بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە وقۋ-اعارتۋ مينيسترلىگى ارنايى جانە ينكليۋزيۆتىك ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ وكىلدەرى ايتتى، دەپ حابارلايدى اlmaty-akshamy.kz.
ورتالىق ديرەكتورى ايگەرىم كۋدەرينوۆا الماتىنىڭ «قابىلداۋ ۇيىندە» 27-28 قازان كۇندەرى "مۇمكىندىگى شەكتەۋلى بالالاردى وقۋ پروسەسسىنە ەنگىزۋ: تاريحى، ماسەلەلەرى جانە دامۋ بولاشاعى" اتتى تاقىرىپتا عىلىمي-پراكتيكالىق كونفەرەنسياسى وتەتىنىن ايتتى. ونىڭ نەگىزگى ماقساتى - ارنايى جانە ينكليۋزيۆتى ءبىلىم بەرۋدىڭ وزەكتى ماسەلەلەرىن تالقىلاۋ. قازىرگى ۋاقىتتا قازاقستان رەسپۋبليكاسىندا 460 ارنايى ءبىلىم بەرۋ ۇيىمى جۇمىس ىستەيدى.
كونفەرەنسيا جۇمىسىنا ق ر وقۋ-اعارتۋ مينيسترلىگىنىڭ وكىلدەرى، وتاندىق جانە شەتەلدىك جەتەكشى عالىمدار، ءبىلىم باسقارمالارى مەن ءبىلىم بولىمدەرىنىڭ ماماندارى، ارنايى ءبىلىم بەرۋ ۇيىمدارىنىڭ ديرەكتورلارى مەن ماماندارى، ۇەۇ وكىلدەرى، جوو وقىتۋشىلارى جانە پەداگوگتار قاتىسادى.
«e-Ymdau» ىمداۋ ءتىلى بويىنشا بەينەسوزدىك - ءبىلىم بەرۋ جۇيەسىندە نەگىزگى جانە قوسىمشا ءبىلىم بەرۋ باعدارلامالارىنىڭ وقۋ ماتەريالىن يگەرۋ پروسەسىندە ىمداۋ ءتىلىن پايدالاناتىن سۋردواۋدارماشىلارعا، مەكتەپ، جوو وقىتۋشىلارىنا جانە كۇندەلىكتى ومىردە ىمداۋ ءتىلىن پايدالاناتىن ەستىمەيتىن ازاماتتارعا ارنالعان تولىقتىرىلاتىن ينتەراكتيۆتى دەرەكتەر بازاسىنىڭ تانىستىرىلىمى وتەتىن بولادى.
بريفينگ بارىسىندا دياگنوستيكا-كەڭەس بەرۋ ءبولىمىنىڭ مەڭگەرۋشىسى، پسيحولوگيا عىلىمدارىنىڭ كانديداتى ءاليا ەرسارينا پسيحولوگيالىق-پەداگوگيكالىق كومەك كورسەتەتىن وڭالتۋ ورتالىقتارىنىڭ، تۇزەتۋ كابينەتتەرىنىڭ، ارنايى جانە جالپى ءبىلىم بەرەتىن مەكتەپكە دەيىنگى ءبىلىم بەرۋ ۇيىمدارىنىڭ پسيحولوگتارىنا ارنالعان «ءاۋتيزمى بار بالالارعا ارنالعان ارنايى دامىتۋ» باعدارلاماسى جايىندا ايتتى. بۇل باعدارلامانى اتا-انالاردى ءاۋتيزمى بار بالانى دامىتۋ جۇمىسىنا تارتۋ ماقساتىندا قولدانۋعا بولادى.
«بۇرىن مۇنداي باعدارلامالار بولماعانىن ايتا كەتەيىن. بۇل باعدارلامانى ازىرلەۋدىڭ قاجەتتىلىگى مەن وزەكتىلىگى ەلىمىزدە اۋتيزممەن اۋىراتىن بالالار سانىنىڭ جىل سايىن كوبەيۋىمەن بايلانىستى. 2021 جىلدىڭ سوڭعى دەرەكتەرى بويىنشا اۋتيزم بەلگىلەرى 8 796 بالادان انىقتالدى»، - دەدى ا.ەرسارينا.
سونىمەن بىرگە كونفەرەنسيا بارىسىندا «ونتوگەنەز بارىسىندا انا ءتىلى جۇيەسىنىڭ قالىپتاسۋى» اتتى مونوگرافيا تانىستىرىلادى. بۇل تۋرالى ورتالىقتىڭ اعا عىلىمي قىزمەتكەرى الماگۇل سەيسەنوۆا ايتتى. ونىڭ ايتۋىنشا، مونوگرافيادا سويلەۋ ءتىلى ونتوگەنەزىنىڭ لينگۆيستيكالىق جانە پسيحولوگيالىق نەگىزدەرى، ناقتى ايتاتىن بولساق، ەرتە جانە مەكتەپكە دەيىنگى جاستاعى بالالاردىڭ انا ءتىلىن مەڭگەرۋدىڭ تەوريالىق ماسەلەلەرى، بالا ءتىلىنىڭ دامۋ كەزەڭدەرى، انا ءتىلىنىڭ فونەتيكالىق جۇيەسىنىڭ ونتوگەنەز بارىسىندا قالىپتاسۋى، ياعني بالانىڭ دىبىس ايتۋىنىڭ پايدا بولۋى، فونەماتيكالىق ەستۋىنىڭ دامۋى، ءسوزدىڭ بۋىندىق قۇرامىن مەڭگەرۋى، ەرتە جاستاعى بالالاردىڭ سوزدىك قورىنىڭ قالىپتاسۋى، مەكتەپكە دەيىنگى جاستاعى بالانىڭ سوزدىك قورىنىڭ دامۋى جانە سويلەۋ ءتىلىنىڭ گرامماتيكالىق قۇرىلىمىن مەڭگەرۋدىڭ كەيبىر اسپەكتىلەرى ايقىندالدى.