ايگىلى "رەال مادريدكە" قارسى ويىندا "قايرات" فك-نىڭ قاقپاسىن قورعاعان شەرحان قالمۇرزا بىرنەشە كۇن ىشىندە جەلى جۇلدىزىنا اينالدى. نەبارى 18 جاستاعى جاس دارىننىڭ شەبەرلىگى مەن ويىنداعى ساتتەرى كوپتىڭ نازارىن اۋداردى. شەرحان قالمۇرزا جايلى ءسىز بىلمەيتىن قانداي دەرەكتەر بار؟ شەتەلدىك ب ا ق قالمۇرزا تۋرالى نە دەپ جاتىر؟ اqshamnews.kz ءتىلشىسىنىڭ ماتەريالىنان ءبىلىڭىز.
قوسشىنىڭ قارا بالاسى چەمپيوندار ليگاسىندا
شەرحان قالمۇرزا اقمولا وبلىسىنداعى قوسشى اۋىلىندا تۋىپ وسكەن. فۋتبولداعى مانسابىن "قايرات" ساپىندا جاستار ليگاسىندا باستادى. جاستار ليگاسىندا ەكى مارتە چەمپيون اتانىپ، 2025 جىلعى كوكتەمدە "قايرات-جاستاردا" تۇراقتى ويناي باستادى.
سۋرەت: e-history.kz
ال ونىڭ جۇلدىزدى ءساتى "قايراتتىڭ" ەكىنشى قاقپاشىسى تەمىرلان اناربەكوۆتىڭ جاراقات الۋىمەن تىكەلەي بايلانىستى. چەمپيوندار ليگاسىنىڭ ىرىكتەۋ كەزەڭىندە "سەلتيككە" قارسى ماچتا شەرحان الاڭعا شىقپاي جاتىپ، قازاقستاندىقتار اراسىندا تانىلىپ كەتكەن ەدى.
سۋرەت: ويىن بارىسىنان
"قايراتتىڭ" ءبىرىنشى قاقپاشىسى الەكساندر زارۋسكيي "سەلتيككە" قارسى ماچتا، ال ەكىنشى قاقپاشى تەمىرلان اناربەكوۆ 14 قىركۇيەكتە "اقتوبەگە" قارسى ويىندا جاعىنان اۋىر جاراقات الىپ، قاقپانى كۇزەتۋ قالمۇرزاعا بۇيىردى. وسىلايشا ونىڭ چەمپيوندار ليگاسىنداعى "جۇلدىزدى جولى" باستالدى.
"سپورتينگكە" قارسى دەبيۋت: پەنالتيدى قايتارعان ەڭ جاس قاقپاشى
18 قىركۇيەكتە ليسسابوندا وتكەن ماچتا شەرحان العاش رەت چەمپيوندار ليگاسىنىڭ "ليگا كەزەڭىندە" قاقپاعا تۇرىپ، العاشقى تايمدا مورتەن حيۋلماندتىڭ پەنالتيىن قايتاردى. ويىن "قايرات" ءۇشىن 1:4 ەسەبىمەن اياقتالعانىمەن، جاس قاقپاشىنىڭ ءساتتى سەيۆتەرى كوپتى تاڭعالدىردى.
جەرگىلىكتى جانە شەتەلدىك باسىلىمدار ونى تۋرنير تاريحىنداعى ەڭ جاس قاقپاشىلاردىڭ ءبىرى ءارى پەنالتي قايتارعان ەڭ جاس فۋتبولشى رەتىندە ەرەكشە اتاپ ءوتتى. ءتىپتى چەمپيوندار ليگاسىنىڭ رەسمي پاراقشاسىنىڭ ۇزدىك سەيۆتەرى تىزىمىنە ەنىپ ۇلگەردى.
"رەال مادريدكە" قارسى تاريحي ماچ
30 قىركۇيەكتە الماتى "ورتالىق ستاديونىندا" "قايرات – "رەال مادريد" كەزدەسۋىندە فاۆوريت كوماندا 5:0 ەسەبىمەن الماتىلىق كلۋبتان باسىم ءتۇستى. دەگەنمەن، بۇل ويىن قازاقستان فۋتبولى ءۇشىن تاريحي كەزدەسۋگە اينالىپ، ماچ بويى شەرحان قالمۇرزا 7 سەيۆ جاسادى. 18 جاستاعى دارىن يەسى ايگىلى فۋتبول جۇلدىزى كيلليان مباپپەنىڭ بىرنەشە سوققىسىن قايتارىپ، ءتىپتى ونى ابىگەرگە سالىپ قويدى. ويىننىڭ 44-مينۋتىندا مباپپەنىڭ قالمۇرزاعا قاراعان كوزقاراسى جەلىدەگى جۇرتتى ءبىراز شۋلاتتى.
سۋرەت: ويىن بارىسىنان
ويىننان كەيىن "رەال مادريد" قاقپاشىسى، ايگىلى تيبا كۋرتۋا شەرحانمەن تىلدەسىپ، ويىن جەيدەلەرىن الماستى. ول ءتىپتى ءوزىنىڭ جەلىدەگى پاراقشاسىندا قازاقستاندىق قاقپاشىمەن تۇسكەن سۋرەتىن جاريالاپ، كەيىن قالمۇرزا جاريالاعان پوستقا پىكىر قالدىرىپ كەتكەن.
