شىمكەنتتە ۇلتتىق سپورت ءتۇرى – اۋدارىسپاقتان وتكەن جارىستا قورعانىس مينيسترلىگى ارميا ورتالىق سپورت كلۋبىنىڭ سپورتشىلارى ەكى التىن، ءبىر كۇمىس، ءبىر قولا مەدال جەڭىپ الدى.
چەمپيوناتقا ەلىمىزدىڭ 120-دان استام ۇزدىك سپورتشىلارى جينالدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
اۋدارىسپاق – سپورتشىدان ۇلكەن ەپتىلىك پەن كۇشتىلىكتى، توزىمدىلىك پەن باتىلدىقتى تالاپ ەتەتىن ۇلتتىق سپورتتىڭ ءبىر ءتۇرى. اۋدارىسپاققا ءتارتىپ بويىنشا ات ۇستىندەگى ايقاستى جاقسى مەڭگەرگەن، تياناقتى دايىندىعى بار سپورتشىلار عانا قاتىسا الادى. ەجەلگى زاماننان كەلە جاتقان بۇل ويىن جاۋگەرشىلىك كەزىندە نايزا ۇستاپ، قىلىش شاباتىن جاۋىنگەرگە قاجەتتى قاسيەتتەردى قالىپتاستىرعان.
جارىس قورىتىندىسى بويىنشا ارميا ورتالىق سپورت كلۋبىنىڭ سپورتشىلارى ازامات سارعازين (62 كگ) جانە الماز لاتىپبەك (74 كگ) جەڭىمپاز اتاندى. كۇمىس مەدالعا ارمان ساعىمبايەۆ (100 كگ) جانە رامازان عالەل (87 كگ)، قولا مەدالعا شىڭعىس ەرجانوۆ (74 كگ) يە بولدى.
ارميا سپورتشىلارىنىڭ بۇل جەتىستىگى شەبەرلىكتىڭ جوعارى دەڭگەيىن، ولاردىڭ ەجەلگى ۇلتتىق داستۇرلەردى ساقتاپ، ۇرپاقتان ۇرپاققا جەتكىزۋگە دەگەن ۇمتىلىسىن دالەلدەيدى.