قازاقستاندىقتاردى كارتالار بويىنشا اۋدارىمداردان سالىق الۋ تۋرالى جاڭالىق تاڭعالدىردى. كوپتەگەن ازاماتتار ەندى ءاربىر اۋدارىم ءۇشىن 12 پايىز سالىق تولەگەنشە، قولما-قول اقشا قولدانعان دۇرىس دەپ مالىمدەدى، دەپ حابارلايدى aqshamnews.kz
ۇلتتىق ەكونوميكا مينيسترلىگىنىڭ ۇسىنعان سالىق كودەكسىندەگى جاڭا نورمالار جوباسى تۋرالى اقپاراتتى دەپۋتات اسحات ايماعامبەتوۆ الماتىدا، ق ر ءماجىلىسىنىڭ قوعامدىق پالاتاسى وتىرىسىندا ايتتى. جاڭا جوبادا اۋدارىمدار تۋرالى ناقتى اقپارات ايتىلماعانىمەن، دەپۋتات وسى جاڭا نورمانىڭ ەنگىزىلۋى تۋرالى مالىمدەپ، ونىڭ 12 پايىز سالىق سالىنۋى مۇمكىن ەكەنىن ايتتى.
مىسالى، كارتادان كارتاعا اۋدارىم جاساعاندا كوميسسيا 150 تەڭگەنى قۇرايدى. ءبىراق، ەگەر سالىق كودەكسىندەگى جاڭا نورما قابىلدانسا، اۋدارىمدار 12 پايىزعا قىمباتتايدى. بۇل وزگەرىس ەكونوميكا مينيسترلىگىنىڭ بانكتەردىڭ بارلىق قىزمەتتەرىنە، سونىڭ ىشىندە كارتالاردى پايدالانۋ، اۋدارىمدار مەن بانكتىك قىزمەتتەرگە قوسىمشا قوسىلاتىن سالىقتاردى قاراستىرۋى تۋرالى ۇسىنىسى اياسىندا ورىن الىپ وتىر.
ايماعامبەتوۆتىڭ ايتۋىنشا، مينيسترلىك بانكتەر بۇل شىعىنداردى وزدەرى جابادى دەپ ساناسا دا، دەپۋتات بۇنىڭ مۇلدە شىندىققا جاناسپايتىنىن، ويتكەنى بانكتەر ەشقاشان پايدادان باس تارتپايتىنىن ايتتى. وسىلايشا، جاڭا نورما ءاربىر ازاماتقا اسەر ەتەدى.
بۇل ۇسىنىسقا قارسىلىعىن بىلدىرگەندەر اراسىندا ۇلتتىق بانك، قارجىگەرلەر اسسوسياسياسى، ساراپشىلار مەن «اتامەكەن» كاسىپكەرلەر پالاتاسى دا بار. دەگەنمەن، مينيسترلىك وسى وزگەرىستى سالىق كودەكسىنە ەنگىزۋدى ۇسىندى. ايماعامبەتوۆ بۇل باستامانىڭ تەك ازاماتتاردىڭ شىعىندارىن ارتتىرىپ قانا قويماي، قارجى جۇيەسىنە دەگەن سەنىمدى دە تومەندەتەتىنىن ايتادى.
دەپۋتات وسى نورمانى وزگەرتۋ تۋرالى ۇسىنىستار ەنگىزگەنىن ايتتى، ءبىراق ونىڭ قانشالىقتى ءادىل ەكەنىن حالىق ءوزى باعالايتىنىن اتاپ ءوتتى.
بۇل ماسەلەگە بايلانىستى سىرىم يتكۋلوۆقا مينيسترلىك اۋدارىمدارعا سالىناتىن سالىققا قاتىستى تۇسىنىكتەمە بەرگەن. مينيسترلىكتىڭ رەسمي مالىمدەمەسىنە سايكەس، ازاماتتاردىڭ اقشاسىنا سالىق سالىنبايدى، سالىق تەك بانكتەردىڭ ءوز قىزمەتتەرىنە، اتاپ ايتقاندا، اۋدارىمدار مەن كارتالاردى شىعارۋ بويىنشا الىناتىن كوميسسيالاردان عانا الىناتىن بولادى.
مينيسترلىكتىڭ مالىمەتى بويىنشا، بۇعان دەيىن بانكتەر قارجىلىق وپەراسيالارعا قاتىستى جەڭىلدىكتەرگە يە بولىپ، سالىق تولەمەگەن. ءبىراق جاڭا نورما بويىنشا بۇل جەڭىلدىكتەر جويىلماق. مىسالى، باسقا بانككە 10 000 تەڭگە اۋدارعاندا الىناتىن كوميسسيادان سالىق تولەنەتىن بولادى. ال ءبىر بانك ىشىندەگى اۋدارىمدار (مىسالى، Kaspi جۇيەسىندە) سالىققا تارتىلمايدى، سەبەبى مۇنداي وپەراسيالاردا كوميسسيا جوق.
قازىرگى ۋاقىتتا بۇل وزگەرىستەردىڭ ناقتى قالاي جۇزەگە اساتىنى بەلگىسىز، ءبىراق حالىق بۇل تۋرالى قوسىمشا اقپارات الۋ ءۇشىن كۇتۋى قاجەت.
سونىمەن قاتار، سالىق كودەكسىندەگى جوبادا زەينەتاقى قورىنان الىناتىن زەينەتاقى تولەمدەرىنەن جەكە تابىس سالىعىن الىپ تاستاۋ جانە 10 جىلدان اسقان كولىكتەر ءۇشىن كولىك سالىعىن 30%-عا، ال 20 جىلدان استام كولىكتەر ءۇشىن 50%-عا تومەندەتۋ ۇسىنىلدى.