن سارالاۋ بارىسىندا جاس جەتكىنشەك جاقسى مەن جاماننىڭ اراجىگىن اجىراتىپ، وزىندىك پىكىر قالىپتاستىرىپ ۇيرەنەدى دەگەن ۇمىتتەمىز.