اۋىزاشار ۋاقىتىندا جۇرگىزۋشىلەر مەن جاياۋ جۇرگىنشىلەرگە سۋ مەن قۇرما تاراتىلدى

قاسيەتتى رامازاندا مۇنداي يگى ءىستى اتىراۋ پوليسەيلەرى جاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

وبلىستىق پوليسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، بۇل – ورازا ۇستاعان جاندارعا قولداۋ كورسەتۋ.

«جىلىنا ءبىر رەت كەلەتىن ايلاردىڭ سۇلتانى – رامازان. بۇل ايدا ادامدار بىر-بىرىنە مەيىرىمدىلىك تانىتىپ، قايىرىمدىلىق كورسەتەدى. بىر-بىرىمىزگە كورسەتكەن جاناشىرلىق پەن قامقورلىق ەلدىڭ ىرىسىن ارتتىرادى. اتىراۋ قالالىق پوليسيا باسقارماسى پاترۋلدىك پوليسيا باتالونىنىڭ قىزمەتكەرلەرى اۋىزاشار ۋاقىتىندا كوشەدەگى جاياۋ جۇرگىنشىلەر مەن كولىك جۇرگىزۋشىلەرىنە قۇرما مەن سۋ تاراتتى. ويتكەنى، جولدا كەپتەلىس پايدا بولۋى مۇمكىن. وزگە دە سەبەپتەرمەن ورازا ۇستاعان جان دىتتەگەن ورىنعا اۋىز اشۋ ءۇشىن دەر كەزىندە جەتە الماي، كەشىگۋى مۇمكىن. وسىنداي سەبەپتەردى ەسكەرگەن پوليسيا قىزمەتكەرلەرى ءدال اۋىزاشار ۋاقىتىندا سۋ مەن قۇرما تاراتۋ ارقىلى ورازا ۇستاعان جاندارعا قولداۋ ءبىلدىردى. سۋ مەن قۇرما سىيلاۋ سونشالىقتى قيىن ءىس ەمەس. بۇل – شىن كوڭىلدەن جاسالعان ءىس. ورازا ۇستاعان جاندارعا ىقىلاسى مەن ءىلتيپات كورسەتۋ ارقىلى جۇرەكتەرگە جىلۋ سىيلاۋ، جاقسىلىق جاساۋعا سەبەپشى بولۋ ارتىق ەتپەيدى»، - دەدى دەپارتامەنتتىڭ باسپا ءسوز قىزمەتى.