مەملەكەت باسشىسى قاسىم-جومارت كەمەل ۇلى توقايەۆ 2026 جىلعى 05 قاڭتاردا «تۇركىستان» گازەتىنە بەرگەن سۇقباتىندا «اسكەري قىزمەتتىڭ ابىروي-بەدەلىن كوتەرۋ جانە ەلىمىزدىڭ قورعانىس قابىلەتىن ارتتىرۋ – مەملەكەتتىڭ باستى باسىمدىعىنىڭ ءبىرى. قارۋلى كۇشتەرىمىزدى تەحنولوگيالىق تۇرعىدان جاڭعىرتۋ جۇمىسى قارقىندى جۇرگىزىلە باستادى. بىلتىر ۇلى جەڭىستىڭ 80 جىلدىعىنا وراي وتكىزىلگەن اسكەري شەرۋدى شەتەلدىك ساياساتكەرلەر مەن اسكەري قايراتكەرلەر جوعارى باعالادى، بۇل ءىس-شارا ارميامىزدىڭ زاماناۋي قارۋ-جاراقپەن جانە تەحنيكامەن، سونىڭ ىشىندە قازاقستاندا جاسالعان ونىمدەرمەن تولىق جابدىقتالعانىن، سونداي-اق، اسكەري قىزمەتشىلەرىمىزدىڭ دايىندىعى وتە جاقسى ەكەنىن ايقىن كورسەتتى» دەگەن بولاتىن.
«Atamnyn Amanaty» ۇيىمىنىڭ ميسسياسى - تاريحي جادىنى ساقتاۋ، ۇرپاقتار ساباقتاستىعىن ارتتىرۋ، جاستارعا رۋحاني-ادامگەرشىلىك جانە اسكەري-پاتريوتتىق تاربيە بەرۋ جانە وسى باعىتتا مەملەكەتكە بارىنشا قولداۋ كورسەتۋ. قازاقستان سول سوعىستا حابار-وشارسىز كەتكەن ازاماتتارىن ىزدەۋشى الەمدەگى ساناۋلى مەملەكەتتەردىڭ قاتارىنان. مايدانعا كەتىپ، ءىز-تۇزسىز جوعالعانداردىڭ سانى 271 مىڭنان اسادى. بۇل شارۋامەن 2019 جىلدىڭ 19 مامىرىندا قۇرىلعان «Atamnyn Amanaty» قوعامدىق بىرلەستىگى اينالىسادى. سودان بەرى ۇيىمنىڭ رەسمي سايتى، الەۋمەتتىك جەلىلەرى جانە بايلانىس تەلەفوندارى ارقىلى حابارسىز كەتكەندەردى ىزدەستىرۋگە 12 مىڭنان استام ءوتىنىش كەلىپ تۇسكەن. 4500-دەن استام قازاقستاندىق جاۋىنگەرلەردىڭ جەرلەنگەن جەرلەرى مەن جەكە باستارىن انىقتالدى. مايدان دالاسىنان تابىلعان 23 ساربازدىڭ سۇيەگى قازاقستانعا جەتكىزىلىپ، اسكەري قۇرمەتپەن سالتاناتتى تۇردە جەرلەندى.
دالالىق قازبا جۇمىستارىن جۇرگىزۋدە ءبىزدىڭ ۇيىمنىڭ ءبىرشاما تاجىريبەسى بار. ءبىزدىڭ ەرىكتىلەر جاساعى رەسەيدىڭ كالۋگا وبلىسى اۋماعىنداعى «باتىس مايدانى. ۆارشاۆا تاس جولى» حالىقارالىق اسكەري-تاريحي ەكسپەديسياسىنا تۇراقتى تۇردە قاتىسىپ كەلەدى. بىرەر جىل بۇرىن ءبىزدىڭ ەرىكتىلىەر 387ء-شى اقمولا اتقىشتار ديۆيزياسى سوعىسقان ۋليانوۆسك اۋدانىندا جەرلەستەرىمىزدىڭ قۇرمەتىنە ەسكەرتكىش-بەلگى ورناتىپ قايتتى.