"وسى بەتىڭنەن تايما! ىسكە ءسات" دەپ جازدى كۋرتۋا.
اتالمىش ويىننان كەيىن شەرحان قالمۇرزا تاعى دا ۇزدىكتەر تىزىمىنە كىردى. ونىڭ "رەالعا" قارسى ويىنداعى سەيۆتەرىن ۋەفا ەكىنشى رەت توپ تورتتىككە ەنگىزدى.
قالمۇرزا - قازاقستانداعى ەڭ تانىمال فۋتبولشى
كورولدىك كلۋبقا قارسى ويىننان كەيىن قالمۇرزانىڭ Instagram پاراقشاسىندا وقىرمان سانى 300 مىڭنان استى. ءدال ءقازىر ول ەلىمىزدەگى ەڭ تانىمال فۋتبولشىلار رەيتينگىندە كوش باستاپ تۇر.
قازاقستان فۋتبولشىلارىنىڭ جازىلۋشىلار سانى بويىنشا توپ بەستىك:
-
شەرحان قالمۇرزا ("قايرات") — 325 مىڭ جازىلۋشى؛
-
ءباحتيور زاينۋتدينوۆ ("دينامو" ماسكەۋ) — 270 مىڭ جازىلۋشى؛
-
تەمىرلان اناربەكوۆ ("قايرات") — 213 مىڭ جازىلۋشى؛
-
داستان ساتپايەۆ ("قايرات") — 187 مىڭ جازىلۋشى؛
-
باۋىرجان يسلامحان ("استانا") — 115 مىڭ جازىلۋشى.
"ءبىر كۇنى ۇلى ويىنشى اتانادى": شەرحان تۋرالى شەتەلدىكتەر نە دەيدى؟
چەمپيوندار ليگاسى البەتتە الەم نازارىندا. ونىڭ ىشىندە "رەال" ويىنشىلارىنىڭ سوققىسىنا قارسى تۇرعان "قايراتتىڭ" 18 جاستاعى قاقپاشىسى تۋرالى الەم ساراپشىلارى جارىسا جازىپ جاتىر. سولاردىڭ بىرنەشەۋىن ۇسىنامىز:
"شەرحان قالمۇرزا ءبىر كۇنى ۇلى ويىنشى اتانادى. 18 جاس، 3 ايىندا "رەالعا" قارسى ويىندا 7 سەيۆ جاسادى" دەپ جازدى Large Coke.
"مانچەستەر يۋنايتەد سەندەر "قايراتتىڭ" 18 جاستاعى قاقپاشىسىن كورىپ وتىرسىڭدار دەگەن ۇمىتتەمىن؟؟؟" دەلىنگەن Efe Mena جازباسىندا.
"18 جاستاعى "قايرات-الماتى" قاقپاشىسى تاماشا سەيۆتەر جاساپ جاتىر. پوتەنسيالى بار" دەيدى ءبىرى.
"قاقپاشىعا كوبىرەك اقشا تولەۋ كەرەك! كىم مەنىمەن كەلىسەدى؟" دەيدى rozer.
"مۇنى كوپ ەشكىم ايتىپ جاتقان جوق ءبىراق، "قايراتتىڭ" 18 جاستاعى قاقپاشىسىنىڭ سەنىمدىلىگى ۇنايدى. ۋاقىت وتە كەلە ول شىڭدالا تۇسەدى. 18 جاستاعى قاقپاشى ءۇشىن "رەالعا" قارسى 7 سەيۆ كەرەمەت ناتيجە" دەپ جازدى تاعى ءبىرى.
قالمۇرزانىڭ ءوزى عانا ەمەس، اناسى مەن سۇيىكتىسى دە ەل نازارىندا
شەرحاننىڭ اناسى ساۋلە رابايەۆا دا ەل اۋزىندا ءجۇر. ونىڭ سۇلۋلىعى مەن ءوز جاسىنا "جاس كورىنۋى" كوپتى تاڭعالدىردى. جۇرتتىڭ جانارىن جاۋلاعان قالمۇرزانىڭ اناسى مەديا سالاسىنىڭ مامانى ەكەنى بەلگىلى بولدى.
"سامات سماقوۆتىڭ بولاشاق كۇيەۋ بالاسى"
ال شەرحاننىڭ جۇرەگىنىڭ يەسى وزىنەن ەكى جاس ۇلكەن - ساميرا ەسىمدى ارۋ. ول قازاقستانعا تانىمال فۋتبولشى سامات سماقوۆتىڭ قىزى ەكەنى بەلگىلى بولدى. قالمۇرزانىڭ "قالاۋلىسى" الەۋمەتتىك جەلىدە شەرحانمەن ارا-قاتىناسى جايلى اشىق جاريالاپ وتىرادى.
"سەن - مەن ءۇشىن نومەر ءبىرسىڭ. ءاردايىم سەنىڭ جانىڭدامىن! تەك العا، شەرا!"، - دەپ جازدى ول ءوزىنىڭ كەيىنگى ستوريسىندە قالمۇرزانى بەلگىلەپ.
شەرحاننىڭ اناسى دا ۇلىنىڭ سۇيىكتىسى جايلى حاباردار. "بولاشاق كەلىنىمەن" قارىم-قاتىناسى وتە جاقسى ەكەنىن، ءتىپتى ساميرانىڭ اناسىمەن دە جاقسى ارالاساتىندارىن جازعان ەدى.
