استانا مەكتەپ وقۋشىسى زاعيپ جاندارعا ارنايى كوزىلدىرىك ويلاپ تاپتى. اqshamnews.kz ءتىلشىسى ونەرتاپقىشپەن قۇرىلعى تۋرالى سۇحباتتاستى.
استانادا قوشكە كەمەڭگەر ۇلى اتىنداعى №49 مەكتەپ-گيمنازياسىنىڭ 10-سىنىپ وقۋشىسى قۋاندىق اميرحان كوزى ناشار كورەتىن جانداردىڭ ءومىرىن جەڭىلدەتۋدى ماقسات ەتكەن ەرەكشە جوبا ازىرلەدى. بۇل - زاعيپ ادامدارعا ارنالعان "اقىلدى كوزىلدىرىك". ونىڭ باستى ەرەكشەلىگى – قازاق تىلىندە جاسالعان وتاندىق يننوۆاسيا مەن باعاسىنىڭ قولجەتىمدىلىگى.
قۋاندىق اميرحاننىڭ ايتۋىنشا، بۇل يدەيا وعان ءبىر جىل بۇرىن الماتى مەتروسىندا بولعان وقيعادان كەيىن كەلگەن. سول كەزدە مەترو استىنا ءتۇسىپ، قازا تاپقان زاعيپ جاننىڭ جاعدايى بۇكىل ەلدى دۇرسىلكىندىرگەن ەدى.
"بۇل قايعىلى جاعداي تۋرالى روبوتوتەحنيكادان بەرەتىن جەتەكشى اعايىمنان ءبىلدىم. ول ۇسىنىس جاساعاندا بىردەن كەلىستىم. ناتيجەسىندە وسىنداي تۋىندى پايدا بولدى. زاعيپ جاندارعا تيتتەي بولسىن كومەك بولادى دەگەن سەنىمدەمىز"، - دەيدى قۋاندىق اميرحان.
انىقتاما: 2024 جىلى 10 جەلتوقساندا الماتىداعى مەترودا ءبىر ادام رەلسكە ءتۇسىپ، قايتىس بولدى. كەيىن "اباي" بەكەتى ۋاقىتشا جابىلعان ەدى. ءبىر جىلدان سوڭ بەكەتتەردە قورشاۋلار قويىلا باستادى. مەتروپوليتەن مالىمەتىنە سۇيەنسەك، "رايىمبەك باتىر" بەكەتىندە بيىل اقپاندا مەتروپوليتەننىڭ زاماناۋي قاۋىپسىزدىك ستاندارتتارىنا سايكەس كەلەتىن جاڭا ۋاقىتشا قورشاۋلار ورناتىلعان. ولار ەكى نەگىزگى قىزمەت اتقارادى: قورعانىس قۇرالى جانە جارنامالىق قۇرىلىم رەتىندە پايدالانىلماق.
ونەرتاپقىشتىڭ ايتۋىنشا، قۇرىلعىنى جاساۋعا نەبارى 1 اپتا مەن 10 مىڭ تەڭگە جۇمسالعان. جوبانى قۋاندىق اميرحاننىڭ جەتەكشىسى تولىق قارجىلاندىرعان.
"اقىلدى كوزىلدىرىكتىڭ" باستى ەرەكشەلىگى - ول ادامنىڭ الدىنداعى كەدەرگىنى ءبىر مەتر قاشىقتان انىقتاپ، قازاق تىلىندە:
"ساقتانىڭىز، الدىڭىزدا كەدەرگى!" - دەگەن داۋىس ارقىلى ەسكەرتەدى.
بۇل جۇيە زاعيپ جاندارعا قالا كوشەلەرىندە ەركىن ءارى ءقاۋىپسىز قوزعالۋىنا مۇمكىندىك بەرەدى.
"مەنىڭ ماقساتىم - مۇمكىندىگى شەكتەۋلى ادامداردى قوعامنىڭ تولىققاندى مۇشەسى رەتىندە سەزىنۋىنە كومەكتەسۋ. ءقازىر كوزىلدىرىكتىڭ باسقا دا نۇسقالارىن جەتىلدىرۋدى جوسپارلاپ ءجۇرمىن. ءقازىر قۇرىلعى تەك دىبىستارعا اسەر ەتىپ، بەلگى بەرەدى. ونى جەتىلدىرىپ، تەك دىبىس ەمەس، سونىمەن قاتار، بەينە باقىلاۋ ورناتىپ، الدىنداعى كەدەرگىلەردى دە بايقايتىنداي مۇمكىندىك جاساعىمىز كەلەدى"، - دەيدى جاس ونەرتاپقىش.
قۋاندىق اميرحاننىڭ ايتۋىنشا، قۇرىلعىنىڭ باعاسى قولجەتىمدى بولماق.
"ءقازىر 285 ميلليون ادام كورۋ قابىلەتىنەن ايىرىلعان. ال ەلىمىزدە 10 مىڭنان اسا ادام وسى قيىندىقپەن ءومىر ءسۇرىپ ءجۇر. باعانى 15 مىڭ تەڭگەگە جۋىقتاپ قويامىز دەپ جوسپارلادىق. ءالى نارىققا شىعارعان جوقپىز. ءبىزدىڭ ماقسات - يننواسيا ارقىلى قوعامدا پايدالى بولۋ، ادام ءومىرىن جەڭىلدەتۋ"، - دەيدى وقۋشى.