وسكەلەڭ ۇرپاق ءوزىنىڭ وتكەن تاريحىن بىلۋگە ءتيىس. ماسەلەن، «اتالار اماناتىنا ادالمىز» اتتى اكسياسىن ۇيىمداستىرۋ داىستۇرگە اينالدى. اكسيا اياسىندا ءاربىر كوللەدجدىڭ ستۋدەنتتەرى قازاقستاندا جاساقتالىپ، ەكىنشى دۇنيەجۇزىلىك سوعىسقا قاتىسقان دۆيزيالار مەن قۇرمالاردىڭ تاريحىن، مايدان جولىن زەرتتەپ، سولار جونىندە عىلىمي-ىزدەستىرۋ جۇمىستارىن جاسايدى.
«مىڭ ەستىگەننەن ءبىر رەت كورگەن ارتىق» دەيدى قازاق. سول سەبەپتى استانا قالاسىنىڭ ءبىر توپ ستۋدەنتتەرىن قالا تۇبىندەگى اسكەري بولىمدەرگە الىپ بارۋ داستۇرگە اينالدى. جاسوسپىرىمدەر ساپار بارىسىندا كازارمادان باستاپ، قارۋ-جاراق، اسكەري تەحنيكالارمەن، ءيىسشىل يتەرمەن تانىسىپ، سولدات بوتقاسىنان ءدام تاتىپ، جاۋىنگەرلىك ومىرمەن ەتەنە تانىسادى. ءبىر كۇننىڭ ىشىندە ولاردىڭ اسكەري قىزمەتكە دەگەن كوزقاراستارى تۇبەگەيلى وزگەردى دەۋگە بولادى. كوبى بۇرىنعى ويلارىنان اينىپ، قاجەت بولسا وتان قورعاۋشىسى رەتىندە ساپقا تۇرۋعا تىلەك ءبىلدىرىپ جاتادى.
ۇلى ابايدىڭ: «ءولدى دەۋگە بولا ما ايتىڭدارشى، ولمەيتۇعىن ارتىندا ءسوز قالدىرعان؟» دەگەن ولەڭ جولدارىن سوڭىنا وشپەس ءىز تاستاپ، ولمەس ەرلىك جاساعان كەز كەلگەن ازاماتقا ايتۋعا بولاتىنداي. كەشەگى قان مايداندا قاس دۇشپانەمەن ارىستانداي ايقاسقان باتىردىڭ ءبىرى – بايبول راحمەتوۆ. زەڭبىرەك كوزدەۋشىسى بولعان سىر پەرزەنتىنىڭ سۇيەگى سەكسەن جىلدان استام ۋاقىت وتكەن سوڭ پسكوۆ تۇبىنەن تابىلىپ وتىر. توپىراق استىنان وزىمەن بىرگە كوزى تىرىسىندە قاھارماندىعى ءۇشىن العان «قىزىل جۇلدىز» وردەنى مەن «ەرلىگى ءۇشىن» مەدالى بىرگە شىقتى. سۇيەگى پسكوۆ وبلىسىنان تابىلعان تاعى ءبىر بوزداق ول - وڭتۇستىك قازاقستان وبلىسى، شايان اۋدانى، اقباستاۋ اۋىلىندا 1921 جىلى دۇنيەگە كەلگەن مۇساحان قالمىرزايەۆ. ونىڭ دا دەرەگى «ەرلىگى ءۇشىن» مەدالىنىڭ نومەرى ارقىلى انىقتالدى.
بىلتىرعى جىلدىڭ باستى وقيعالارىنىڭ ءبىرى – وسى ەكى مايدانگەردىڭ ەلگە ورالۋى دەۋگە بولادى. 2025 جىلدىڭ سوڭعى كۇندەرى ولاردىڭ سۇيەگى اسكەري ۇشاقپەن قازاقستانعا جەتكىزىلىپ، 80 جىلدان استام ۋاقىت سارىلا كۇتكەن تۋىستارىنا تابىس ەتىلدى. سوسىن ءبىرى تۇركىستان وبلىسىندا، ەكىنشىسى قىزىلوردا وبلىسىندا اسكەري قۇرمەتپەن جەرلەندى. ءبىز وسى ساۋاپتى ىسكە اتسالىسقان بارلىق ازاماتتارعا العىس ايتامىز. ال، «Atamnyn Amanaty» قوعامدىق بىرلەستىگىنىڭ جۇمىسى جاڭا جىلدا دا جالعاسا بەرمەك.
