الماتى قالاسىنىڭ اۋەزوۆ اۋدانىندا قوعامدىق كەڭىستىكتەردى، اۋلالاردى اباتتاندىرۋ جانە تۇرعىن ءۇي ينفراقۇرىلىمىن جاڭعىرتۋ جۇمىستارى قارقىندى جۇرگىزىلۋدە. بۇل جوبالار حالىقتىڭ ءومىر ساپاسىن ارتتىرۋعا باعىتتالعان «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلىپ جاتىر.
الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا اۋەزوۆ اۋدانىنىڭ اكىمى ابزال ەگەمبەردييەۆ قازىرگى ۋاقىتتا اۋداندا ءتورت ءىرى قوعامدىق كەڭىستىكتى اباتتاندىرۋ جۇمىستارى قاتار جۇرگىزىلىپ جاتقانىن حابارلادى. اتاپ ايتقاندا، بۇل — اقساي-4 جانە 12-شاعىن اۋداندارداعى سكۆەرلەر مەن مامىر-4 جانە جەتىسۋ-3 شاعىن اۋداندارىنداعى جاياۋ جۇرگىنشىلەر ايماقتارى. جوبالار اياسىندا بالالار مەن سپورتتىق الاڭدار، كوشە جيھازدارى مەن بەسەدكالار ورناتۋ، جارىقتاندىرۋ جۇيەسىن جاڭارتۋ جانە كوگالداندىرۋ كوزدەلگەن.
نەگىزگى جوبالاردىڭ ءبىرى — سايران كولىن اباتتاندىرۋ. قۇرىلىس جۇمىستارى وتكەن جىلدىڭ سوڭىندا اياقتالىپ، بۇگىندە بۇل اۋماق قالا تۇرعىندارىنىڭ سۇيىكتى دەمالىس ورىندارىنىڭ بىرىنە اينالۋدا. جوبانى قوعامدىق كەڭىستىكتەردى دامىتۋ باسقارماسى جۇزەگە اسىرۋدا.
«قۇرىلىس جانە اباتتاندىرۋ جۇمىستارى تولىق اياقتالعانعا دەيىن سۋ ايدىنىندا شومىلۋعا تىيىم سالىنادى. قاۋىپسىزدىك شارالارىن ساقتاپ، جۇرگىزىلىپ جاتقان جۇمىستارعا تۇسىنىستىكپەن قاراۋلارىڭىزدى سۇرايمىز. قوعامدىق كەڭىستىكتەرگە ۇقىپتى قاراۋ — سۇيىكتى قالامىزدىڭ تازالىعى مەن كوركىنە ءاربىر تۇرعىننىڭ قوسقان ۇلەسى»، — دەدى اۋدان اكىمى ابزال ەگەمبەردييەۆ.
اعىمداعى جىلدىڭ قاراشا ايىنا دەيىن جۇبانوۆ كوشەسىن جانە سايران شاعىناۋدانىنداعى ءبىرقاتار اۋلالاردى اباتتاندىرۋ جانە كوگالداندىرۋ جۇمىستارى تولىق اياقتالادى دەپ جوسپارلانۋدا. جوبا اياسىندا دەمالىس جانە سپورت ايماقتارى، بالالار الاڭدارى، بەينەباقىلاۋ كامەرالارى، شامدار، قوقىس جاشىكتەرى ورناتىلادى، سونداي-اق جاياۋ جۇرگىنشىلەر مەن اۆتوتۇراق ورىندارى اباتتاندىرىلادى.
«حالىق قاتىساتىن بيۋدجەت» باعدارلاماسى دا بەلسەندى جۇزەگە اسىرىلۋدا. 2025 جىلى 30 جوبانى جۇزەگە اسىرۋ جوسپارلانىپ وتىر، ونىڭ ىشىندە 24 جوبا — قوعامدىق كەڭىستىكتەردى، 6 جوبا — اۋلا اۋماقتارىن اباتتاندىرۋعا باعىتتالعان.
اۋلالاردى جاقسارتۋعا دا ەرەكشە كوڭىل بولىنۋدە. 2025 جىلدىڭ مامىر ايىندا 23 اۋلانى كۇردەلى جوندەۋ (1،8 ملرد تەڭگە) جانە 97 اۋلانى اعىمداعى جوندەۋ جۇمىستارى باستالىپ كەتتى. جوبالاردىڭ تولىق اياقتالۋى 2025 جىلدىڭ قىركۇيەگىنە جوسپارلانعان.
2025 جىلى تاعى 25 تۇرعىن ۇيگە ساندىك جارىق ورناتۋ جانە 45 عيماراتتىڭ قاسبەتىن جوندەۋ جوسپارلانىپ وتىر.
سونىمەن قاتار، تۇرعىن ءۇي قورىن جاڭعىرتۋ بويىنشا اۋقىمدى جۇمىستار جۇرگىزىلۋدە. 2025 جىلى 678 ملن تەڭگەگە 45 كوپقاباتتى تۇرعىن ءۇيدى كۇردەلى جوندەۋ جانە 32 ۇيدە 34 ءليفتىنى اۋىستىرۋ (420 ملن تەڭگە) كوزدەلگەن.