الماتى قالاسى اۋەزوۆ اۋدانىنىڭ اكىمى ابزال ەگەمبەردييەۆ الەۋمەتتىك سالاداعى جۇمىستاردىڭ ناتيجەلەرى مەن حالىقتىڭ ءتۇرلى ساناتتارىنا كورسەتىلىپ جاتقان قولداۋ شارالارى تۋرالى ءبولىستى.
«تۇرعىنداردى الەۋمەتتىك قورعاۋ — ءبىزدىڭ باستى جۇمىسىمىزدىڭ ءبىرى. ءبىز بارلىق ساناتتاعى ازاماتتارعا: كوپبالالى وتباسىلارعا، زەينەتكەرلەرگە، مۇمكىندىگى شەكتەۋلى جاندارعا، جاستار مەن بالالارعا قولداۋ كورسەتەمىز»، — دەدى ابزال ەگەمبەردييەۆ.
اۋداندا 15 ءتۇرلى الەۋمەتتىك قىزمەت كورسەتىلەدى.
2025 جىلدىڭ العاشقى بەس ايىندا 174 وتباسى (826 ادام) 61 ملن تەڭگەلىك اتاۋلى الەۋمەتتىك كومەك، 73 ادام تۇرعىن ءۇي كومەگىن الدى. قورىتىندىلاي كەلە، 33 مىڭ تۇرعىنعا 876 ملن تەڭگە كولەمىندە قارجىلاي كومەك كورسەتىلدى.
بۇگىنگى كۇنى اۋداندا 49 مىڭ زەينەتكەر، 4،5 مىڭ كوپبالالى وتباسى جانە 9،5 مىڭ مۇمكىندىگى شەكتەۋلى ازامات (ونىڭ ىشىندە 1،5 مىڭ — بالالار) تۇرادى.
اۋداندا كەلەسى ءتورت الەۋمەتتىك جوبا جۇزەگە اسىرىلۋدا:
- «باقىتتى وتباسى» ورتالىعى — كوپبالالى جانە از قامتىلعان وتباسىلارعا قىزمەت كورسەتەدى (قامتىلعان ادام سانى — 21 مىڭ)،
- «شىڭعا ورلەۋ» كلۋبىنىڭ ءۇش فيليالى — الەۋمەتتىك وسال توپتاعى وتباسىلاردان شىققان 640 بالاعا قوسىمشا ءبىلىم بەرەدى،
- «تەڭ قوعام» ورتالىعى — ەرەكشە قاجەتتىلىكتەرى بار 800-دەن استام ازاماتقا قۇقىقتىق، پسيحولوگيالىق جانە الەۋمەتتىك كومەك كورسەتەدى،
- «بەلسەندى ۇزاق ءومىر» ورتالىعىنىڭ ەكى بولىمشەسى — ەگدە جاستاعى تۇرعىندارعا قىزمەت كورسەتەدى (شامامەن 60 مىڭ ادام).
«بىزدە 41 مىڭنان استام ستۋدەنت تۇرادى. جاستارعا ارنالعان كەڭىستىكتى بەلسەندى تۇردە دامىتىپ جاتىرمىز»، — دەدى ابزال ەگەمبەردييەۆ الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا.
اۋداندا 5 جوعارى وقۋ ورنى (نارحوز، الماتى تەحنولوگيالىق ۋنيۆەرسيتەتى، حالىقارالىق كولىك-گۋمانيتارلىق ۋنيۆەرسيتەت، الماتى گۋمانيتارلىق-ەكونوميكالىق ۋنيۆەرسيتەتى، الماتى تەحنيكالىق ۋنيۆەرسيتەتى) مەن 18 ورتا ارناۋلى ءبىلىم بەرۋ ۇيىمى جۇمىس ىستەيدى.
اۋدان جاستارىنا ارنالعان كوميۋنيتي-ورتالىق بار. بۇل جاستارعا كەشەندى الەۋمەتتىك-قۇقىقتىق، قوعامدىق جانە بوس ۋاقىتتى ءتيىمدى وتكىزۋگە باعىتتالعان قىزمەتتەر ۇسىنادى. جىل سايىن مۇندا 10 مىڭنان استام ستۋدەنت ءتۇرلى قىزمەتتەر الادى.
«مەكتەپ جاسىنداعى بالالاردىڭ دامۋىنا كەلەر بولساق، بۇگىندە «DamuBala» مەملەكەتتىك شىعارماشىلىق جانە سپورتتىق تاپسىرىس باعدارلاماسى ءساتتى جۇزەگە اسىرىلىپ جاتىر. باعدارلاما اياسىندا 18 مىڭنان استام بالا 15 سپورتتىق جانە 18 شىعارماشىلىق باعىتپەن قامتىلعان»، — دەپ اتاپ ءوتتى اۋدان اكىمى.
بۇل باعدارلاما — بالالاردىڭ بوس ۋاقىتىن ۇيىمداستىرۋ مەن جەكە دامۋىنا ارنالعان ماڭىزدى قۇرال. وسىعان بايلانىستى كەلەسى جىلى بۇل باعىتتاعى جۇمىس جالعاساتىن بولادى.
2025 جىلدىڭ باسىنان باستاپ «Damu Bala» باعدارلاماسىنا 8 683 بالا قاتىسىپ، 9 871 ۆاۋچەر پايدالانىلدى (سپورت — 4 632، شىعارماشىلىق — 5 239).
2025 جىلعى 27 ماۋسىمداعى جاعداي بويىنشا اقپاراتتىق جۇيەدە 5 384 بالا تىركەلىپ، 5 604 ۆاۋچەر تىركەلگەن، ونىڭ ىشىندە سپورتقا — 2 470، شىعارماشىلىققا — 3 134.
«Fare Face» باعدارلاماسىندا 1 516 بالا تىركەلگەن، بۇل جالپى قامتىلعان بالالاردىڭ 27% (سپورتتىق تاپسىرىس — 731، شىعارماشىلىق — 785).