مىسالى جاڭا 2026 جىلعا مىناداي جوبالاردى ازىرلەپ، سولاردى ىسكە اسىرۋدان ءۇمىتتىمىز:
1. قازاقستاننان شاقىرىلعان جانە ەكىنشى دۇنيەجۇزىلىك سوعىسقا قاتىسقان سولداتتار مەن وفيسەرلەر تۋرالى ەلەكتروندىق دەرەكقور قۇرۋ. ۇلتتىق پلاتفورما ناقتى اقپاراتتى ساقتاپ، ولاردىڭ ەسىمدەرىن ۇرپاقتارعا جەتكىزىپ، ولاردىڭ ۇلەستەرىن مويىنداۋدى قامتاماسىز ەتەدى.
2. حالىقارالىق اسكەري-تاريحي ەكسپەديسيا «باتىس قازاقستان – ستالينگراد شايقاسىنىڭ الدىڭعى شەبى». ماقسات — سوعىستا قازا تاپقان سولداتتاردىڭ جانە بەيبىت تۇرعىنداردىڭ سۇيەكتەرىن كوتەرىپ، ەسىمدەرىن قالپىنا كەلتىرىپ، ەسكەرتكىشتەر ورناتۋ. بوكەيوردا اۋدانىندا زەرتتەۋ مەن ماڭگى ەستە ساقتاۋ قاجەت 40-50 باۋىرلاس ءقابىر بار.
3. سوعىس جىلدارى قازاقستان اۋماعىندا ەۆاكۋاسيالىق گوسپيتالداردىڭ تاريحىن زەرتتەۋ، گوسپيتالدارعا جەرلەنگەن ورىنداردى انىقتاۋ، ولاردى اباتتاندىرۋ جانە ەستەلىك تاقتايشالارىن ورناتۋ. سوعىس جىلدارى قازاقستاندا شامامەن 150 000 جارالى ەمدەلدى، ولاردىڭ كوپشىلىگى قازا تاۋىپ، جەرگىلىكتى زيراتتارعا جەرلەندى.
4. ەۋروپادا قازا تاپقان قازاقستاندىق سولداتتاردى ىزدەۋ. قولدا بار دەرەكتەرگە سايكەس، 2،2 ميلليوننان استام قىزىل اسكەرلەر، ونىڭ ىشىندە قازاقستاندىقتار دا بار، بەلگىسىز جاۋىنگەرلەر رەتىندە جەرلەنگەن. بۇل جوبا ولاردىڭ ەسىمدەرىن قالپىنا كەلتىرىپ، قازاقستاننىڭ جەڭىسكە قوسقان ۇلەسىن حالىقارالىق دەڭگەيدە مويىنداۋعا كومەكتەسەدى.
بۇل اتا-بابا اماناتىن ورىنداۋعا، ەرلىكتى ۇمىتپاۋعا، ەلدىكتى ۇلىقتۋعا، جانە ۇلت تاريحىنداعى تاعى ءبىر اقتاڭداقتى جابۋعا باعىتتالعان يگىلىكتى ءىس بولىپ تابىلادى. ويتكەنى وسكەلەڭ ۇرپاقتىڭ بويىندا رۋحاني-ادامگەرشىلىك قۇندىلىقتاردى، وتانسۇيگىشتىك سەزىمدى قالىپتاستىرۋ مەملەكەت باسشىسى ايتقانداي ورتاق پارىزىمىز.
مايداندا حابار-وشارسىز كەتكەن تۋىستارىن ىزدەستىرەم دەگەن ادامدار بولسا بىزگە تومەندەگى بايلانىس تەلەفوندارى ارقىلى تەگىن ءوتىنىش بەرە الادى: 8 -776 -828- 45- 35؛ 8-776- 828- 45- 34؛ 8 -701- 999- 78 -20، ata.amanaty@gmail.com.
مۇرات مولداعالييەۆ،
«Atamnyn Amanaty» قب باسقارما ءتوراعاسى