الماتى قالاسىنىڭ اۋەزوۆ اۋدانىنىڭ اكىمى ابزال ەگەمبەردييەۆ اۋداندا جۇزەگە اسىرىلىپ جاتقان الەۋمەتتىك سالاداعى اۋقىمدى جوبالار تۋرالى حابارلادى.
«ساپالى الەۋمەتتىك ينفراقۇرىلىمدى دامىتۋ — ەرەكشە باقىلاۋدا. حالىق سانىنىڭ ءوسۋىن ەسكەرە وتىرىپ، مەكتەپ ورىندارىنىڭ تاپشىلىعى مەن بالاباقشالاردىڭ قولجەتىمدىلىگىن جۇيەلى تۇردە شەشىپ كەلەمىز»، — دەدى ابزال ەگەمبەردييەۆ الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا.
بۇگىندە اۋداندا 5 مىڭ مەكتەپ ورنىنا تاپشىلىق بايقالادى. بۇل ماسەلەنى شەشۋ ماقساتىندا بىلتىر قىركۇيەكتە اپاتتى جاعدايدا بولعان №97 مەكتەپ عيماراتىنىڭ ورنىنا 600 ورىندىق جاڭا مەكتەپ سالىندى. جوبانىڭ قۇنى — 5،8 ملرد تەڭگە. سونداي-اق، قاراشا ايىندا №9 مەكتەپكە 1 200 ورىنعا ارنالعان سەيسميكالىق كۇشەيتىلگەن كۇردەلى جوندەۋ جۇرگىزىلدى (1،9 ملرد تگ). قازىرگى ۋاقىتتا №13، №72 جانە №158 مەكتەپتەرىنىڭ جاڭا عيماراتتارىن سالۋ، سونداي-اق №42 مەكتەپكە 300 ورىندىق جانە №1 مەكتەپكە 400 ورىندىق قوسىمشا عيماراتتار سالۋ بويىنشا جوبالىق-سمەتالىق قۇجاتتاما ازىرلەنىپ جاتىر.
«بالاباقشا ورىندارىنىڭ تاپشىلىعىن ازايتۋ — ەڭ باسىم باعىتتاردىڭ ءبىرى. قازىرگى تاڭدا بىزگە 6 مىڭنان استام ورىن جەتىسپەيدى»، — دەدى اۋدان اكىمى.
2025 جىلدىڭ تامىزىنا دەيىن 10-شاعىن اۋداندا 160 ورىندىق (1،6 ملرد تگ) جانە «التىن بەسىك» شاعىن اۋدانىندا 120 ورىندىق (1 ملرد تگ) ەكى جاڭا بالاباقشا پايدالانۋعا بەرىلەدى. سونىمەن قاتار، وسى جىلى مەملەكەتتىك ساراپتامانىڭ قورىتىندىسىنان كەيىن تاۋگۇل شاعىن اۋدانىنداعى اپاتتى عيماراتتىڭ ورنىنا 120 ورىندىق بالاباقشا قۇرىلىسىنىڭ باستالۋى جوسپارلانىپ وتىر.
2025 جىلدىڭ ناۋرىزىنان باستاپ ن.ساس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىنىڭ رەكونسترۋكسياسى جۇرگىزىلۋدە. جوبانىڭ جالپى قۇنى — 23،9 ملرد تەڭگە. جوبانى «BI Urban Construction» ج ش س جۇزەگە اسىرۋدا. قۇرىلىس جۇمىستارى كەلەسى جىلدىڭ ماۋسىم ايىندا اياقتالادى دەپ جوسپارلانعان.
مەديسينالىق سالاعا كەلسەك، اۋدان اكىمى حابارلاعانداي، اقپان ايىندا جەتىسۋ-3 شاعىن اۋدانىندا ەرەكشە قاجەتتىلىكتەرى بار بالالاردى وڭالتۋعا كومەكتەسەتىن «پاراسات» الەۋمەتتىك قىزمەت كورسەتۋ ورتالىعى اشىلدى (اۋدانى 1760 م²)، سونداي-اق، ساۋىردە تاۋگۇل-3 شاعىن اۋدانىنداعى №18 ەمحانا كۇردەلى جوندەۋدەن ءوتتى. جىل سوڭىنا دەيىن №16 ەمحانانىڭ كۇردەلى جوندەۋىن اياقتاۋ جوسپارلانىپ جاتىر.
سونىمەن قاتار، «قۋانىش» شاعىن اۋدانىندا اۋىسىمىنا 300 ادام قابىلداي الاتىن جاڭا ەمحانانىڭ جوباسى ازىرلەنىپ جاتىر.