جەتىسۋ وبلىسىنىڭ پوليسەيلەرى 32 جاستاعى ايەلدىڭ ولىمىنە قاتىستى ءىستىڭ تەرگەلۋ بارىسىن ءتۇسىندىردى، - دەپ حابارلايدى aqshamnews.kz ءتىلشىسى.
نە بولدى؟
بۇعان دەيىن وقيعا تۋرالى جۋرناليست ساندۋعاش دۇيسەنوۆا حابارلاعان بولاتىن. قايتىس بولعان ايەل ايزاتتىڭ تۋىستارى ونىڭ ولىمىنە كۇيەۋىن كىنالاپ وتىر. ولاردىڭ ايتۋىنشا، ەر ادام ايەلىن بىرنەشە ساعات بويى كىشكەنتاي قىزىنىڭ كوزىنشە اياۋسىز ۇرىپ-سوققان. ايزاتتىڭ اۋىر جاراقاتتار العانى انىقتالدى: باس سۇيەك-مي جاراقاتى، سۇيەك سىنىقتارى، دەنەسىن سۇيرەتكەن ىزدەر. تۋىستارىنىڭ مالىمدەۋىنشە، ەر ادام ايەلدى ارقانعا بايلاپ، دالادا سۇيرگەن، ونىڭ بىلەك تەرىسى سىدىرىلعان.
ايزات 22 ماۋسىمعا قاراعان ءتۇنى تالدىقورعانداعى اۋرۋحاناعا جەتكىزىلگەن. الايدا دارىگەرلەر ونىڭ اۋرۋحاناعا جەتكەنشە كوز جۇمعانىن ايتقان. جاقىندارى كۇيەۋىنىڭ زورلىق-زومبىلىق ىزدەرىن جاسىرۋعا تىرىسقانىن العا تارتادى.
كۋاگەرلەردىڭ سوزىنە قاراعاندا، ەر ادام وقيعا كەزىندە ماس كۇيدە بولىپ، اگرەسسيۆ ارەكەتتەر جاساعان. ول ايەلىنىڭ تەرەزەدەن قۇلاپ كەتكەنىن ايتپاق بولعان. الايدا مارقۇمنىڭ تۋىستارى بۇل ازاپتاۋ جانە قاساقانا كىسى ءولتىرۋ دەپ سانايدى.
ءقازىر بۇل ءىس ق ر قىلمىستىق كودەكسىنىڭ 106-بابى، 3-بولىگى ("دەنساۋلىققا قاساقانا اۋىر زيان كەلتىرۋ") بويىنشا تەرگەلىپ جاتىر. مارقۇمنىڭ جاقىندارى بۇل باپتى اسا قاتىگەزدىكپەن جاسالعان ادام ءولتىرۋ رەتىندە قايتا سارالاۋدى تالاپ ەتىپ جاتىر.
پوليسيانىڭ مالىمدەمەسى
جەتىسۋ وبلىسى پوليسيا دەپارتامەنتىنىڭ حابارلاۋىنشا، 22 ماۋسىمدا بولعان ايەل ولىمىنە بايلانىستى سوتالدى تەرگەۋ جۇمىستارى ءجۇرىپ جاتىر. كۇدىكتى وقيعا بولعان العاشقى كۇننەن باستاپ قاماۋعا الىنعان. ءقازىر ءبىرقاتار سوت-مەديسينالىق ساراپتاما ناتيجەسى كۇتىلەدى. وسى قورىتىندىلاردىڭ نەگىزىندە پروكۋراتۋرامەن كەلىسە وتىرىپ، كۇدىكتىنىڭ ىس-ارەكەتىنە ناقتى قۇقىقتىق باعا بەرىلەدى.
"الەۋمەتتىك جەلىلەردە ءتۇرلى راستالماعان مالىمەتتەر مەن بولجامدار تارالىپ جاتىر. قازاقستان زاڭناماسىنا سايكەس، كورىنەۋ جالعان اقپارات تاراتقاندار زاڭ الدىندا جاۋاپ بەرەدى"، – دەلىنگەن پوليسيا حابارلاماسىندا.
قۇقىق قورعاۋ ورگاندارى ازاماتتاردى تەك رەسمي اقپارات كوزدەرىنە سەنۋگە جانە تەرگەۋ بارىسىنا ىقپال ەتۋى نەمەسە جۇرتشىلىقتى شاتاستىرۋى مۇمكىن جالعان دەرەكتەردى جاريالاپ، تاراتۋدان باس تارتۋعا شاقىردى.
ءقازىر پوليسيا بۇل ءىستى ق ر قك-نىڭ 106-بابى 3-بولىگى بويىنشا تەرگەپ جاتىر. مارقۇمنىڭ تۋىستارى ءىستى ەرەكشە قاتىگەزدىكپەن جاسالعان ادام ءولتىرۋ رەتىندە قايتا سارالاۋدى تالاپ ەتىپ وتىر.