2025 جىلى قازاقستاندا 54،4 مىڭ وتباسىنى قامتىعان 292،7 مىڭ ادامعا جالپى سوماسى 33،4 ملرد تەڭگە اتاۋلى الەۋمەتتىك كومەك (ااك) تولەندى، دەپ حابارلايدى Aqshamnews.kz ءتىلشىسى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، اتاۋلى الەۋمەتتىك كومەكتىڭ نەگىزگى ماقساتى – وتباسىلارعا اقشالاي قولداۋ كورسەتۋ جانە ەڭبەككە قابىلەتتى مۇشەلەرىن جۇمىسپەن قامتۋدىڭ بەلسەندى شارالارىنا تارتۋ ارقىلى قيىن ومىرلىك جاعدايدان شىعۋىنا ىقپال ەتۋ.
ااك اياسىندا تابىسى كەدەيلىك شەگىنەن اسپايتىن ازاماتتارعا توقسان سايىن الەۋمەتتىك كومەك تاعايىندالادى. سونىمەن قاتار، تابىسى از وتباسىلارداعى 1 جاستان 6 جاسقا دەيىنگى ءار بالاعا اي سايىن 1،5 اەك مولشەرىندە قوسىمشا تولەم قاراستىرىلعان. 2025 جىلى ااك الۋشى وتباسىلار قاتارىنداعى مەكتەپ جاسىنا دەيىنگى 91،1 مىڭ بالاعا 4،1 ملرد تەڭگە كولەمىندە قوسىمشا تولەم بەرىلگەن.
بۇدان بولەك، اتاۋلى الەۋمەتتىك كومەك الۋشىلاردى جۇمىسپەن قامتۋ شارالارى دا جۇزەگە اسىرىلادى. اتاپ ايتقاندا، جۇمىسقا ورنالاستىرۋ، ءوز ءىسىن اشۋعا نيەتتى وتباسىلارعا گرانت بەرۋ، قاجەت بولعان جاعدايدا بىلىكتىلىكتى ارتتىرۋ كۋرستارىنا جولداۋ كوزدەلگەن.
ااك تاعايىنداۋ ءۇشىن ءوتىنىشتى ازاماتتار تۇرعىلىقتى جەرى بويىنشا مانساپ ورتالىعىنا، اۋىلدىق وكرۋگ اكىمدىگىنە نەمەسە ەلەكتروندىق ۇكىمەت پورتالى (egov.kz) ارقىلى بەرە الادى.
ايتا كەتەيىك، جاۋاپتى مينيسترلىك باسشىسى پرەزيدەنت قاسىم-جومارت توقايەۆقا بەرگەن ەسەبىندە قازاقستاندا ااك تولەۋدىڭ جاڭا ءتاسىلى ەنگىزىلەتىنىن حابارلاعان. ال 2024 جىلدىڭ قورىتىندىسى بويىنشا 413،7 مىڭ ادامعا 39،5 ملرد تەڭگە كولەمىندە اتاۋلى الەۋمەتتىك كومەك كورسەتىلگەن.