پاريجدەگى شارل دە گولل اۋەجايىندا قار جاۋۋىنا بايلانىستى شامامەن 100 رەيس، ال ورلي اۋەجايىندا 40-قا جۋىق رەيس توقتاتىلدى، - دەپ حابارلايدى Aqshamnews.kz.
بۇل تۋرالى فرانسيانىڭ كولىك ءمينيسترى فيليپپ تابارو مالىمدەدى.
ونىڭ ايتۋىنشا، پاريجدە قولايسىز اۋا رايى ساقتالۋىنا بايلانىستى رەيستەردىڭ توقتاتىلۋى ءبىر كۇن بۇرىن-اق كۇتىلگەن. ۇشۋ-قونۋ جولاقتارىن قاردان تازالاۋ جانە ۇشاقتاردى مۇزدان ارىلتۋ جۇمىستارىنا بايلانىستى بۇل شارالار شارل دە گولل اۋەجايىندا تاڭعى 9:00-دەن 14:00-گە دەيىن جوسپارلانعان رەيستەردىڭ شامامەن 40 پايىزىنا، ال ورلي اۋەجايىندا تاڭعى 6:00-دەن 13:00-گە دەيىنگى رەيستەردىڭ 25 پايىزىنا اسەر ەتكەن.
قار مەن كوكتايعاق فرانسيانىڭ سولتۇستىك-باتىسىنداعى كەڭ اۋماقتا اۆتوكولىك، اۋە جانە تەمىرجول قاتىناسىنىڭ، سونداي-اق قوعامدىق كولىكتىڭ جۇمىسىنا كەدەرگى كەلتىردى. ەلدىڭ 38 دەپارتامەنتىندە ءقاۋىپتىڭ "قىزعىلت سارى" دەڭگەيى جاريالانعان.
بۇكىل فرانسيا بويىنشا جول كەپتەلىستەرىنىڭ جالپى ۇزىندىعى 1 600 شاقىرىمنان استى، ونىڭ ىشىندە يل-دە-فرانس وڭىرىندە شامامەن 950 شاقىرىمدى قۇرايدى.