الماتىنىڭ مەدەۋ اۋدانىندا كوشەلەر مەن داڭعىلداردى كوگالداندىرۋ جالعاسىپ جاتىر. مىسالى، ءال-فارابي داڭعىلىندا (قاپپاروۆ كوشەسىنەن نازاربايەۆ داڭعىلىنا دەيىن)، سونداي-اق قاجىمۇقان، ساتبايەۆ، اباي، قۇرمانعازى، شيەۆچەنكو، قابانباي باتىر جانە قالداياقوۆ كوشەلەرىندە كورىكتەندىرۋ جۇمىستارى اياقتالدى. مەدەۋ اۋدانى اكىمدىگىنىڭ دەرەگىنشە جاڭا گۇلزارلار، سۋارۋ جۇيەلەرى ايماقتاردى جاسىل بۋلۆارعا اينالدىردى.
كوگالداندىرۋ باعدارلاماسىنىڭ اياسىندا 71،5 مىڭ شارشى اۋماق، ۇزىندىعى 14 شاقىرىم بولاتىن 13 كوشە كوركەيتىلدى.
بۇگىندە دوستىق داڭعىلىندا، بوگەنباي باتىر، قابانباي باتىر، تولە بي، قازىبەك بي كوشەلەرى مەن قۇلجا تاسجولىندا اباتتاندىرۋ جۇمىستارى جالعاسىپ جاتىر.
جالپى، بۋفەرلىك ايماقتارعا باسا نازار اۋدارىلادى: نازاربايەۆ جانە دوستىق داڭعىلدارىندا بۇتالار مەن گۇلدەر وتىرعىزىلادى، ىرگەلەس اۋماقتار اباتتاندىرىلادى. اۋدان تۇرعىندارى ءقازىردىڭ وزىندە وڭ وزگەرىستەردى ايتادى.
«بۇرىن بۇل ايماقتار يەسىز، بوس جاتقان جەرلەر ەدى. ەندى مىنە، كورىكتەندىرۋ جۇمىستارىنىڭ ارقاسىندا تانىماستاي وزگەرىپ، كوركەيىپ شىعا كەلدى. مۇندا سەرۋەندەۋدىڭ ءوزى كەرەمەت»، - دەيدى اۋدان تۇرعىنى ايگۇل.
اۋدان اكىمدىگىندە اتاپ وتكەندەي، جۇمىس ودان ءارى جالعاسادى. الداعى ۋاقىتتا جاسىل ايماقتار كەڭەيتىلىپ، جاڭا اعاشتار وتىرعىزىلىپ، جۇرگىنشىلەر ءۇشىن جايلى كەڭىستىك پايدا بولادى.