اتىراۋدا تۇنگى كلۋبتاردىڭ بىرىندە ەر ادام سوققىعا جىعىلعان ءساتتىڭ ۆيدەوسى الەۋمەتتىك جەلىدە تارادى، دەپ حابارلايدى Aqshamnews.kz ءتىلشىسى.
الدىن الا مالىمەتكە سايكەس، وقيعا 18 قاڭتار كۇنى تۇندە «Zillon» تۇنگى بارىندا بولعان.
جەلىدە جاريالانعان بەينەجازبادا جانجالدىڭ الدىمەن مەكەمە ىشىندە باستالعانى بايقالادى. كادرلاردان ەكى ەر ادامنىڭ ءبىر ادامعا كۇش كورسەتكەنىن كورۋگە بولادى. كەيىن اراشا تۇسپەك بولعان ءۇشىنشى ادام دا سوققى العان.
توبەلەس ودان ءارى دالادا جالعاسقان. وقيعاعا بايلانىستى اتىراۋ وبلىستىق پوليسيا دەپارتامەنتى تۇسىنىكتەمە بەردى.
ۆەدومستۆونىڭ مالىمەتىنشە، 18 قاڭتار كۇنى «102» نومىرىنە قالاداعى ويىن-ساۋىق ورىندارىنىڭ بىرىندە قۇقىققا قارسى ارەكەت جاسالعانى تۋرالى حابار تۇسكەن.
«پوليسيا قىزمەتكەرلەرى 32 جانە 33 جاستاعى ەكى كۇدىكتىنى انىقتاپ، ۇستادى. اتالعان دەرەك بويىنشا بۇزاقىلىق بابىمەن سوتقا دەيىنگى تەرگەپ-تەكسەرۋ باستالدى. كۇدىكتىلەر ۋاقىتشا ۇستاۋ يزولياتورىنا قامالدى»، – دەلىنگەن پوليسيانىڭ حابارلاماسىندا.